Sul matrimoni de duu vecc
Sul matrimoni de duu vecc.
Di Giuseppe Bertani
Car amor, lassetel dì,
Te see propri staa on gogò,
T' ee faa on colp che, segond mì,
L' era minga de par tò,
E te disi ciar e nett
Che t' hoo pers tutt el concett.
E defatti mi pensava,
Che te fusset pussee scrocch,
Ma hoo capii che m' ingannava,
Che t' avevet tettaa pocch,
E che i colp bej che t' ee faa.
L' è staa on cas se ti ee ciappaa.
O besogna che t' avesset
Volontaa ben de smorbià,
O che in fatt no t' ghe vedesset
Quand el colp t' ee lassaa andà;
Siela mò come se voeur,
Te m'ee faa rid, ma de coeur.
On veggion ch' el pò a gran stent
Sostegniss col bastonscell,
Pien de gotta, invernighent,
Cont in coo gnanca on cavell,
E tant soeuli el mostaccin
De servì per on crespin;
Ch'el gh'ha in bocca i pur gingiv,
Per ganass el gh'ha duu boeucc,
L' è l' Inverno positiv,
Mascarpent, impastaa i oeucc,
No cerchell in olter loeugh,
Che l' è là regneccaa al foeugh.
E costù giuradiana,
Senza spiret nè calor,
L' ha sposaa on' oltra veggiana,
Che a dì pocch, che a fagh onor
L' è tre voeult pesg del ritratt
De la serva de Pilatt.
Che piasè a vedej là soll
A disnà sti duu moros,
A scerniss vun l'oltr' el moll
Pussee tener e mostos,
E masnall on mezz quart d' ora
Per podell mandà giò in gora!
Me figuri i pitanzinn
Ch' el prim dì gh' avaran faa,
Saran staa tutt moresinn
de bev su cont el cugiaa,
Perchè a lor la roba dura
La ghe fa troppa paura.
Polt e latt o ris ben cott,
Mascarpon, tortin, ma rar,
Oeuv de bev, gioncad, pancott
Hin i sò pitanz pu car;
E a gran stent biassen in fin
Ona fetta de stracchin.
E talment el sangu ghe buj
A sti spos, che s'hin in lecc
In d' on dì pu cold de luj
Ancamò geren del frecc:
Ponn scusà sti duu soggett
Per el giazz de fà i sorbett.
Malappenna han smorzaa el ciar,
Fan de prim e de segond
Con la toss e col gatar,
Vun dà su, l' olter respond;
Con sta sort chì d' armonia
Pensee mò che sinfonia.
Me rincress domà ona cossa,
Che la voeuren durà pocch,
Perchè hin già col pè in la fossa,
Già la mort la gh' ha daa el cocch,
E Caront l' è già de scià
Col barchett per menaj là.
Car amor, lassetel dì, ecc.
Da "Collezione delle migliori opere scritte in dialetto milanese", vol. X
Milano, presso Giovanni Pirotta, 1816