Vödem redaka (1894:3)

From Wikisource
Jump to navigation Jump to search

Etuvobs laltügi petiädöl: »Dö timapenäd« in nüm 5 de »Volapükan belgänik«. Lautel mekom me om mobis plagik, liko ninöf timapenäda vpk mutom binön, al nitedön e flunön göniko tedefi plo vp. Eliladobs gledilo mobis ut, kelis edesänobs it volekön u mubön in tim pötik; ibo dido tö täno vikod vapükadöla spet. vpa binom sefik, if tedef gebom-la plagiko püki at in volamelak. Ab mobön binom nefikulikum ka lefulön. Al kanön spelön seki no te timilik, sod dulöl, binom lepato zesüdik, das vp blibom nepevotöl büfuiko. Eblinobs kodis vemo veütik plo atos ya in nüm 2 gaseda obsik. Tefü tedef no labom slopi, lenadön püki, kel pavotom ti del alik, nendas bos lefulik pejafos jünu. Sikod vp mutomöv blibön äs binom anu, voto töbams valik obinoms zelado vanlik. Gebam fovik votas e votas ainulik edämom sis yels umo pakami vpa ka feit bevü vpans. (Dido säk votik binom, va obinos mögik konsidöl plakis yelas lätik, pakön denu vpi nuik i te so vemo, das orivom stadi, keli elabom in yel 1887.)


Binos fovo vemo säk veütik, va timil nuik binom pötik, al beginön dunöfi gletobidik äl lüod at. Aliko mutomöv dunanämiko pabeginön leigüpo e valöpo, lepato dat vp getom denu paki semik in läns valik ut, kels dilsumoms üno volamelaki. Ibo kis opöfüdom tedeles lenadam vpa, if no okanoms gebön sevis pevöböl, bi vp labom paki tu pülik, äs anu. Ab dunöf vaflanik somik binom te mögik, if näms nu pedabalöl e voböl ko sek pülik pebalamoms e penoganoms. Blüfs flanü klubs e vpans dabalik, al suadön tedefi dö pöfüd vpa, pemekoms ya anikna, ab üno ko sek leo nesiamik. Klu klub bevünetik te plo pakam e pöfüdam vpa pato plo volated mutom sibinön, penoganöl lisäliko de diso al löpo, so das alikan okanom kovobön segun näms oka. Tö täno, if noganot (organisation) somik sibinom, obinos i mögik, volekön vipis e mobis ut, kelas lefulami lautel laltüga et flagom de timapenäd vpk, kel sötom gevön bonedanes oka no te musami, sod i plu pöfüdis e tidami »dö valikos, tedavs, natav, mostep datuvas e gebams omsik, stelav, dustods ninlänik e selänik, plokuds in legleipams süpitik malädik u in neläbs süpitik, lönügs länas semik e popas omsik, e.l. . . .«


Sikod, büfo kinon komipön plo sugivs so gletik, kels demanoms dunanämi e vitimäli valuga züpelas vpa, al no miplöpön, gebonös timi at, du kel taked sölom tefü vpapakam ti valöpo ba sesumü Belgän, al fimön perivölosi, pato ab konletön züpelis döla obsik in klubams gletik e gletikum, al mekön velatik finona deviedi pesagöl ofeno, ab liedo aino nog pevoleköl: Balif mekom valüdi. Tim anik ofegolom jü al fünam kluba bevünetik. Bevüno i vpadinads nunog ze pekofudöl poklüläloms e okanobs beginön bijoki nulik ve lien lölik. Nevifo ab sefiko!


Laltüg obsik: »Tönobsös, kelosi erivobs ya«, peläsevom vemo. Aiumo lesevon, das binos zesüdikün anu, tönön vpi nuik as bälamamedi bevünetik luüno so lonedo, jüs bos lefulik e peläsevölos valemiko pejafos. Sikod i kadem bevünetik dilekü söl Rosenberger in S. Petersburg binom obes dilsumälik, bi slud balid oma ebinom, no gebön votis pesludöl fa om sunumo, ka jüs efinom vobis oka e ejafom lefulikosi tefü glamat e vödasbuk. Binos obes klu neplänik, liko kadem e züpels oma kanoms panemön »babülonans«, efe de flan ut, kö vots alik pageboms foviko, nendas vödasbuk ninöl votiks valik nulik epubom i te in deutapük.




Se Volapük: Gased al pakam Volapüka 1894, Nüm: 3, Pads: 1-2.