Vödem redaka (1894:4)

Gepükü laltüg obsik in nüm 3 tefü pakam vpa bevü tedef egetobs penodi suköl de söl J. Waegenaere in Kotryk (Belgän), lautel laltüga et in n. 5 de »Vpan belgänik«:

Söl palestimöl! Tikol, das zeil obik no kanom nog pavolekön; deno no vilob blibön, nen vobön plo atos e kalob it su ol; tu umo, bi pömetob ole yufi obik, al fomön komitefi bevünetik i pageböl as danotabür zenodik plo vol lölik. Dunolös mobis olik moda noganama. - Eko nu i zeil obik balid. Zeil vpelas no mutom binön, lenadön vpi alime, ab pösodes, kels nedoms vpi plo melaks omsik. Kludo vobobsös plo pösods at e al rivön atosi, tik obik binom: fomam danotabüras vpa in läns valik. In Belgän ofomob danotabüris valöpo, kelöp sibinoms vpels u vpaklubs. If pösod x... läna foginik, kel no sevom pükis obsik, vilom melakön ko pösod z... läna obas, danotabür vpa zifa pösoda x u danotabür nilikün mutom nünön danotabüri zifa de pösod z. Somo pösods at tel kanoms melakön nemedamo. Bürs at odunoms atosi segun stip, das pösods at ostudoms vpi. U bürs at kanomsöv dunön it atosi jü fin vobas kadema.

Spelob, das vilolös ninsädön laltügi at in timapenäd olik e das ofölol zeili ot in län ola e das oyufol obi tefü stitam büras somik in läns valik... In kudadin sümik vpaklub zenodik plo Stirän in Graz epenom klube in Brugge penedi suköl, kel sepükom ze i cedi obsik dö din at:

»Vpablods löfikün! Eliladöl laltügi kluba divikün olas, petiädöl »mob smalik« in gased »Vpan belgänik befulobs viliküno vipi olas penön oles tikädi obas tefü mob at. Id obs cedobs, das äbinosöv vemo völadik plo pakam vpa, if äkanobs-la suadön tedelis e dustodelis tefü pöfüd gebama vpa as melakamed bevünetik e viliko ayüfobsöv steifi pöfüdik olas. Ab liedo in läns mödik vpans binoms so lindifik, das nena gepükoms spodakadi vpk sembal, kel pasedom omes fa klub vpk u fa vpan dalabik, e tefü läns votik anik no nolobs, va valiko vpan sembal sibinom us. If ab tedafiams anik ovipoms segun mob olas fetanami ko zif sembal ed omutobs koefön, das in zif et vpan nonik sibinom ud if, sukü vip tedafiama sembal, openobs vpane in zif sembal e no ogetobs gepüki fa vpan et, täno tedel tefik osmilom dö misek obas ed udämobs vemo dini gudik obas.

Büfo also okanols volekön mobi olas, kela desän gudik no misevobs, mutols labön spodelis konfidadigik e löbik in zifs veütikün valik e täno kanols dagetön seki gudik. Sikod konsälobs oles e vpanes valik yufön fefiküno desäni vpakluba in Hannover, kel vilom födön gledino spodi vpk me gased oka »Volapük«.

Tefü zif obas obinobs löbik, yüfön desäni gudik olas soin atos obinos mögik obes. If vilols fesedön ya nu penedis olas ali tedafiams zifa olas, täno nömodolsös te zifis et, in kels sevols spodelis fümik.«

Se Volapük: Gased al pakam Volapüka 1894, Nüm: 4, Pads: 1-2.