Se mebs kleudana
Ebinob adelo lä rodagenal. Ämekom vokön obi pos levitim. Binom man fefik, jalepik, kel palestimom fa pädels e in zümöp, demü tugs omik. Sagon, das ibinom gö lejekik, du volut flentik, in yun omik. Epönitöl dibiko ägolom in kleud, na Napléon I ivedom limep. Nu binom bäledik, ab bal d euts, keli tim kanom blegön ab no blekön. Logs omik nidoms nog; bäledanalogod neledik no epölüdom nämi manik, ed äbekipom diniti ut, kel ya vöno äbinom lönik ome.
Binom ruin, ab sümöl ruine levikodaboba, kele yel alik mosumom dili sembal deka; ab kel no pölüdom fomi okik, e kel blöfom jü del latik, das pälblinom fame.
“ Bloda, eko peneds plo ol „, bäledan äsagom ed ägivom obe penedis tel, balim fata obik, votim flena sembal. “ Id ob egetob penedi de fat olik; dabegom oli gekömön al dom; gololös! „
Stunöl älogedob omi. “ Also li-vilol mofön obi se dom at? „ äsagob fino. “ Esükob mönis at, as takedapladi, kikod vilol semofön obi? „
“ Mofön oli! „ äsagom takediko. “ Dom Söla aibinom manifik, ed obe, dünel omik, no lönom fagön se at e semofön neläbeli, kel in ot sükom takedapladi, äso vön ob it. Vilob te monedön oli. Tikolös, das lib aizesüdom al binön läbik, e das binol tu yunik al kanön klemön ati! Tikolös, das timile at, du kel juitol vonis geilikün vila libik ola, yels lonedik dünelefa oisukoms, du kels ponedalos ole labön vili sembal! Tikolös, das tims okömoms, du kels, ebäledöl, onekapälol dolis yuna e ba oneläbadol desini olik, kel älapinom gälis so mödik ole! „
“ Elentikob atosi valik. „
“ Pükol vodi pleidik! „ bäledan äsagom sofiko, “ e sepükon atosi in mod at, te in bäled olik! Kanol desinön liko obumol domi olik, dat binom-la dulik, e gevom-la jelöpi sefik ole; ab no kanol bülogön füdatimi! „
“ Nu tän läbadolös fäti obik! „ äsagob pedagleipöl dibiko, “ ibo elüvob voli at, kel äbinom in tapükam ko stäbasiäm lana obik! Ibo äkanob savön obi se vol, kel ästenom fekis sanikün lada obik, jüs naud äidasumom fino obi it! „.
“ Li-klödol, das men vedom gudikum e läbikum in kleud? „ bäledan äpükom; “ logedolös obi! O no klödolös osi! Lied limödik sibinom in möns at, mens plö is no blesenoms. Vuns päsanoms ba nonikele ladas liedöl mödik, sesumü utes, kels päsepoms in godafeil! Te läbikel kanom klemön voli, e binom somik in kleud te ut kel labom lani klödafulik. Godatik gletik binom äs sol, fulöl valikosi dub lit e vamöl valikosi dub stals omik. Ut kel sükom liti, otuvom omi in jafam vätopo; ab pa ute, kel lüodom nemedamo logedi su otosi! Blibom in daeg, ko logs pedableinöl. O klödolös obi: mens lödoms mönis at, kels esufoms tomis somik! Klödolös obi, kanon tuvön tlodi i su tal, kanon tuvön omi, pos lieds gletik e fikulik, i nen sepölön oki in mönis kleuda! - Vol lölik binom ruin magifik, keli tim eveadom. Lif menik obas binom leigik. Gäls binoms te flolaveads dub kels tim eveadom vunis, ebludöl vöno, lada obsik. „
“ E no li-klödol „ äsäkob bäledani “ i glifis nesanamik? „
“ No klödob osi „, bäledan äpükom loviko. “ Dol alik binom golenik. Falo dol sembal sibinom, kel dulom lonedo, jenos also, bi obs it enulüdobs oti „.
“ Nepölol! „ äsagob bäledane “ e nepölol tefü mödug menas; ab mens sibinoms, kelis God ejafom dub stöf votik, al neläb de oms it! „
“ Binol bal bevü ets, novo-li? „ äsagom smülöl lügiko. “ Kim no etikom atosi, balna, in lifüp okik? Kim no elabom pölüdis negüvik, e löfi tenalik sembal? Ye, bäledolöd äs ob, e sagolöd tän: kisi lemänos atos valik? - Meb lügik, kel pubom süpito in lad olik, e kel mufom lipis olik al smül biedik! Binol is, äs pledel sembal, kel ästebom du neit valik len tab glünik. - Ven obinol bäledan ostanol len tab lifa. Äbinol läbik, e neläbik. Ofen epöfüdol ed ofen epölüdol; ab limödna e dub kads kimik? Säto! Epledol, e nu golol ba al taked. - Klödolös obe, meb nonik sibinom kela no fögeton, ko tim, dili biedikün. „.
“ Falo binos also „, äsagob, “kikod no sötob blibön in kleud, al fögetön fegolugi, e plesefön ladi obikse dols nulik?„
“ Bi no fögeton so nefikuliko in kleud „, äpükom seiföl. “ Nu, blodal, gololös in ziöbi olik, lilädolös penedis e süenolös beno desäni olik! Blibolös in kleud du blufayel bal, e ven, tim at ufegolom, tän odenusäkob oli, e falo vil olik no uvotomok, obinol vekömel bevü obs „.
Lovepolam fa NEYMON VITTORIO.
Se Volapükabled Tälik 1888, Nüm: 6, Pads: 42-43.