Umrê Dayi Bû Me (Ebes)
'Umrê dayi' bû me bê dilber 'ebes
Wey tevê 'umrê me borî ber 'ebes
Dil emanet da bi naehlan nedî
Lê bi naehlan me da gewher 'ebes
Da di seyra 'işqê bê dilber neçî
Lê dibit seyra te bê dilber 'ebes
Pir di pê weslê me se'y û cehde da
Cehde û se'ya me hatin der 'ebes
Ah-i wê kuştim bi derba xencerê
Ma di mîlakê diret xencer 'ebes
Dil ji derba kaşowan bû parepar
Goy di meydanê dibit sed ker 'ebes
Mehdera vî suxte'î îro bikin
Ez dibêjim nabit ev mehder 'ebes
Kifş e me'na kî li lewhi-sîm-i dî
Nuqte'ê misk û xetê 'enber 'ebes
Da Mela hişyar-i bî lê pir kesan
Sîne pir lê dane seng û ber 'ebes
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse