Tidüp musama vpik
Sis lonedo ädesidob blufön al volapükön; desid at oba pipüdomöv nefikulo, if ipükob la ko tab e stuls. Deno, kotenam at ibinomöv flätik nemödo, bi desid pükön pakoyumom ai ko desid lilön pükön, ko desid telapükön.
Pükön e lilön vpi äbinos x nepesevik plo ob; sikodo äkanob givön gepükis te dotik utes, kels äsäkoms obi tefü mög das vp ovedom pük pöpüköl bevü pösods kels no kanoms votiko kapälön balvoto. Koefob i das gepüks dotik oba äbinoms boso nesiamik linedü ob it; no äkonfidob in sepükam vpa. Sek Kongefa in Paris, kö deputals netas vemo difik evolapükoms, eningifom in ob speli das vp äbinom la pöpüköl, ab i elenstigom pluo nuläli e desidi obik.
Ek osagom das kanon musamön ko flen sembal; blufolsös sepükön setis tel, e suno pükot hit lom oki, vöds lomapükik leflumoms, e no tuvon fälo gälodi meköl kapälön balvoto dubü tob, ven kapälon balvoto so gudiko me lomapük.
Pakamaklub zenodik vpa elabom döli legudik damanifön tidüpi musama vpik, in kel volapükön pämutos la, ebo al plägön vpi mudik.
In koköm balid, ezitöl balul 23.id, in jul kösömik pegevöl plütiko fa zifakonsälem, in Piazza Galline, pösods läsöl balsefol u balsemäl (vo nemödik) elogedoms balvoto nepükiko du tim anik büfo äkinoms la sepükön vödi vpik; ab poso, pianiko, set anik, pükatil anik, bepükam blefik anik ebeginoms palilön. Kapälön balvoto lefulniko, e pluo ka ävaldobs e äkinobs spelön, eningifos lanimi obes; so das ekanobs pasuadön das musam vpik no binom badotonik e fikulik, sod benotonik e lekapälnik säto.
Atos eleläbos obi, e iviloböv denuön vavendelo kokömi dilsumälik, pemeköl plüetikum fa läds e vomüls bevütlidöl; ab bligams pösodik daloms tidüpön te lulÜdelo, düp 8 1/2 vendela.
Tuvön musamayegis binos ai din fikulikün, pluo bi no valiks sevoms leigo vpi; ab söl Zuccoli lavogel e vpan zilik, eningifom siti plepadön säkis pülik, keles gepüks dugoms anikna nefikuliko pükati, i ven pemotom fa yegs nitedik nemödo.
Pösods tu mödik no läsoms vo in koköms, e binos däm, bi aikiom kanom bevütlidön e ätuvomöv suno lanimi al dilsumön musami, te if äsevom la vpaglamati e älabom la konleti smalik vödas.
Se Nunal 1890, Nüm: 10, Pads: 1-2.