Tiks dö füd vpa e vapükadöla

From Wikisource
Jump to navigation Jump to search

Finü yelanunod omik vpaklub zenodik plo Stirän in Graz suflagom kopanalis ä vpanis valik, pakön vpi jünuik (ab li efögeton, das dat. vpa plepadom püboti lulid vemo pevotöl vödasbuka gletik?!) bi pakam vapükadöla kanomöv parivön te me pakam vpa de Schleyer. Ifi no kanobs läsevön kodi at as löliko velätik, plovödobs deno viliko steifamis kluba zilik at, kel erivom sekis jönik me pakam vpa e vipobs ome i fovo plöpi gudik. Liedo tuvobs in suvok at anikosi, kelosa sagami no evaladobsöv de klub, kel labom kopanalis so mödik dilo vemo sikik e pekulivöl.


Klub nemom no te cedis valikas ut, kels no laboms kuladiko stanöpi omik, nevelätik u pölübik, sod mistümom sägo dili vpanas üno emostepöl, püköl dö »lucödät bleinik«, »feits nezesüdik« e »gudumamasük«. Dub sagams somik püd no pofödom vo in vpavol! Vpans sikik vönik, bevü kels mans mödik pekulivöl nolaviko ebinoms, e nuiks, kels no kanoms labön stanöpi kluba, no etaeloms datuveli vpa te demü gudumamasük u segun ced votikas demü glöt, pleit nolavik (!), sod bi as mans fefik, eplaköl, kels eviloms känüdiko gudikünosi, eninlogoms, das volekam döla no kanom parivön su veg, keli datuvel vpa egolom jünu. Feit yegik (polemik) no kanom panemön te gudumamasük, sod binom bufumo »födamamed zesüdik plo nolav«, äs i plof. dl. H. Schuchardt sagom in päm oka: »Weltsprache und Weltsprachen«. No kanobs läsevön u labön it tikadi so nabälik äs klub esepükom. Binobs pesuadöl fümiko, das vapükadöl ovikodom, ifi yels nog mödik ofegoloms ba jü al nindukam e gebam valemik püka bevünetik. Cedobs obis as bikomipelis döla gletik at e obinobs ai e nefeniko dunik gönú volekam omik to miseks valik. Ab stanobs, if kanon sagön so, ove vp, o. b., no klödobs, das volekam vapükadöla porivom me vp, das vp it ovedom melakapük bevünetik füda. No te vpans, sod i züpels vapükasitas valik votik, kels leno edepuboms valiks, äs palesagos ai, bi lilon nosi dö mostep omsik, no jäföl omis e no liladöl gasedis omsik, binoms pionans vapükadÓla. Sikod steif vapükaflenas valik velatik, veitologöl mutom binön: balam züpelas valik döla püka bevünetik, al mekön mögik biti tugedik sekikum gönü volekam vapükadöla! Rivön zeili at efe suno, no binos so nemögik, äs mödiks klödoms ba; ibo veg velätik, glun fimik su kel mutobs lasamön obis, petuvom ya, ifi mödiküns no nog kanoms logön omi; ab potidoms suno gudikumo dö om. Bevüno pakonös vpi valöpo us, - kelöp binos mögik. Obeglidobs gälo seki alik. Ye kelöp blüfs valik emiplöpoms jünu e epölüdon sukü atos konfidi al vp, no tikonös, das vapükadöl ofalom i ko vp, sod blibonös ai zupel e födel fiedik döla püka bevünetik! Jbo[1] kanobs sagön ya nu, das tim, in kel ledul at pomesedom, no binom vemo fagik.


Pekodedobs, sepükön balna i cedi obsik dö füd nilikün vapükadöla no te dub suvok et vpakluba in Graz, sod i pato dub peneds mödik de vatopo kels sepetoms nelanimi e dotis gletikün visü mög pakama fovoik vpa e - klu vapükadöla. Spelobs, das dotels valik at okapäloms nu, das vapükadöl no odepubom ko vp, bi vpamuf no binom fovo leigik vapükamufe valiko. Sikod te nog du tim blefik: Ledul e sufad!



NOETS. (Vükifonät)

  1. Bükapök; pla: Ibo.




Se Volapük: Gased al pakam Volapüka 1895, Nüm: 8, Pads: 1-3.