Spod Volapükik (1)

From Wikisource
Jump to navigation Jump to search

Spod me vp binom med gudikün al pakön vpi. Binos beno pesevik vpatidele alik, das julans oma evedoms e ebliboms vpans plobik, if ebeginoms spodön boso. Liedo pöfüd at no pakapälom säto fa vpans mödik, äs plons mödik demü negepükam spodotas vpk blöfoms. Al menodön stadi at, vipobs jafön stitami patik plo spodels vpa, kel, äs spelobs, pobeglidom gäliküno fa oms. Ab nog kod votik vemo veütik ekodedom obis alos: Vipobs pladön vpaspodi nog umo ka jünu in dün pakama vpa. Atos porivos in mod suköl:


Suflagobs vpaspodelis valik, vedön kopanals spodöl vpakluba Hannover, kels laboms bligis at:


I. pelön läpoloti yelsik de mak 1.50.
II. sedön (pesuflagöl u no) bal- u telna a yel klube nunodi smalik (me potakad u pened) dö pak vpa in län, top... omas u defü atos nunis nitedik votik dö län e ninlödans, ted e dustod läna omsik...
III. gepükön luüno balna, if gepük podemanom, e mögiküno suno spodele alik votik, kel pelasumom in lised vpaspodelas popüböl in klubanogan (Ye gepük at dalom binön nesiöl tefü spod fovik.)


Gits kopanalas spodöl binoms:


I. getön glato klubagasedi.
II. palasumön in ladetalised vpaspodelas.
III. kanön demanön luüno balna gepüki fa vpaspodel alik votik pelisedöl.


Kel no befulom kuladiko bligis pelonöl, i kel no egepükom du yel bal segun stips, finom binön kopanal spodöl kluba obsik spet. paseliunom se lised vpaspodelas. (Natiko i kopanals leodik e födöl kluba obsik kanoms paninpenön in lised at ma vip, if viloms dafulön stipi tefik.)


Al nefikulön e mekön pöfüdik e plagik spodamelaki plo dilsumels, spodaleod at pelonom büfuiko:


I. Spodam al lenadam gudikum e plägam vpa.
II. Spodam dö kudadins vpa (pak vpa, setök niludamas dö menodam vpa, dö vapük valiko e vapükasits votik...)
III. Spodam, al tökön e konletön yegis bida semkimik, al getön tökaflenis su tal lölik, plo nolals... al getön sukotis loegamas nolavik.
IV. Spodam diseinü setök penedik tikas se kods votik dölik u plagik, dö nolavs e lekans, ted e dustod, literat, püks, foginik...
V. Spodam al givön e getön danotis e lenunis, pato i tedik.
Noted: Tefü III konletels nunomsös blefo, yegis kiom konletoms.
  „   IV noets kuladikum kanoms leigo pagivön ab blefo.

Spodel alik kanom välön dedilotis bal, mödumik u valik, in kels vipom spodön. Nüms dedilotas pevälöl äs i noets baik kuladikum pobükoms nebü ladets.


Vpaspodel alik olesevom it, pöfüdis kiom stitam somik e lätlid in om ogevom ome. Ab vpan alik olesevom i, medi bizugik kiom plo pakam vpa olabobs me om. Kanobs blöfön vole, das nolön vpi blinom pöfüdi alikane. Ifi at obinom natiko begino ze smalik, ogetom völadi gletikum, sosus klubam at uvedom bevünetik e num kopanalas eglofom vemo. Mutobs nu loveletön vpanes, va viloms gebön e volekön stitami at. Spelobs füdo, kanön menodön nog vemo omi.




Se Volapük: Gased al pakam Volapüka 1894, Nüm: 1, Pads: 3-5.