Spinalolil
Äbinos vöno reg e jireg, kels äsagoms vädelo: “Ag! if älabobs-la cili!„ ab no ägetoms omi. Äjenos nu, ven jireg äsiedof sembalna in ban, das frog älumufom oki se vat al län e äsagom ofe: “vip olik podafulom; omotol jipuli, büfo yel bal ufegolom„.
Äjenos kelosi frog isagom e jireg ämotof jipuli, kel äbinof so jönik, das reg sukü gäl gletik ästitamom zäli magifik. Ävüdom al zäl no te palefelis, flenis e pesevelis, ab i feofis sapik, dat binofs keinik cile e jelofs ofi.
Äbinofs feofs balsekil in kinän oma, ab bal ofas ämutof blibön domo, bi reg älabom te smabovis balsetel golüdik, dub kels äsötofs fidön. Zäl päzälom ko magif gletik, e ven päfinom, feofs älegivofs legivotis milagik cile: jibalim tugi, jivotim jöni, jikilidel liegi, in vöd bal: valikosi, kelos binos digik pavipön in vol at.
Ven feofs balsebal isagofs pükedis ofik, jibalsekilidel änütlidof süpito. Ävilof vinditön, das no pivüdof, e sikod ävokof me vög kleilik, nen glidön u lenlogön oki: “Jipul regik at sötof spinön oki me spulaluib e deilön sukü atos, ven obinof balselulayelik„. E älüvof säli, nen pükön nog vödi bal. Valiks äbinoms pejeköl; ab nu feof balsetelid äbitlidof, kel no nog ipükof pükedi ofik, e äsagof, bi no äkanof nosön vipi badik at, ab te meiladön omi: “Ab jipul regik no sötof deilön, ab te slipön tels tum nen dagalön„.
Reg, kel ävilom jelön cili löfik oka ta neläb so gletik, äbüdom, das spulads valik kinäna pajedomsöd in fil. Ab legivots feofas pädafuloms jipule, ibo äbinof so jönik, südik, flenik e kapälik, das alim, kel älogom ofi, ämutom i löfön ofi.
In del ot, in kel jipul ävedof balselulayelik, reg e jireg no äbinoms domo, e jipul ägeblibof löliko soalik in ledom. Äzigolof is vätopo, älelogof uläliko cemis e smacemis segun desid e äkömof fino al tüm sembal bäledik, keli nevelo jünu ilogof. Äsusüxänof flekaslebi nabik e äkömof al yanil. Kik pelelaxüdöl äbinom in kikam, e ven ägeflekom omi, yan ämnifom oki vifo, e vom bäledik äsiedof is in cem smalik e äspulof dutiko flägi. “Deli gudik, motil bäledik,„ regajipul äsagof; “kisi mekol?„ “Spulob„, jibäledikel äsagof e äglidof me kap. “Kis binos atos, kelos zibunos so yofiko?„ jipul äsagof, äsumof spuladi, e ävilof leigo spulön. Ab in timül ot, in kel äfinedom[1] spuladi, püked magügik pädafulom, e äspinof finedi okik.
Togo ko senam dola äfalof su bed, kel ästanom us, e äseistof in slip netupik. E slip at äpakom oki ove ledom lölik: reg e jireg, kels ikömoms ebo domo e inütlidoms in säl, ädisoms dono e pädasumoms fa slip e ko oms kutels valik. Nu äslipoms i jevals in jevalöp, dogs in yad, pejins su nuf, flitafs len völ, sägo fil, kel ämufom oki su filatop, ävedom stilik e pädasumom fa slip, e mit paloetöl äfinom bösetön, e kukel, kel ävilom zugön helis kukadünela, bi at ibinom neskilik, äletom bäfalön nami e äslipom. E vien äzedom e bledil nonik ämufom oki su bims bifü ledom.
Ab zi ledom spinaput äbeginom glofön kel ävedom geilikum in yel alik e äzümom fino ledomi lölik e äglofom ovü om, so das nos en äkanos fälo palogön, nena stän su nuf.
Ab äkanon in län lusagi dö Spinalolil jönik slipöl, ibo so regajipul pänemof, so das regasons äkömoms sotimo e äviloms dlanön in ledom da put. Ab töb alik äbinom vanlik, ibo spins äkolagoms fimiko, äsif älaboms-la namis, e yunels pätönoms fa oms, no äkanoms livön okis e ämutoms deilön yamiko.
Pos yels mödik regason sembal äkömom in län e älilom, vio man bäledik äkonom dö spinaput, das ledom binom po om, in kel regajison milagiko jönik, penemöl Spinalolil, slipof sis yelatum, e das reg e jireg e kutels valik slipoms ko of. Bäledikel änolom i flanü fatel oka, das regasons mödik ekömoms ya e eblüfms dlanön da spinaput at, ab das valiks petönoms fa spins e emutoms deilön yamiko. Yunel äsagom nu: “No dledob; vilob golön us e logön Spinalolili jönik„. Bäledan gudik äkonsälom ome, no dunön osi, ab regason no ävilom lilön vödis at.
Ab yels tum et ifegoloms lenu, e del ikömom, in kel Spinalolil äsötof dagalön denu.
Ven regason änilom oki pute, at äkositom te dub flols jönik e gletik, kels äfagoms okis itiko balvoto e äletoms omi nütlidön nen däm alik: po om äkoyumoms okis denu äs put. Älogom in ledomayad jevalis e yagadogis vielik seistön e slipön. Su nuf pejins äsiedoms, e kapils oma äbinoms pestegöl dis flitads. E ven äkömom in dom, flitafs äslipoms su völ, nam kukela in kuk äbinom nog petovöl, äsif ävilom-la dagleipön kukadüneli, e jidünan äsiedof bifü jigok blägik, kele peneds äsötoms pasezugön. Nu ägolom bivedo e älogom kutelis valik seistön e slipön in säl, e löpo lä tlon reg e jireg äseistoms. Nu ägolom nog bivedo, e fino äkömom al tüm e ämanifom yani cema smalik, in kel Spinalolil äslipof. Is äseistof e äbinof so jönik, das regason no äkanom deflekön logis, no äkanom nedunön osi: äkidom jipuli.
In timil ot Spinalolil ädagalof sukü kid at, ämanifof logis e älelogof vemo fleniko regasoni. Tän ägoloms kobo diso, e reg ädagalom e jireg e kutels valik i, e älelogoms balvoto vemo stunöl. E jevals in yad ädagaloms e ämufoms okis, yagadogs äbunoms e ämufoms göbis; pejins su nuf äsüzugoms kapilis disü flitads, äzilogoms e äflitoms in feil, flitafs su völ älugoloms bivedo; fil in kuk äsustanom, ämufom oki e äkukom fidi: mit paloetöl äbösetom denu e kukel älilaflapom düneli so das at äluvokom e jidünan äsezugom lemäni penas jigoke. E matazäl regasona ko Spinalolil päzälom nu vemo magifiko, e älifoms gälodiko, jü lifafin omas.
NOETS. (Vükifonät)
- ↑ Bükapök; pla: äfinedof.
Leigo: Se Volapükabled Tälik 1888, Nüm: 8, Pads: 58-60.