UmThethosisekelo weRiphabliki yeSewula Afrika/Isahluko 12

From Wikisource
Jump to navigation Jump to search
UmThethosisekelo weRiphabliki yeSewula Afrika  (1996) 
Isahluko 12: AbaRholi BeNdabuko

211. Ukumukelwa
1. Iziko, ubujamo nendima edlalwa buRholi beNdabuko ngokuya komThetho wesintu, kuyamukelwa, ngaphasi komThethosisekelo.
2. Ilawulo lobuRholi beNdabuko lelo elihlonipha irherho lekambiso yomThetho wesiNtu lingasebenza ngokulawulwa nginanyana ngimuphi umThetho osebenzako namasiko, okufaka hlangana amatjhuguluko namkha ukwesulwa komThetho lowo namkha amasiko lawo.
3. Amakhotho kumele asebenzise umThetho wesiNtu lapho umThetho loyo usebenza khona, ngokulawulwa umThethosisekelo nomThetho wananyana ngimuphi omunye umThetho osebenza ngomThetho wesiNtu.

212. Imisebenzi YabaRholi BeNdabuko
1. UmThetho weNarha unganikela indima edlalwa baRholi beNdabuko njengesikhungo esizingeni lemakhaya eendabeni ezithinta imiphakathi yemakhaya.
2. Ukuqalana neendaba ezimanqophana nobuRholi beNdabuko, indima edlalwa baRholi beNdabuko, umThetho wesintu namasiko wemiphakathi elandela ikambiso yerherho lomThetho wesintu—
a. UmThetho weNarha namkha wesiFunda ungakhuthaza ukuhlonywa kwezindlu zabaRholi beNdabuko; begodu
b. UmThetho weNarha ungasungula umKhandlu wabaRholi beNdabuko.