Serbska lipa

nadpis	Serbska lipa
awtor	Jakub Buk
lěto
žórło	http://texty.citanka.cz/
licenca	public domain
nota	stary prawopis, Hórnikowa Čitanka.

    Radosćiwa widźi lipku młodu
    Maćeř Sława w zemi serbowskej,
    Kotruž we lubosći bratrowskej
    Sadźichu tam synojo jej' rodu;

    Žadosćiwa čaka zažnoh' kwěća
    K zbožu swojoh' luda serbowskoh',
    Nadźěja so ducha wótcowskoh',
    Kiž by Serbstwu wróćił rjeńše lěća.

    Duž dha, lubi bratřa, z horliwosću
    Serbsku lipu hajmy, pěstońmy,
    Zo by rjana kćěła z płódniwosću.
    Ha, za narodnosć a wěrne zbože
    Swojoh' luda mócnje postańmy:
    Njeminje nas žohnowanje bože!