Sora l'ignoranza
Jump to navigation
Jump to search
Domenegh Balestree (1714-1780)
Sora l'ignoranza
De ignoranza ghe n'è propri a balocch
e, per quistalla, no ghe va sudor;
e l'è per quest ch'en vedem minga pocch
che la cobbien col titol de dottor.
La tacca l'ignoranza e sciori e sbiocch;
ma, in di sciori, la troeuva di impostor
ch'hin marzocch, e no passen per marzocch
mediant i fed fals di adulator.
Gh'è l'ignoranza, che la se pò dì
de sò pè; gh'è poeù l'oltra, de chi lassa
mal coltivaa on talent ch'el pò fruttì.
Ma via, d'on cert epitet, tuttcoss passa!
El mè brusor de stomegh, l'è a sentì
quella che ciamen ignoranza grassa!