Solitatium miseris...
Jump to navigation
Jump to search
Ferdinando Fontana (1850-1901)
Solitatium miseris...
El névica da on'ora a la pù bella;
l'è de Gnnar, de sira, vers i sett.
Sul Cors, involtïaa in la soa mantella,
el Trentanœuv l'è sù, inciodáa a cassett.
De sbalz, per voltà giò in la Passarella,
tra el brumm e el mur, corrend, passa on fiolett
caporal de cusina, ch'el barbella
in del sò vestii bianch, sgonfi d'apprett.
El va a comprà on quej etto de formagg;
e, a vedell inscì bianch, col frecc che fà,
lù, semper ai fornèj, el mett el scagg!
Ma el brumista el se sent a consolà;
e, quand l'è atir, el le saluda inscì:
"Ciao, voj, guss d'œuv!... Ti te stée pesg de mì!"