Uz/Yorsiz na lazzat
Jump to navigation
Jump to search
Yorsiz na lazzat — Gʻazal
Jon koʻrmadi roʻzadin halovat
Iftorda yorsiz na lazzat?
Yor aylasa yori birla iftor,
Yoʻq roʻzada mundin oʻzga davlat.
El barcha visol bazmida shod,
To subh chekib surudi ishrat.
Har shom menga navolayi gʻam
Iftor qilurgʻa boʻldi qismat.
Mohi ramazonki, fayzi choʻqtur,
Men xastagʻa yorsiz na rohat.
Har shom koʻzimni yoshi sham’im,
Xuni jigarim ba joyi sharbat.
Hijron ila roʻza javr etolmas,
Gar yor esa, Nodira, salomat.