Serbski hospodař

nadpis	Serbski hospodař
awtor	Jakub Bart-Ćišinski
lěto
žórło	http://texty.citanka.cz/
licenca	public domain
nota	stary prawopis, Wysk a stysk.

    Tej roli, w kotrejž płodźa waše płuhi
    Khlěb nětko nam a haja naše byće,
    Serb dołho dawał z potom tuk a tyće,
    Kładł do njej' přeća, zdychi, sylzy, tuhi.

    Wón ze krwju macał wašich polow smuhi
    A hnojił z kosćemi. A toho kryće
    Te pola su, štož było wótcow chcyće,
    Pjeršć swjata waše pola, łuki, łuhi.

    Dźerž rolu sej, haj wótcow wotkaz swjaty,
    Česć štož sy namrěł ze krwju wot pradźěda,
    Budź serbski rólnik wot hłowy do pjaty!
    Hdźež w bědźe dźěłał Serb a w smjertnej nuzy
    Tu rolu sej, a nam a dźěćom běda,
    Hdyž płuh jow zastajił by hdy so cuzy!