Se̿ng-géng/Mǎ-tuo̿i Hŭ-éng/2
[ 7 ]
Di̿ 2 Cióng.
- Hí-lṳ̆ ca̿ uâng gâ̤ sî-hē, Iǎ-Sú da̿u Iǔ-tuo̿i gâ̤ Bă-lī-ǎing chṳ̆-si̿, iŏ̤ng-cì-sî iǔ gǐ-ciă bŏ̤-sū giǎng dóng-bíng lâ̤ Iǎ-lū-să-lǎing.
- Mōng uā, Ŭ cì-ciă ka̿ing chṳ̆-si̿, ca̿ Iǔ-tuo̿i nêng gâ̤ Uâng da̿u nī-di̿, éng-ṳē uòi-huo̿i-nêng da̿u dóng-bíng chū-gi̿ng gṳ̀ gâ̤ sáing-siu̿, ciū lâ̤ ba̿i gṳ̀.
- Hí-lṳ̆ uâng tia̿ng-nī-gi̿ng, ciū huáng kǐ lâ̤, tóng Iǎ-lū-să-lǎing gâ̤ nêng iǎ dú huáng kǐ lâ̤.
- Hí-lṳ̆ ciū hǎng duōi ci̿-sí iáu bă-sia̿ng dǐ-bíng gâ̤ nāng-sṳ́ nêng, dú giǎng-ce̿ng lâ̤, mōng gṳ̀, uā, Gí-Dŭ e̿ng-gái da̿u nī-di̿ chṳ̆-si̿?
- Duōi-gá-nêng a̿ing uā, E̿ng-gái da̿u Iǔ-tuo̿i gâ̤ Bă-lī-ǎing chṳ̆-si̿: éng-ṳē tê-chîng iǔ ciă síng-dí gi̿-diū uā-gua̿,
- Iǔ-tuo̿i gâ̤ Bă-lī-ǎing à, nì da̿u Iǔ-tuo̿i gâ̤ hǔ-gṳ̄ing dǐ-bíng cǒng ēng sī děng siǎu gâ̤; éng-ṳē hē-lǎi iǔ cì-ciă uǎng-di̿ ŏ̤ giǎng nì ŭ-di̿ chṳ̆ lâ̤, su̿-siōng ia̿ng-iông gâ̤, ia̿ng uòi Ì-să̤-liĕ gâ̤ bă-sia̿ng.
- Hí-lṳ̆ ciū càng-càng-di̿ hǎng bŏ̤-sū lâ̤, cǔ-sa̿i mōng gṳ̀, ŭ sáing-siu̿ sū-mū sî-hē chṳ̆-hīng.
- Ciū hǎng gṳ̀ ko̤̿ Bă-lī-ǎing, iáu gṳ̀ uā, Nì ko̤̿ cǔ-sa̿i cǎ ŭ gṳ̌ing-ciě, cǎ-diō̤, ciū lâ̤ iáu uòi ba̿u-se̿ng, nă uòi iǎ hǎu ko̤̿ ba̿i gṳ̀.
- Bŏ̤-sŭ tia̿ng-nī uâng gáu-dō gṳ̀ gâ̤ dī làu, ciū ko̤̿; tê-chîng da̿u dóng-bíng chū-gi̿ng gâ̤ sáing-siu̿ sáng-bŭ-lěng-děng da̿u gṳ̀ mīng-chîng duo̿i diō̤, cì-dā̤ duo̿i da̿u gṳ̌ing-ciě gâ̤ sù-cài, ciū gṳè-diū da̿u ŭ sù-cài ciōng-bíng.
- Bŏ̤-sū chū-gi̿ng ŭ ciă sáing-siu̿, ciū cèng ka̿u-uòi dă̤-hǎing.
- Nì ŭ chio̤̿-di̿ chū-gi̿ng gṳ̌ing-ciě iáu gṳ̀ gâ̤ nâi, Mǎ-lī-ngā, ciū gṳ̄-diū ba̿i iŏ̤ng gṳ̌ing-ciě; mà-kṳé bǎu hō̤, nà uâng-géng, ṳ̌-hióng, mò-iò̤, iŏ̤ng gǐ-iōng gâ̤ i̿ng-sū so̿ng gṳ̀.
- Bŏ̤-sū buǒi mêng-mōng Cṳ̌ háu gṳ̀ ēng niōng da̿u-tê [ 8 ]ko̤̿ gi̿ng Hí-lṳ̆, gṳ̀ ciū giǎng biē gâ̤ diō̤ chio̤̿ ko̤̿ cù-cī gâ̤ dī-huó̤ng.
- ¶ Bŏ̤-sū ko̤̿-tiāu làu, Cṳ̌ sǎ̤-chṳ̿ gâ̤ lâ̤ tŏ̤ mōng iáu Iŏ̤-să̤ uā, Kǐ lâ̤ duo̿i-diū gṳ̌ing-ciě, iáu gṳ̌ing-ciě gâ̤ nǎi cě ko̤̿ Ái-gĭ gŏ, da̿u ŭ-di̿ gṳè-diū, dǎing da̿u uòi cuo̿i háu nì; éng-ṳē Hí-lṳ̆ ŏ̤ lāu iŏ̤ng gṳ̌ing-ciě o̿ miè-tiāu gṳ̀.
- Iŏ̤-să̤ ciū kǐ lâ̤ duo̿i-diū gṳ̌ing-ciě iáu gṳ̀ gâ̤ nǎi te̿ mâng ko̤̿ Ái-gĭ gŏ-di̿ ko̤̿.
- Da̿u ŭ-di̿ gṳè-diū cì-bĭ-dā̤ da̿u Hí-lṳ̆ sǐ gâ̤ sî-hē; iŏ̤ng-gă̤-sĭ sī niōng gi̿ng-hāu Cṳ̌ tê-chîng tŏ̤ síng-dí uā-gua̿ gâ̤ dī, gō̤-uā, Uòi cě̤ng-chîng hǎng uòi gṳ̌ing chṳ̆ Ái-gĭ gŏ.
- Iŏ̤ng-cì-sî Hí-lṳ̆ hiǎu-dă̤ cù-cī sī nă bŏ̤-sū pi̿ng, ciū cèng hǒ-lă, hǎng nêng ko̤̿ Bă-lī-ǎing, nà sêng-dǐ iáu gǒ̤ng-lǒ̤ng-kṳ́ing gâ̤ diōng-mǔ-gṳ̌ing-ciě, giǎng gṳ̀ cǔ-sa̿i mōng bŏ̤-sū gâ̤ sî-hē so̤̿ng kǐ, hō̤-diō̤ liòng-hṳe̿-di̿ gâ̤, cǒng-bǎ nà lâ̤ suŏi-tiāu.
- Síng-dí Iǎ-lī-mì tê-chîng uā-gua̿ gâ̤ dī, iŏ̤ng-cì-sî iǔ gi̿ng-hāu,
- Gṳ̀ uā, Da̿u Là-mǎ tia̿ng-nī-gi̿ng sióng-séng, tî-kŭ cháng-che̿ng gâ̤ siáng-éng, sī Là-giĕ tî gṳ̀ gâ̤ gṳ̌ing; ēng kǎing tia̿ng-nī nêng kṳ̿ing, éng-ṳē gṳ̀ gṳ̌ing dú ēng-nǎing dō̤-di̿.
- Hí-lṳ̆ sǐ-tiāu làu, Cṳ̌ sǎ̤-chṳ̿ gâ̤ lâ̤ Ái-gĭ gŏ tŏ̤ mōng iáu Iŏ̤-să̤ uā,
- Kǐ lâ̤ duo̿i-diū gṳ̌ing-ciě iáu gṳ̀ gâ̤ nǎi da̿u-tê ko̤̿ Ì-să̤-liĕ dī-huó̤ng; éng-ṳē ŭ ciă o̿ huōi-sǐ gṳ̌ing-ciě gâ̤ nêng sǐ-tiāu làu.
- Iŏ̤-să̤ ciū kǐ lâ̤ duo̿i-diū gṳ̌ing-ciě iáu gṳ̀ gâ̤ nǎi, lâ̤ Ì-să̤-liĕ dī-huó̤ng.
- Tia̿ng-nī-gi̿ng Ngā-gí-lǎu ciĕ-diū gṳ̀ dá Hí-lṳ̆ gâ̤ ṳ̄, ca̿ Iǔ-tuo̿i gâ̤ uâng, ciū giáng ko̤̿ gṳ̀ ŭ-di̿, Cṳ̌ tŏ̤ mōng háu gṳ̀, gṳ̀ ciū ko̤̿ Gá-lī-lī dī-huó̤ng.
- Da̿u cì-ciă sêng, miâng hǎng Nà-să-là̤, ciū da̿u ŭ-di̿ gṳè-diū: iŏ̤ng-gă̤-sĭ sī niōng gi̿ng-ha̿u ŭ ciă síng-dí tê-chîng uā gua̿ gâ̤ dī, Nêng ŏ̤ hǎng gṳ̀ ca̿ Nà-să-là̤ gâ̤ nêng.