Vino barato

by Fabriciano González García

Vino barato  (1925)  by Fabriciano González García

-Bonos díes, siñor Cura,
-Santos y bonos, Bartolu.
Acabo tomá la parva
De lo moreno, y un sorbu
De resquemín, que se pinta
Y esmecha pa mata 'l pioyu.
-Bon provechu, siñor Cura,
Y que no i quede uno solu,
Por más que barrunto yo
Que 'l qu' anda mondu y llirondu,
Como vusté, de miseries
Han depizcallu bien pocu.
-Fales com' un llibru, hom;
Y entóncenes ¿ qué degorriu
De enriedos traes periquí ?
-Pos ná, home, ruín negociu,
Al menos pa mín; quixera
Ver la manera y el modu
Que dixera por mió suegra
Les mises de San Gregoriu,
Pos no aguanto á la muyer,
Que anda llevá del demoñu
Y m' aguixa y m' aforfuga
Con el mesmu requiloriu
Que si texo, sí agalbano,
Que si azoñino ó si atochu
Por mor de que la heriedamos
Pos dexónos un anoyu,
El güertu de cabo casa,
Meta de coliecha y horru;
Y diz que pa enfolinar
Foi más Ilistu qu' el raposu,
Y pa sacalla de penes
Al llimiagu fago bonu.
-Y tien razón la to Xuaca,
Pero que i sobra, Bartolu,
Pos ya a mín me provecía
Que morriendo pe 'l Otoñu
Non te hubiés acordao d' illa
Y ya vamos pa l' Antroxu;
Pero, en fin, meyor ye tardi
Qu' enxamás, queríu Bartolu;
Y ya qu' arroganti sales
Con mises de San Gregoriu
Nunca la mano te duelga
Y vo convidate, soñu,
Que to un barril de lo rancio,
Que xuro i afiede el moco.
Escanció unos cuartarones
Y al saborgallos Bartolu,
Rellambiéndose el focicu,
Entrugó con flema y posu:
Ah siñor Cura ¿ de dónde
Traxo isti caldo ? ¡ Recorciu !
¿ Cómo llamen isti vino
Que non caté más sabrosu ?
-¡ Ay Bartuelu ! clamó el Cura:
i Ye vino del Purgatoriu !
-¿ Del Purgatoriu ? ¡ Carape !
Al puntu gritó Bartolu:
Dexe, siñor Cura, dexe
Les mises de San Gregoriu
Porque míó suegra alampiaba
Por empinar daqué ' l codu,
Y habiendo allá de lo aneyo,
Si la saco del Penoriu,
Pué que la lleve la trampa
Y á mín me lleve 'I degorriu.