Talk:Séng-gĭng/Cháung-sié Gé/6

上帝其囝见侬其诸侬囝，容貌作佳，就凴伊所取意其，讨来做老小。耶和华讲：「侬既然是肉体，我其神的的卖永远感动伊，哪罔容伊日子遘蜀百二十年。」当时有者尼比林族著地上。以后上帝其囝共侬其诸侬囝同室，所生其囝是上古英雄出名其侬。 耶和华见世上其侬所做其作恶满贯，心嚟想其念头时常是呆1。故此耶和华既然造侬落世上，就退悔2，心底酊苦3。耶和华讲：「我所创造其侬，我卜灭伊落地上，就是侬共百兽，虫蚁，天嚟其鸟，因我造伊各侬仱退悔。」哪4诺亚蒙恩落耶和华面前。 诺亚其代计5记著下底。诺亚落许蜀代侬中间是义人，道德纯全，所行其代会合著上帝。诺亚生三个囝：闪、含、雅弗。 当时世间侬落上帝面前心术败坏，全地都是凶恶。上帝看世间侬心术败坏，万民行事都是歪斜。上帝共诺亚讲：「世间侬其末期尽近著我面前，因伊使全地都是凶恶。我的的灭伊落地上。汝仱著使松树其料做蜀条大船，底势6截喇房间，揢沥青涂者船其内外。做者船其样式是縂款：长三十丈，阔五丈。船顶做喇槛门7，悬8蜀尺。船著做上、中、下三层。我卜使洪水浸者地，除灭天下一切有血气其众生，凡地上其都的的死亡。惟独我卜共汝立约。汝著底去大船嚟，汝共汝嬷囝9、新妇10，都著底去。亦将各种有血气活其乇，每种蜀合，就是蜀港11蜀母，带伊上船，会共汝齐保全伊其活命。飞鸟凴伊种类，共爬地兜各种其虫蚁，凴伊种类，每类蜀合的的来汝嚟，以致保全伊其活命。汝著存积诸样食其乇，替自家连只侈类做粮草。」诺亚都凴縂款做，凡上帝所命其，都縂款遵行。