Tak krasny wječor
Tak rjany wječor. - W stole płachtatym
So kolebam a z myslemi sej hraju,
Hdyž woko k njebjesam dźe kćějatym
A měri doł a horu w ćichim kraju...
Z młhu pada dźeń a jeho khwilička.
Dny w dalinje so hibaju kaž sćinje -
Tam směje so, tam płače myslička,
Hdźež juski du, hdźež woko w sylzach hinje...
A woko k horam saha přede mnu -
Kaž nóc so nizke hory z blizka čornja,
A za nimi so wyšše zběhaju,
Kaž lazur jich so módri kroma hornja.
A z jasnej pychu njezapomnički
Ktu wjeŕški štyri za nimi tam zady;
A je, kaž złoto bychu hwězdźički
Sej na nich kazałe tam do hromady.
Płašć čorny woblečena hodźina
Je husto, doniž kroci ći po boku,
A w myslach pusta šeri ćmowina
A bědy bjeru błyšć a módrosć woku.
Hdyž dźeš pak z wokom k hwězdam zhladujo
A khowaš wutrobu a hłowu khmanej
Sej, a čorny płašć so rozdrje spadujo,
A póńdźeš jako na kwas z družku rjanej.
Štož tebje bolało, ći budźe kćěć
Kaž njezapomnička we spominanju,
Štož z wichorami wuło, budźe wěć
Kaž postrow ći we hwězdnym błyskotanju ...
O kuzło słódke! W stole płachtatym
So kolebam a z myslemi sej hraju,
Hdyž woko k njebjesam dźe kćějatym
A měri doł a horu w ćichim kraju.
A sylne wot žiwicy wonjenje
Wětr z jědlow ńjese, z róžow něžne wonje,
A mile w myslach ćehnje zwonjenje,
A rajski ptak mi woblětuje skronje....
- Author: Jakub Bart-Ćišinski (public domain)
- Source: http://texty.citanka.cz/pata/sc1-25.html
- Note: Stary prawopis