Suvok! (Lifanunods tidelas vpa)

Suvok!

len tidels valik volapüka.

Balid volapükaklub löstakinik in Vin-Meidling desänom segivön sunüno vobuki, kel sötom ninön lifanunodis blefik plofedas, löpitidelas e tidelas valik leodü danemam omas. Sikod begobs valikis tidelis, löpitidelis e plofedis volapüka penön obes, dinad kel, u men kel älüjonom omis tefü volapük, timi vio-lonedik ästudoms volapüki jüs getam dipeda; kelosi emekoms jünu plo pakam volapüka e plo sümikos. Begobs i lenunön obes däti motöfa omsik, cali, steböpi e l. Pened alik mutom binön pepenöl volapükiko e pobükom lefulniko, if no obinom tu lonedik, in vobuk at. Nem vobuka at, kel olabom fovis nepemiedöl, bi vilobs aidebükön penedis tidelas a tum obinom:

„LIFANUNODS TIDELAS VOLAPÜKA.“

„Tum balid“ — „Tum telid“ e l.

Niludobs, das vobuk som olabom nitedi valemik e das poliladom noe fa tidels volapüka, soi fa züpels valik püka ät. Vilobs segivön tanadi balid sosus olabobs stöfi sätik alos e begobs sikodo potön lesuno obes lenunis teföl.

Ko lestüm sikik

plo sevälef balida volapükakluba löstakinik:

Dl. M. Obhlidal, löman.

Krebs Heinrich, sekretel.

Se Mulapenäd nebolitik: Volapükagased 1887, Nüm: 7, Pads: 34.