Tupã Ñe’ẽ/Ñepyrũmby
Vo 1
[edit]1 Ñepyrũmbýpe, Tupã ojapo yvága ha yvy. 2 Ha yvy ijysaja'ỹ ha inandi, ha pytũmby ojaho’ipa typykue ape. Ha Tupã pytu omymýi y ape ári.
3 Ha he'i Tupã: “Tahesakã”, ha hesakã. 4 Ha ohecha Tupã hesakãva iporãha. Ha omboja'o hesakãva pytũmbýgui. 5 Hesakãva ombohéra “ára” ha pytũmby ombohéra “pyhare”. Ha upéicha ohasa ára ypy.[1]
6 Ha he'i Tupã: “Toĩ peteĩ pa'ũ ykuéra apytépe ha tomboja'o y ýgui”. 7 Ha ojapo Tupã pe pa'ũ ha omboja'o y pa'ũ guýpe oiméva y pa'ũ ári oimévagui. 8 Ha Tupã ombohéra pe pa'ũ “yva”. Ha upéicha ohasa ára mokõiha.
9 Ha he'i Tupã “Toñembyatypa y yva guýpe oiméva peteĩ tendápe, ha tojehecha yvy ikãva.” Ha upéicha oiko. 10 Ha ombohéra Tupã iñapekãva “yvy” ha y aty katu “yguasu”. Ha ohecha iporãha.
11 Ha he'i Tupã: “Taheñói yvýgui kapi'i, ka'avo ha'ỹiva ha yvyra hi'áva ijueheguáre, hyepýpe ha’ỹiva.” Ha upéicha oiko. 12 Ha yvýgui heñói kapi'i, ka'avo ha'ỹiva ijueheguáre ha yvyra hi'áva hyepýpe ha’ỹiva ijueheguáre, ha ohecha Tupã iporãha. 13 Upéicha ohasa ára mbohapyha.
14 Ha he'i Tupã: “Toĩ mba'e hendy'íva yvága pýpe oipe'a haguã ára pyharégui, ha ohechauka haguã araka'épa oñepyrũ ára, jasy ha ro'ykuéra,[2] 15 ha tohesape yvy ári.” ha oiko ha'e he'i haguéicha. 16 Tupã ojapo mokõi mba'e hendýva iguasuvéva: upe ituichavéva, kuarahy, ohesape haguã ára jave, ha upe imichĩvéva, jasy, ohesape haguã pyhare jave. Ojapo avei mbyjakuéra. 17 Omoĩ umi mba'e rendy yvága pýpe ohesape haguã yvy ári 18 ha tokuaita ára ha pyhare jave, ha omoambue haguã ojuehegui hesakãva ha iñypytũva. Ha oma'ẽvo hembiapokuére ohecha iporãha.[3] 19Upéicha ohasa ára irundyha.
20 Upéi Tupã he'i: “Y tahenyhẽ opaichagua tekovégui ha toveve guyra yvy ári.” ha oiko ha'e he'i haguéicha. 21 Tupã ojapo umi mymba guasu hoytáva para guasúre ha opaichagua apopy oikovéva.[4] Ha oma'ẽvo hembiapokuére ohecha iporãha. 22 Ohovasa chupekuéra he'ívo: “Peñemoña ha pemyenyhẽ y aty guasu ha toñemboheta guyrakuéra yvy ári.” 23 Upéicha ohasa ára poha.