Si'm fos Amors de jòi donar tan larga

by Arnaut Daniel

Si'm fos Amors de jòi donar tan larga by Arnaut Daniel

Si’m fos Amors de jòi donar tan larga
Com ieu vas lieis d’aver fin còr e franc,
Ja per gran ben no’m calgra far embarc,
Qu’èr am tan aut que’l pes mi poj’ e’m tomba,
Mas quand m’albir com es de prètz al som
Mout me’n am mais car anc l’ausièi voler,
Qu’aras sai ieu que mos còrs e mos sens
Mi faràn far, lor grat, rica conquèsta.

Pero s’ieu fatz lonc esper, non m’embarga
Qu’en tan ric luòc me sui mes e m’estanc
Qu’ab sos bèls dichs mi tengra de jòi larg
E segrai tant qu’òm mi pòrt a la tomba,
Qu’ieu non sui ges cel que lais aur per plom ;
E pòis en lieis no’s tanh que ren esmer,
Tant li serai fins et obedïens
Tro de s’amor, si’lh platz, baisant m’envèsta.

Us bons respieitz mi revén e’m descarga
D’un doutz desir don mi dòlon li flanc,
Car en patz prenc l’afan e’l sofr’ e’l par
Pòis de beutat son las autras en comba,
Que la gençor par qu’aja pres un tom
Plus bas de lieis, qui la ve, et es ver :
Que tuch bon aip, prètz e sabers e sens
Rènhon ab lieis, qu’uns non es mens ni’n rèsta.

E pòis tant val, no’us cugetz que s’esparga
Mos ferms volers ni que’s forc i que’s branc
Car non serai sieus ni mieus si me’n parc,
Per cel Senhor que’s mostrèt en colomba,
Que’l mond non a òme de negun nom
Tant desirès gran benanans’ aver
Com fatz ieu lieis, e tenc a noncalens
Los enojós cui dams d’Amor es fèsta.

Na Mielhs-de-Ben, ja ni’m siatz avarga,
Qu’en vòstr’ amor me trobaretz tot blanc,
Qu’ieu non ai còr ni poder que’m descarc
Del ferm voler que non es de retomba ;
Que quand m’esvelh ni clau los uòlhs de som
A vos m’autrei, quand lèu ni vau jaser ;
E no’us cugetz que’s merme mos talens,
Non farà ges, qu’ara’l sent en la tèsta.

Fals lausengièr, fuòcs las lengas vos arga
E que perdatz ambs los uolhs de mal cranc,
Que per vos son estrach cavalh e marc :
Amor toletz, qu’ab pauc del tot non tomba ;
Confonda’us Dieus que ja non sapchatz com,
Que’us fatz als druts maldire e viltener ;
Malastres es que’us ten, desconoissens,
Que pejor ètz, qui plus vos amonèsta.

Arnautz a faits e farà longs atens,
Qu’atendent fai pros òm rica conquèsta.