Sata
Soch ah soch sitn, frah soch ah soch kaaz, mos-ah-boun fi fala. Smadi uuda no waanti go so, uda se fig-chrii no fi gruo widoutn no sap ar waata. Bwaili dong, memba se likl muo frah dis, buot yu ah dem di wuola unu ago ded, ah liklmuo stil, nat iibm yu niem ah rimembrans ago lef. Buk 4, VI
Smadi wa kiah sait tingz ou deh tan nou, kiah penichriet aal wa eba gwaan, ar eba a-go gwaan, far aal tingz a di wan sieh ting; ah wuola dem tan laka deh wan aneda. Meditiet muotaim pah di kanekshan bituix aal tingz ina di wol; ah pah di myuuchal rilieshan wa deh ab wan tu teda. Far aal tingz komiin laka deh foulop ah mixop ina deh wan aneda, da so komz deh grii. Faa wan ting kansikuent pah di neda, bai luokal muoshan, bai nachral paadna ah griiment, ah bai sobstanshal yuunian, ar ridokshan a di wuola sobstans ina wan. Buk 6, XXXIV
Wasoeba smadi waah du ar se, yu fi tan gud; no fi henibadi hels siek, bot fi fiyu uona niecha siek; laka ef aida guol, ar di hemaral, ar poerpl, shuda eba se tu dehself, Wasoeba smadi waah du ar se, mi mos gwaan stil az emaral, ah mi fi kip mi kola. Buk 7, XII
No bada pen di res a yu die a-tingk bout ada piipl biniz, wen ino rilivant tu di kaman gud, wen iwi enda yu frah du adahels beta wok. No wies yu taim a-tingk wa soertn man a-du, ah fi wa: wa im a-se, ah wa im a-tingk, ah wa im a-lukbout, ah soch ada faasnis ah parangglz, daa wi mek man falalain waakbout lef frah kia, frah prii da paat a ihself wa raitid, ah ina kanchuol. Si tui ina di wuol lain ah kanekshan a yu taatdem, se yu tikia fi blakout wasoeba haigl ah outa-aada: bot espeshal wasoeba faas ah badmain: ah yu fi yuuz yuself fi tingk onggl soch tingz, wa ef a man abasodn ax yu, a wa yu a-tingk bout nou, yu kiah ansa Dis, ah Dat, brait ah buolfies, so das chuu yu taatdem yu shuo se ebriting wid yu kuul ah buonifai; a so smadi fi tan ina sasayati, naa luk fi sprii, nar fi ih ed tek im ina eni wie ataal-ataal: frii frah aal kantenshan, grojful, ah sospishan, ah frah wasoeba hels yu wuda shiem fi kanfes se ide pah yu main. Buk 3, IV