Uns Moderspraak

From Wikisource
Jump to navigation Jump to search
Uns Moderspraak.
Text type: Gedicht
Comment:

from: Tausend Jahre Plattdeutsch, Hamborg 1927


:

Is denn uns Moderspraak bloots dar,
Um Jux un Spaaß to driben,
Um Ulk un Allotria
Un Narrenkraam to schriben?
Stammt wi denn all, de plattdüütsch spreekt,
Ut Putschinell sien Kassen
Un sniedt, worneem wi gaat un staat,
Bloots Fratzen un Grimassen?

Wer di nich kennt, mien Moderspraak,
Kann gornich anners denken,
Süht he wo veele vun dien Söns
Di Lief un Seel verrenken;
Süht he, wo se sik möht un tiert
Bloots Jux mit di to maken,
As wenn du’t Aschenbrödel weerst
Mank all de annern Spraken!

Mien Moderspraak, wat bist du riek!
Wer di man hett, bruukt nich to sorgen;
Du giwwst mit Hart un Hand togliek
Un bruukst bi Fremde nich to borgen!
Is ok man slicht un lütt dien Riek,
waanst du ok nich in Prachtpalläste,
Du bist un bliwwst för mi dat beste
Mien Moderspraak, so söt, so riek!