Traktaat fan de Sân seelannen

From Wikisource
Jump to navigation Jump to search

<< Haadside

HYR BIGINT EEN CLEEN TRACTAET FAN DA SAUN ZELANDEN DES GANSEN LANDIS FAN FREESLAND MEY SYN TOBIHEER ENDE EYLANDEN

  1. Dat aerste zeland dat is Westfreesland bi dio oder sida des zees, alse Hoern, Enchusen, Medenblic, etc., hwelc di grewa fan Holland him haet onderdenich maked haet alderaerst.
  2. Dat oder is streckende fan Starem to Liouwerd, alse Westergo ende Doyngaweerfstal, Weimbritse, mit al hyara toebiheer.
  3. Dat tredde is heten Aestergo mei al Smellingaland, Boerndeel, foerd meer Handmare, Haskerwald, dae neersta Walden ende Rauwerde, Aetzespel ende Colmerland.

Disse twa zeelanden, als dat oder ende dat tredde, sint eta fry ende oers neen hera bitannet bihalua diin keyser des Roemschen rikes. Mer ontellika sehada ende manich oenfiuchtinga ende grata bloedstirtingha habbet disse landen lith om dine frydoem to bischyrmen, hwelck hem is ioun fan dine grata koninck Kaerl, ende deerto manich sueer striden habbet slain ienst dine grewa fan Holland om hiara land to bischyrmen.

  1. Dat IIII is Stellinghwerf, Scoterwerf, Kunersyl, Geethorn, Fullenhoef, Steenwyck ende al Drentland. Dit Zeland haet bituongen di biscop fan Vtrecht, als Drent, Steenwyc, Fullenhoef, Geethorn ende Kunersyl, mer Stellinchwerf, Schoterland, disse twa sint eta fry, ende grata anfiuchtinga mit grata orlogen, deer hia habbet hand toienst dat sticht fan Vtrecht.
  2. Dat fyfte zeland is Langwald, Freedwald, Humers, Mydach, Hunsinga, Fiwelllingha, Groninghen, Aeldambecht, Reyderland, Uesterwald mey al da walden, deer aldeerbi lidset twisscha da Eemse ende Westfalen. Dat maeste deel fan disse zelanden is eta fry ende sommich sint onderdenich ioncker Kene ende grewa Vlrick ende sommich sint da Groninghera onderdenich.
  3. Dat sexte zeland is Eemda mit al Eemderland, Brokmereland, Aurikerland, Aesterghaland, Heerlingerland ende Dole Noerderland mei syn toebiheer, ende dit edel zeland, deer ryckst was ende fruchtbaer, huelc ioncker Kene fan Broeckmerland, een neifolger syn faders ende broders in boesheed, ende mei quaedheed dit land bituong ende makese eerm wrmits zeeraweren ende hi spared gastelyck ner wraldsch ende was boes in alle tinghum ende wt da tzerken naem hi al dat ield ende clenodien, deer hi dat stryd mei feerd.
  4. Dat VII zeland is Rustringaland, Winingaland ende Buthiaingheraland, huelc land bisith Sibolt Ede soen, ioncker Kene suager. Item Owerlengerland, Moermerland ende Lingen, dat sint delen disser zelanden, huelc ioncker Kene aec bituongh, ende Focke Ukema disse tria landen fan Keno bileende, ende neen landishera ne mocht disse zelanden bituinga, bihala disse Focke vorscrioun. Item Segelterland is aec een deel fan disse VII zelanden ende iout tribuet ende schat den biscop fan Munster. Ende Scheedland, Haedelreland, Wymderland wr dio Wesere sint aeck delin fan disse VII zelanden. Disse haet bituongen di biscop fan Bremen, mer Dithmers is eeta oenbihinderd.