Spod Volapükik (2)

From Wikisource
Jump to navigation Jump to search

Evüdobs in nüm balid vpaspodelis, klubön okis nen konsidam paleta sembal, vedöl kopanals spodöl vpakluba Hannover, pöfüdü oms it ä pöfüdü pak vapükadöla. Beginot obsik peläsevom vemo fa uts valik, kels epenoms obes demü atos. If deno num elänotölas jünu binom nog ze smalik, cedobs, das kod atosa mutom pato patuvön in num valiko no gletik vpaspodelas ä, das mödiks dledoms ba demü atos, paböladön tuvemo dub spods. Dled at binom klu nezesüdik. Zu kopanals spodöl laboms visü klub te bligi, gepükön balna te alikane pelisedöl in gased at e täno denesiön spodami fovik. No valiks egeboms spodaleodi. Deno cedobs omi as ze plagik, bi uts, kels vipoms spodön demü kods u diseins ot, orivoms so vifiküno dafulami vipas oksik. Sosus stitam pejaföl fa obs gönü spod vpk pogebom plagiko, no dotobs, das olesevon suno nog umo pöfüdis klubama somik e das vpaspodels valik, kels vipoms fefiko paki vapükadöla, olätlidoms sunüno. Täno obinos fa i mögik, blöfön velato pöfüdi plagik vapüka, bi kanons getön atoso fetanis bevünetik sefik dub lenadam te püka bal bevünetik nebü motapük.


Spod vpk egestepom vemo in yels lätik, bi mödiks efinoms spodön, bi no egetoms gepükis, sägo pecütoms sotimo a.s. tefü tök potamäkas e.l. Sikod flagobs de kopanals spodöl obas, das no te dafuloms bligis kol klub, sod i bligamis ut, kelis elovesumoms de spodels votik. Ab obs bömetobs i kopanales obsik, bitön jalepiko, äs esagobs i ya in nüm balid, ta uts, kels no udunoms ma bligs pelovesumöl. So flagobs konfidi rezipik.


Ogivobs lisedi balid utas, kels elätlidoms klube obsik as kopanals spodöl jü lulul 20, tö in nüm suköl, bi no nog ekanobs getön gepükis de valöpo. Spelobs i füdo bepükön kuladinis spoda bevünetik in bled obsik. Zu desänobs, bükön finü yel at u beginü suköl lisedi kolagöl vpaspodelas valik, kel posedom glato efe te kopanales spodöl obsik, if num atas obinom luüno 100. Spodels valik yufomsös alos, lätlidöl it klubame e komedöl omi!




Se Volapük: Gased al pakam Volapüka 1894, Nüm: 2, Pad: 3.