Tönobsös, kelosi erivobs ya! (2)

Labobs denu kodedi, sepükön vödis at e kaütön ta tuspidam, kel oblinom te dämi gletikün dine obas. Egetobs zülagi, me kel vpans pasuflagoms, läpolön monamedis al pelam delidas balid plo pübam segivota lulid vödasbuka vpa. No kanobs belobön desäni somik, bi no kanobs vipön püboti lulid vödasbuka. Esepükobs dodis obsik ya in nüm 2 bleda obsik e lüjonobs denu al oms. Zu me vödasbuk nulik, ninöl votis e nulafomotis so mödik, kels pacedoms fa plunum vpanas te dilo as menods, ab fa nonik as pedejötöl e bliböl fovo nepevotölo, vpaliterat lölik jünuik, kel ninom vobukis vemo mödik, bizugik, pepenöl in vp klatik, pamekom nevöladik. Klu kaütobs nogna ta volekam desäna at, kel ojafom te kofudi gletikün e sliti löliko nesanamik bevü vpazüpels, du anu vpans e vpagaseds mödikün geboms denu vpi balik et, kel patuvom in vobuks gudikün vpaliterata epuböl jünu. Sikod mutobs blibön so lonedo su stanöp konsefälik, o. b. tönön perivölosi, jüs luüno plunum züpelas püka bevünetik ebalamom dö veg, su kel vapükadöl podugom vifiküno e sefiküno al volekam.

Se Volapük: Gased al pakam Volapüka 1894, Nüm: 5, Pad: 3.