Vpamuf in vol (3)

From Wikisource
Jump to navigation Jump to search

Belgän: Vp. mostepom vemo gudiko in Belgän. Sis 1886 (ab stad in 1894? R.) klubs suköl pestitoms ya: In Antwerpen, Blankenberghe, Gent, Ledeberg, Brussel, Brugge, Dendermonde, Audenaarde, Luik, Verviers, Everghem, Thourout, Waarschoot, Loo ten Hulle, Charleroi, Thielt, Kortryk e.l. Bled obsik »Volapükan belgänik«, ovedom vemo veütik in jölul, bi ovobom plo tedels. Kongef vpk plo Belgän ozitom in jölul e olabom nen dot seki gudik.

J. W.


Löstän: Vpaklub zenodik plo Löstän in Wien elabom glelasami ayelik, telul 10., äs liladobs in »Le Kosmopolit« No. 13. Se nunod cifa söla Th. Dévidé sezükobs sukolösi: »Kods, kels ebevobadoms taki vpamufa vöno so nämik, penunoms in yelanunods 1892 e 1893. No kanon lägivön bosi al nunods et, ab i mosumön nosi. Ye leigo kods sibinoms ainog, kels ekodedoms obis, no letön falön vapükadöli konfidöl lones mostepa, no dilimön klubi obsik e loegön senitiko steifamis valik gönü vapükadöl. Dilekel nulik vpakadema vobom ko zil gletik jafön vödasbuki nulik, in kel vödadiv bevünetik pakonsidom lepato pladalü vöds pedatuvöl dilo leo vüliko, dilo pelubleföl vemo fa Schleyer. Liedo bit in kadem binom so nevifik, das no kanon spelön, lefulön vödabuki bü yels 5-8.« Söl D. i no valadom gudumami de vpaklub valemik de Kn. e Bernh. »Plaks, de yels mödik, kelis ekonletobs sukü stud e geb kuladik vpa, esuadoms obis, das melakapük bevünetik mutom pasubumön su »Basis« vödadiva bevünetik. Vobs valik obas mutoms palüodön al lüod at.« Sikod, klub evotom tiädi oka. Panemom desnu: Wissenschaftlicher Weltspracheverein in Wien.




Se Volapük: Gased al pakam Volapüka 1894, Nüm: 3, Pad: 4.