Volapükaklub valemik Nedänik: Kobikam 21id

Soäsä ya penunos in nüm balid periodagaseda at, limanakobikam valemik päjenükon patiko demü disein ad lonön gitöfiko, das Volapükaklub valemik Nedänik pöfövon. Pö kobikam at pölonädos i, vio öträitoy dalabotis kluba. Demü kods at program sököl päpoton limanes vönädik kluba:

Program kobikama valemik teldegbalid Volapükakluba valemik Nedänik „Balif mekom valüdi (Baläl jafon nämädi)“ tü mudel: d. 21id dekula yela: 1931 domü s.: ‚A. A. Moll van Santbergen‘, ‚'S-Gravenhage‘, ‚Hazelaarstraat‘, nüm: 71.

Tü düp: 2 poszedela: kobikam lecifefa,
tü düp: 2 m. 30 poszedela: kobikam valemik.

Dins bejäfabik:

1. maifükam kobikama.
2. reid protoka kobikama büik.
3. nunod dö yels epasetiköl.
4. kal e gidükam dö tüp lätik.
5. mobs lecifefa:

a. mob ad fövön klubi.

b. gegiv suämas pro püb vödabuka pistüredölas.

c. lonäd tefü limanamamons no nog pipelöls.

d. lonäd tefü dalabots kluba.

e. votükams ini bagafs 2id, 11id e 17id statudas lüblinabiks baibinü mob: a.

I. Bagaf: 2. Votükam setema balid ad: „Klub rigiko tü 1890 yanula d. 1id pefünöl dönu pebligidon pro tüp mö yels 29 sa muls 11, tüp kelik pacedon ad eprimön tü 1919 dekula d. 1id.“

II. Bagaf: 11. Votükams seta balid ad: „Lecifef binädon nemu me pösods kil.“

III. Bagaf: 17. Moäd dila lätik, primöl me vöds: „aso zepami.... (büdakipü....)“.

6. bejäf penädas e mobas nog pügetölas.
7. daväl cifefanas.
8. bespik dö top e tim kobikama fovik.
9. zisäk e färmükam.

CIFEF.

Noet. Pavüdoy flenöfiko ad kömön ini kobikam.

Dono nu nunod brefik sökon dö kobikam pejenüköl, kel älabon benoseki.

1. Kodü dead presidana: s.: ‚F. L. E. Haastert‘ vipresidan: s.: ‚A. A. Moll van Santbergen‘ älabülom pladi etana, ed ämaifükom kobikami za tü düp lafik pos düp: tel.

2. Sekretan: s.: ‚J. G. M. Reynders‘ äloreidom protoki kobikama büik, kel päzepon, e fa presidan pädispenon.

3. Täno sekretan änunodom dö yels, kels sis kobikam valemik tü d. 28id dekula 1910 pejenüköl epasetikons.

Sekü slud kobikama valemik et püb jäfidota kluba: „Nuns blefik (brefik) se Volapükavol“ päfinükon. Atos äkodon, das nitedäl limanas änepluikon. Kudadins kluba päkälälons nog mögiko gudiko, ab kosam ko limans ibrekon, e sekü atos Volapükamuf in län obsik ästopon. Poso krig gretik, vali distuköl de 1914 äkömon, kel ädojedon vali, kel äjafon stadis jünu no mögikis, in kels te jenöf, gaen e vuk ävöladons, in kels het ätonodon, e dials pämodränons. Limanamamons no plu päpelons sekü nepub jäfidota kluba. Stad at äbleibon dulön so dü yels mödik. Klub äperon dub deadam presidani okik: s.: ‚F. L. E. Haastert‘, e stimapresidani okik: s.: ‚Dr. H. Van de Stadt‘.

Dub jenot, das zep jiregik statudas äfinikon, äzesüdos ma bagaf: 18 statudas, das pölonädos pö limanakobikam valemik dö laidabin u finid kluba, e mögädiko dö mod, vio öträitoy dalabotis kluba. Dub kods difik kobikam valemik et ai päzögon.

Propagidapenäd fa söls: ‚A. A. Moll van Santbergen‘ e ‚J. G. M. Reynders‘ pilautöl i sekü monidef no pepübon.

Ün dels balid yela: 1931 votikam ädavedon, e sis tim et Volapükamuf eliföfikumon. Ün gölayel de 1931 sevabo pö dabükabüsid sevädik: ‚E. J. Brill‘ in ‚Leiden‘ äpubons in Deutänapük vödabuk gretik Volapüka, ed in Volapük gramat lölöfik püka et. Lautan lebukas tel at äbinon: s.: ‚Dr. Arie De Jong‘, kel ko lobül cifala: s.: ‚Dr. Albert Sleumer‘ e kadäma Volapüka ipreparom stilo dü tim lunik yelas zül pübi bukas at.

Tü d. 25id yulula yela: 1931 tumyelazäl ela ‚Johann Martin Schleyer‘: fatan Volapüka pämebon lezäliko tö ‚Oberlauda‘: motedöp oma. In gaseds mödik lomänik e foginäniks yegeds pluuneplu veitöfiks tefü atos äpubons.

4. Pos loreid nunoda kal e gidükam dö tüp lätik päkontrolons, pö kelos päfümükos, das äverätons. Kal päjöton me suäm flonas Ned. 260, 42.

5. Pos atos mobs lecifefa päbejäfons.

Mob: a päzepon me vögods valodik, sodas klub päfövon.

Mob: b i päzepon. Pö atos pälonos, das fien peprodöl suämü fl. Ned. 85, 97 i pöpelon, sodas s.: ‚Dr. Arie De Jong‘ äkanom gegetön de klub suämi mö fl. Ned. 185, 97.

Mob: c. Pälonädos ad duliunön limanamamonis no pipelölis valikis, ed ad flagädön de d. 1id yanula yela: 1932 döna limanamamoni.

Mob: d. Dalabots valik kluba blebons sekü lonäd pö mob: a pälonöl. dalab kluba päfövöl.

Mob: e. Votükams ini statuds lüblinabiks päzepons.

6. Bevü penäds inükömöl i pened söla: ‚J. D. Van den Eijnde‘ in ‚Santpoort‘ äbinon ko nun, das no äkanom binön komik, abdas änitedälikom vemo tefü kobikam. Dan kobikama oloveblinon ome.

7. Täno limans nulik lecifefa päcälodoms. Bi lecifef sekü lonäd pälonöl büfiko obinädon me limans kil, päcäloms as

presidan: ‚Dr. Arie De Jong‘ in ‚Voorburg‘,

vipresidan: ‚A. A. Moll van Santbergen‘ in ‚Den Haag‘,

sekretan-kädan: ‚J. G. M. Reynders‘ in ‚Delft‘.

8. Top e tim kobikama fovik polonons latikumo fa lecifef.

9. Pos atos Volapükalebuks nulik bofik päbespikons.

Söl: ‚Dr. De Jong‘ änunom, das äjäfom me tidodem Volapükik, pö kel pösods lul äkompenons.

Posä i nog ispikoy dö volapükasits: ‚Esperanto, Ido, Idiom neutral‘ e ‚Anglic‘ presidan äfärmükom kobikami ko spikädil kuradüköl pro plöp Volapükamufa nulik.

J. G. M. REYNDERS.

Se Volapükagased pro Nedänapükans 1932, Nüm: 2, Pads: 7-9.