Scusandosi colla figlia
Carlo Maria Magg (1630-1699)
Scusandosi colla figlia
Scusandosi colla figlia per un regalo fattole di pere poco belle
Ve domandi perdonanza
di per brusch e gibollaa!
Se i vedeva mì d'impruma
i avarev faa buttà via!
Ve segur che la me fuma
e a la sura Annamaria!...
Ma l'è staa mala creanza
del fattor che i ha mandaa!
Ve domandi perdonanza
di per brusch e gibollaa.
El fattor, de sò caprizzi,
l'ha volsuu favv sto favor...
ma l'ha faa senza giudizzi,
chè i massee no hin dottor!
Per el nost Mont de Brianza
galatee no l'è stampaa!
Ve domandi perdonanza
di per brusch e gibollaa.
El massee, quand el se mett
sui creanz di cittadin,
el fa giust come on asnin
quand anch lu el vœur fà i corbett.
El fa rid la vesinanza
coi sò grazi desgarbaa!...
Ve domandi perdonanza
di per brusch e gibollaa.
Quest l'è on per brutt de vedè;
no l'è bon ne cruv nè cœucc;
pur el mostra quell che l'è:
brusch in bocca e brutt ai œucc!
Ma sto mond l'ha on'oltra usanza
fœura el pias, dent el fa maa!
Ve domandi perdonanza
di per brusch e gibollaa.
[...]
Disii pur, cara fiœura,
ai compagn, che n'hootravaj
perchè i veda, in del mangiaj
streng i œucc e spuà fœura!...
Perdonem anch l'arroganza
de fà scus coi scigollaa!
Ve domandi perdonanza
di per brusch e gibollaa.