Statuds Kadema pelonöl fa Kongef

1. - Kadem jäfom te lefulami e menodami glamata e vödabuka Datuvala.
2. - Kadem binom löpef lebalik in säks pükik.
3. - Kademals paväloms bevü volapükels sikikün länas difik tala.
4. - In län alik kademals so mödik kanoms pavälön äs län labom lödelis balsbalion; dilanum de balsbalion pakalom äs balsbalion.
5. - Län alik olabom numi nomik kademalas, te ven volapük pupakom säto in om.
6. - Num at okanom pamödön sesumiko gönü pösods vemo melidlik.
7. - Välam kademalas jenom sukü mob dilekela e dubü mödanum vögodelas.
8. - Dilekel kadema sötom mobön as kademalis pösodis kels pemoboms ome fa klubs läna tefik.
9. - If klubs moboms pösodi nonik, ünü muls tels, u if klub nonik sibinom, dilekel välom steifali.
10. - Calüp kademalas dulom yels lul; denuvälam binom pedalöl.
11. - Kadem pagovom fa dilekef pefomol dubü:

    a) Datuval.

    b) Dilekel.

    c) Disadilekel.

    d) Penädans tel.

12. - Dilekel e Disadilekel paväloms fa kademals plo yels lul. Kanoms pavälön denu.
13. - Mödanum teik vögodelas sludom.
14. - If nums vögodas plo e ta binoms leigik, vögod dilekela sludom.
15. - Sluds kadema sötoms pabisiadön foviko Datuvale.

    If Datuval no etapükom sludis kadema pos dels kils, binoms levöladlik.

    Sluds, kels no pebeloboms fa Datuval, pobisiadoms denu kademe e ovedoms levöladlik, te na pulensumoms fa mödanum kildilas tel.

16. - Sluds kadema papüboms volapüko in calabled kadema; at pavälom fa kadem.
17. - Dilekel sötom bisiadön kademe mobi alik, pedisapenöl fa kademals mäl.
18. - Kademal, kel nevilom lobedön sludis levöladlik mödanuma, u kel enevilom, du yel bal e nen kod gitik, dilsumön vobis kadema, efinom binön kademal. Dilekel sötom mobön dismiti omik.
19. - Dismit kademala pasludom fa mödanum kildilas tel vögodelas.
20. - Kademal alik pelom yelamoni de frans 10, jü kadem olabom monamedis zesüdik.

    Dilekel kadema sludom liko mon at pogebom. Bal penädanas binom kädel kadema.

21. - Statuds at kanoms pavotön te fa kongef bevünetik.

Slud Kongefa tefü glamat.

Kongef no elabom timi bepükön nomis glamata, ab esludom das Glamat nomik balik, se kel valikos nezesüdik pedejafos, osötom palautön lesuno fa kademalef.

Penädan Kongefa
Paul Champ-Rigot.

NOTED. - Nunod kuladik e detülik dö Kongef popübom suno.

Se Nunal 1889, Nüm: 5, Pad: 7.