Veüt de Schleyer
Du yeltums mödik äsibinom niludam, das no binos-la mögik stukön püki valemik plo mens alik tala e das döl püka tugedik binom-la fopöf legletik, kel nevelo povolekom. Äjinos, das niludam at binom-la velatik; ibo blüfs mödik äjenoms fa nolels gletik e fa mens ilenadöl mödikosi, kels yed valik ebliboms nen sek plagik sembal.
Fino epubom volapük milagik e gletobidik söla Schleyer. Man at äbinom nefenik in pakam datuva opkik ed äblöfom ko zil oka, das döl väpüka leno binom fopöf e das pük tugedik plo nets alik lesi binom mögik.
Dido sibinoms nog mens mödik, kels en aidotoms, ab mens at no noloms, din kimik binom volapük, e nevelo estegoms nudi okik in glamat volapükik sembal; - mens at no laboms giti cödatön u krütön dö volapük, bi no sevoms omi.
Ab obs, volapükels, sevobs püki lefulik at e nolobs, das literat volapüka binom vemo gletik, das ya pepenoms balions mödik penedas volapükik bevü nets difikün, das aideliko milels penedas e spodakadas dugonoms potacalis tala e sevobs sikod, das blöf et ejenom lefulniko.
Si, lesi! Schleyer eblöfom, das pük tugedik bevü nets difik binom mögik, e no binos mögik en dotön; aideliko labobs kom obs jeni at, ed aideliko logobs das aimödom nüm volapükelas. If Schleyer du lif oka no imekom-la votikosi ka blöfi at - äbinomöv bal menas gletikün timagas valik.
Datuvs gletik ya pemekoms külü yeltums mödik, kels pomilagoms fa cils obas e fa cilacils cilacilas obsik - ab datuv gletikün, jinos obe, binom ut püka tugedik plo nets, plo mens valik, kel aifägom obi sagön vole lölik kelosi tikob, kelosi senob in lad oba.
Nen dot, if volapük e telefon obinoms peplaköl vätopo, kluds en obinoms legletik. Atos ozitos.
Ibo tikäl menik nevelo takedom, ed if eplakom, das leful sembal binom mögik su tal, no takedom, jüs leful at povolekom.
In velat at tuvon veüti de Schleyer.
Se Volapükabled Tälik 1889, Nüm: 15, Pad: 119.