Vödem redaka, VpN 1946, Nüm: 6
Nü nüm lätik yeloda degbalid Volapükagaseda obsik paseapoton, no kanobs neletön ad notodön fredi obas dö jenot, das nelets, kels pibligädons obes, pefinükons. Gased obsik äkanon kludo dönu pubön, e somo kevoboön pö jenöfükam diseina jönik, keli desinobs, sevabo ad blinädön menefe medömi bevünetik valemik bal näi lomänapüks dabinöl valik. Pük valemik bal nendoto okosädükon nilöfikumo netis distik, ed okevobädon, das okanons gudikumo suemön odis. Dub suem gudikum odas konfid rezipik netas distik ovedon ai gretikum, e misuems mödik omoikons. Täno mens i osevedikons aiplu, das bevü nets distik het u feit no nedons dabinön, e das tim binon madik pro svistam valemik menas e püd laidulik.
Gased obsik dünon demädis Volapüka: yufapük bevünetik neudikün, kel pedatikon ün 1879 fa pädan pükis mödik änolöl: Schleyer.
Pük at sevädikonös aiplu e tuvonös nitedäli pö valans, kels senälons bosi pro volapükatiket! Volapük nendoto labon gitäti ad atos, bi binon yufapük bevünetik balid, kel ejonon ün floramatim oka, das äbinon vemo geböfik pro dakosäd bevünetik valemik.
Volapük labon süperodis sököl:
- Labon lotografi balugik fonetik.
- Labon gramati balguik ä too lölöfiki.
- Laobn to binod balugik oka mödoti bundanikum gramatafomas ka pük votik alik.
- Binon fasiliko lärnovik.
- Binon brefik.
- Binon kuratik, bi vöd alik labon sinifi fümik netelplänovik bal.
- FLagon tiki vemöfiko tikaviki, födon dub atos pükäli, e kleilükon dasevi in pÜk lönik e fogänik.
- Tonon kleiliko, fuliko ä nämöfiko.
- Balugükon dakosädi mudöfik e penamiki in ted e nolav.
- Kanon kevobädön nämöfiko ad jenöfükön svistami valemik bevü mens e födön dub atos volapüdi.
REDAK.
Volapükaklub valemik Nedänik: Doküms
Se Volapükagased pro Nedänapükans 1942-1946, Nüm: 6, Pad: 36.