Un rakí kon mezé
Aljá a la tadre. No tinía io nada de azer, i tu saves, uno puede estar batal el día entero, ama el meoio no desha de lavorar, i me akodrí entre otras kozas de algo grasiozo ke me pasó aze ia muncho tiempo. Na, te lo vo a kontar: estaba io un día kaminando por la kaie Corientes, kuando dereprente me topí kon Nissim Sarano (ke en ganeder esté) ke komo ió, salió a dar un dolash.
Dumpues de saludos, abrasos i jadras varias al estilo de mozotros, tu ia saves, akodrimos de ir a bever un rakí (ke se izieron varios) kon mezé, al Café Izmir muy alavado entonses.
Bueno, ¡a la salud!, dishimos, i veo ke Nissim kita algo de adientro del sako, lo mira, mete kara komo de disgusto i beve rakí. Seguimos echando lashón un rato i pidimos otrún rakí. De muevo este benadam aze lo mismo, kita lo del bolsiyo, mira, mete kara de disgusto i beve el rakí.
Avlamos un rato más i le demandí si kería bever un ultimó rakí, i me dize: aspera, déshame ver. Untruna ves kitó akeio del sako, lo miró i esta ves no metió kara de disgusto, al kontrario, se sonrió i disho dando una dada en la mesa. ¡no bevo más!.
¡E, adió!, le dishe ió, no´stó entendiendo esto ke vas asiendo, ¿de ke no me lo esplikas asiviva tú? Está bueno me dize, io te lo vo a esplikar: esto ke kito i meto en el bolsiyo es la foto de mi esjuegra, la vo mirando i vo beviendo. Kuando la empeso a ver linda ¡no bevo más!.