Vödem redaka, VpN 1951, Nüm: 1
Pö prim yela nulik lofobs reidanes valik gaseda obsik vipis gudikün obas. Yel: 1951 blinonös valanes läbi, beni, e benoseki in vobod onsik! Blinonös yel at i volanefe lölik püdi jenöfik, püdi voik so lunüpo pespelöli! Laf tumyela 20id änu epasetikon. Dub volakrigs tel, dub krigs votik, dub voluts laf epasetiköl tumyela at evedon tumyelalaf mifätik. E nu volanef lölk nog sufon, e nog osufon dü lunüp sekis jeikik volakriga lätik. Si! volastad binon so, das tü atimül igo volakrig kilid tädon obis, das on as gläv di ‚Damokles‛ lagon sus kaps obsik! Spelobsöd, das nämädans labons sapi e fägi ad moükön tädi at! Krig no plu pöton ün tim, ün kel lifobs. Krig binon tatimädim! Sekü atos kevobobsös, obs valik ed i obs: Volapükans, ad födön püdi! Ed atosi kanobs dunön, ifi ön mod neflagiälik, me föd Volapüka; ibä pük bevünetik bal in vol lölik kanon vedön svistamamed nämik in vol lölik. Klu no glömolsöd Volapüki, ab födolsöd mögiküno oni! Steifobsös, das volanef lölik gebon dönu püki valemik bal in dakosäd bevünetik!
REDAK
Volapükaklub valemik Nedänik: Doküms
Se Volapükagased pro Nedänapükans 1951, Nüm: 1, Pad: 1.