Syrotka
Wote mšě du kemšerjo
z cyrkwje, domu božeho;
šćežku přez rowy do wjeski
po kerchowje stupaja,
wšelako sej kleskaja -
zdobom wotmjelknu te kleski.
Na rowje tam holička
kleči, mała syrotka,
drastu čornu zwoblěkana.
Mólčkej ruce stykuje,
žałosćo tak běduje
wboha holčka wupłakana.
Nimo du pak kemšerjo,
nimo rowa zrudneho,
na spěwarku pohladaja,
spěšnje so zas wobroća,
sylzu z wočka wótrěja,
domoj mjelčo pochwataja.
- Author: Jakub Bart-Ćišinski (public domain)
- Source: Jakub Bart-Ćišinski, Zhormadźene spisy I, Ludowe nakladnistwo Domowina, 1971