Timags vel mana
- Vol lölik binom teat,
E mans ä vofs (voms) valik te damatans len at,
E man bal du lifüp plisenom bösodis mödik,
E süfs oma binoms timags ga vel. Balüdo
Sugäb, dlenöl e spuköl in lams kälela omik.
E täno julapul muröl, ko sak bukas omik
E ko logod nidik gödelik, glugolöl, äs snel,
Me step nevilik nevifik al jul. E täno löfan,
Seiföl äs fön glutöl, ko liäns lüga'fulik
Stimü logabobs löfäba omik. Täno soldater
Geböl yulis foginik, ko balib äs leopafa,
Jaludik dö stim oka, süpitik e vifik in zan,
Süköl mäkabi, äs cil blaedis vagiik bösülom,
Sägo len mud käna. E täno magit, laböl
Götöpi glöpik smajönik, eifidöl ömgokis pienik,
Ko logs jalepik e balib pekötöl segun regulod,
Sesagöl pükedis visedik e blünöl zitätis molädik;
E somo plisenom bösodi. Timag mälid cenom
Al man bäledik nepinik, kel polom jukis slövenik,
Laböl lüni len nud, poki len flanap oma,
E stogis yunüpa, pedegeböls nemödo, tuvemo veitik
Plo lögs slenik oma, du vög manlik kleilik,
Pecenöl denu al vög smalik cila, feifom
Zijotöl in tons oma. Eko süf lätikün jötik,
Kel finom koni löpnik selednik e jena'fulik,
Binom cilöf denulik e föget lefulnik e lölik,
Nen tuts, nen logs, nen smek, efe nen valikos.
Se Kosmopolan 1895, Nüm: 24, Pad: 246.