Te Tiriti o Waitangi (Rarotongan)
Tuanga mua[edit]
Te rauka nei te au Ui Rangatira o te Putuputuanga o te au Uki i roto i te Taokotaianga o te au Ngati Katoatoa o Nu Tireni, e te au Ui Rangatira tei kore ratou i riro mai e au i roto i teia Taokotaianga nei, i te oronga atu ki tana Ngateitei, koia oki te Ariki Vaine o Peritane i te au tikaanga katoatoa ma te kore rava e akatuanga-ia te mana Ngateitei e te au tikaanga tei oti i te tuatua-ia e te Putuputuanga o te au Uki, me kare te au Ui Rangatira tatakitai, e na ratou e ta-angaanga i te reira me kore e mou piri tikai i te reira i runga ake i to ratou au tuanga enua i roto i te irinakianga e ko ratou okotai uaorai tei akamana-ia kia rave i te reia.
Tuanga rua[edit]
Kua akatika ma te akapapu mai tona Ngateitei te Ariki Vaine o Peritane ki te au Ui Rangatira katoatoa o te au Ngati tuketuke o Nu Tireni, ki te au kopu-tangata katoatoa ma te au tangata tatakitai, i to ratou au tikaanga katoatoa, kia kore rava te reira e tamanamanata-ia, i runga i to ratou enua, to ratou au enua atea, te au vaorakau e te tuanga o te Moana (te tikaanga o te tautai), e tetei ua atu au apinga e na ratou tikai, me kare ra na te tangata tatakitai, ua atu e eaa te roa o te tuatau ta ratou ka inangaro, e na ratou rai te reira e akaaere. Inara, ko te au Ui Rangatira i roto i te Taokotaianga o te au Ngati katoatoa e pera te au Ui Rangatira tatakitai, na ratou e oronga atu ki te Ariki Vaine Ngateitei i te tikaanga katoatoa o te au enua kia tutaki-ia na mua ki te au tangata taonga o te enua e kia riro katoa ratou i te akara matatio i te akatanotano anga i te tu o te moni ta ratou ka akatinamou no te tutaki i te au enua. Kia akatika-ia ra oki teina i rotopu i te au tangata taonga o te enua e pera katoa ki te au tangata ta te Ariki Vaine Ngateitei i iki ei mono iaia i te raveanga i teia tuanga angaanga ma te tau tikai.
Tuanga toru[edit]
I roto i te tamanakonako anga kua oronga atu tona Ngateitei te Ariki Vaine o Peritane ki te au tangata enua katoatoa o Nu Tireni i tana paruru anga kia ratou e ma te akapapu atu e ka aiteite to ratou tikaanga e te mana mei to te iti-tangata i raro ake i te au Peritane.
(signed) William Hobson, Lieutenant Governor.