San Giuvanni Decullatu/Atto I
ATTO PRIMO[edit]
Un pubblico cortile di forma quadrata, senza uscita, al quale ai accede da un vicolo sulla destra(1), in fondo.
In fondo, pianterreno, con portoncino in centro, piú la porta di un catodio(2), a sinistra, e un balconcino con loggetta, praticabile, a destra, elevato poco meno di un metro dal suolo. Tra la porta del catodio e il balconcino, fanale a braccio. Fra il balconcino e il portoncino, all'altezza di piú di due metri dal suolo, un'icona(3) di San Giovanni Decollato, a oleografia, ornata di rami di cipresso, ramoscelli di olivo e di palma, fiori di carta ed ostie colorate. A sinistra della porta una gabbia con un merlo, e per terra, sotto il fanale, un deschetto da calzolaio, coi relativi ferri e oggetti del mestiere, uno scanno e una vecchia sedia ingombra di forme e di scarpe vecchie, nonché di un'unghia di bove con colla d'amido.
A destra della scena, pianterreno con due catodii e tra le porte di questi una cordicella con panni stesi. Fra il pianterreno e il fondale, il vicolo di accesso al cortile.
A sinistra della scena, altro pianterreno con due catodii, e tra le porte di questi una fontana.
Tanto sul portoncino, che sulle porte, numeri civici.
La scena si svolge in una grande città siciliana.
Epoca presente. D'estate. Sull'imbrunire.
SCENA I
Mastru Austinu, solo, poi Serafina.
MASTRU AUSTINU
(su una scala a pioli, accanto all'icòna e all'altezza di essa, dopo avere aggiustato i fiori, prende dalla nicchia, un bicchiere per metà colmo d'acqua, dove galleggia un lucignolo, e l'osserva da tutti i lati mormorando) Vigliacchi! (poscia chiama) Lona!...
SERAFINA
(affacciandosi dalla porta di fondo) Chi vuliti, patri? (gitta uno sguardo sul balconcino, dal quale si affaccia, come per incanto, Don Ciccinu, e si scambiano un sorriso).
MASTRU AUSTINU
(che non si accorge di Don Ciccinu) Comu ti chiami, tu?
SERAFINA
Pirchí?
MASTRU AUSTINU
Torno e rebrico, comu ti chiami?
SERAFINA
Serafina..., 'n 'o sapiti, vui?
MASTRU AUSTINU
Oh!... Ti chiami Serafina, ju haju intirrocato Lona, dunque, è chiaru e manifestu ca non vogghiu a tia, ma voglio a tua matre!
SERAFINA
(scambiando un altro sorrisetto con Don Ciccinu) 'U viditi chi è... non pò vèniri, 'a matri, e mannò a mia...
MASTRU AUSTINU
E si dici ridennu?... Pirchí non pò vèniri, to' matri, quantu
sentu?...
SERAFINA
Avi chi fari, vi dicu!...
MASTRU AUSTINU
Chi su', chi fari d'alta banca? Ci divi diri, a to matri, che il suo consorti e patrone l'attendi, e divi lassari qualunchi cosa ppi vèniri cca, altrimenti ci scippu menzu tuppu! Marciamu!
SERAFINA
(gettando un'ultima occhiata dolce a Don Ciccinu) Comu vuliti (rientra).
SCENA II
Mastru Austinu e Don Ciccinu, poi Lona e Serafina.
DON CICCINU
(quando mastru Austinu, volgendosi da quel lato, lo scorge) Bona sira, mastru Austinu, chi si dici?
MASTRU AUSTINU
Bona sira a lei, caru signuri... Chi si divi diri?... Cummattemu con questi donni cretini, che non comprentono una sillaba! Biniditti 'ddi paisi di Cuntinenti: in Piamunti, mintemu, in Bustu Alsizio, in Minezia, dove comprentono anchi la musca c'abbola!... Se putrebbi turnari vint'anni arreri, mi ristassi surdatu, basta di non cummàttiri con questa caticoria d'armali sarvaggi, botta di vilenu!...
DON CICCINU
Eh, caru Mastru Austinu, tuttu 'u munnu è paisi! Ddà macari, ci su', 'i cretini!...
MASTRU AUSTINU
Cumprennu, signuri, comprennu; ma non di 'sta cuttura di chisti, schifo mundo, ca non sanno sèntiri un'occipite!...
LONA
Chi fu, chi ti pigghiaru?... Cca sugnu! E spicciti, ca staju facennu 'a minestra e non pozzu pèrdiri tempu...
MASTRU AUSTINU
(ancora a Don Ciccinu) Eccu!... Vidi, lei, comu trattanu, 'st'armali vattiati, col marito? Su' peggiu dei sumare pantillareschi. (a Lona) Dicitimi 'na cosa, signora: cci l'aviti misu, stamatina, l'ogghiu, 'nta 'sta lampa?...
LONA
Sicuru ca ci l'haju misu!... Ci nni misi tri sordi... chiú di menzu quartu...
MASTRU AUSTINU
E a chi ura addumastuu?
LONA
Tardu... putevanu essiri 'i deci.
MASTRU AUSTINU
(riguardando il bicchiere con la sola acqua) Mascanzoni!...
LONA
Chi fu, o' solitu... non ci nn'è chiú, è veru?...
MASTRU AUSTINU
(mostrandole il bicchiere con la sola acqua e il lucignolo) A cca! Asciutta comu un ossu!... Ma ju divu dan 'n esempiu, 'ntra 'stu curtigghiu, ca si nn'hannu a ricurdari ppi omnia secula siculorum!
SERAFINA
(riuscendo) Chi fu, patri?
MASTRU AUSTINU
Nenti!... Trasiti dintra, lei!...
SERAFINA
(con gli occhi su Don Ciccinu) Pirchí mi nni mannati? Chi mali fazzu, cca?
MASTRU AUSTINU
(imperioso) Senza rebreca!... Intra!...
LONA
Camina, figghia, ca ci pigghiaru, a to' patri!...
MASTRU AUSTINU
(la guarda minaccioso).
LONA e SERAFINA
(rientrano).
DON CICCINU
Vi salutu, Mastru Austinu, c'haju a studiari... (non ottenendo risposta rientra e chiude le imposte del balcone).
SCENA III
Mastro Austinu solo.
MASTRU AUSTINU
Ora ju vurrissi conusciri cu' sunnu questi mascarzoni!... (senza scendere dalla scaletta, sempre piú forte, per farsi udire da tutti) Ma l'haju dittu e lo farò! Divu dari un esempiu, 'nta 'stu curtili, ca si l'hannu a ricurdari fina ca càmpanu!... Farabutti!... Genti senza cuscienza e senza religioni!... Omini e fimmini!... Ogni giornu, signuri mei! Ogni giornu, nel filo del mezzigiorno, mentri che un professionista si fa una pinnicunata pp'arripusarisi l'ossa dei membri stanchi, veni qualche divotu, o qualche divota, con farso inganno, a s'asciuca l'ogghiu d' 'a lampa!... Mascarzoni!... O' santu, signuri mei, a un santu miraculusu ca non ci nn'è unu 'u stissu 'nta tutta la Sigilia!... S'arroba a un santu!... Il giornu della so' vigilia!... Farabutti!... Figuramuni all'omini, chi ci putissiru fari?!... Ma ju, però, ci dicu, a 'sti vicineddi cari, ca ci staju priparannu un bellu piattu dorci!... Cu' àvi oricchi mi senti!... (rincarando la dose) Parru generali!... Parru ccu tutti chiddi ca hannu oricchi... e fanno oricchi di mircanti!
SCENA IV
Cuncetta, Zenna, Aita, Mara e detti.
(Le quattro donne si affacciano simultaneamente, una per ogni porta, dai catodii laterali e si fermano ad ascoltare, sulle soglie).
MASTRU AUSTINU
Bona sira a questo nobili vicinanzu!
CUNCETTA
Chi fu, Mastru Austinu, ccu cu' l'aviti?
ZENNA
Chi vi pigghiaru?
MARA
Contra di cu' gridati?
AITA
Chi v'hannu fattu?
MASTRU AUSTINU
Nenti, cari e carissimi e nobili signore!... Stava parlannu fra me e me! E parlava ginirale!... E diceva ca 'na vòta, signori, ci fu un turco, di chiddi colla faccia nivora, ca ci piaceva il pani ccu l'ogghiu, e siccomi era scarso di pecunio, chi faceva? C'era una 'cona d'una Madonna, ccu 'na bedda lampa sempri china, il turco si mitteva ddà davanti, con fintizza di prigari, e inveci, tagghiava 'u pani a fedda, e abbagnànnulu 'nta l'ogghiu di la lampa, diceva: bagnari pani, Madonna, aum, aum! bagnari pani, Madonna, aum, aum!... e pistiannu, pistiannu, si sculava tuttu l'ogghiu!... Sissignori!!... E questo fattu si ripeteva ogni giornu!... Una mattina, però, il proprietario della 'cona, col permisso della Madonna, dintra l'ogghiu di la lampa ci misi il pipispezze macinatu; vinni il turco: bagnari pani, Madonna, bagnari pani, Madonna!... e il musso ci divintò comu un cularino di signa!... (fa il gesto relativo) Ora 'nta 'stu curtigghiu, certu e sicuru ca c'è quarche turco o quarche turca ca ci leva l'ogghiu a San Giuvanni Decullatu, e ju, col consenso di lui, ci mettu il pipispezze, e dumani (con intenzione) quarche turcu o quarche turca agghiorna col musso comi una funcia cappiddina, o comi una fico bifera!...
CUNCETTA
No, Mastru Austinu, vi sbagghiati!... Cca, ppi sapillu, turchi non ci nn'è, ca semu tutti vattiati!
MASTRU AUSTINU
(posando il bicchiere) Bravu!... Escusaziu non pitita a cu' saziu manifesta! Mentri ca vi sintiti, veni a diri che àviti la cuda di paglia, osia carboni bagnato.
CUNCETTA
'A pipita 'nt' 'a vostra lingua, puureddu, ca parrati quantu 'na pica vecchia (gli si avvicina minacciosa).
AITA
E 'a cuda l'aviti vui, ca siti armali! (c. s.).
MASTRU AUSTINU
(scendendo due scalini) Si non siti vui e vui, veni a diri ca è chidda o chidda; di cca non si scappa.
ZENNA
Oh, ccu mia parrati?... (gli si avvicina con un ferro da stiro in mano) Misseri e facchinu, sciacquativi 'a vucca!
MASTRU AUSTINU
(scendendo altri due scalini) A mia facchinu?
MARA
(avvicinandoglisi minacciosa anch'essa) A vui, a vui, e v'ha' dittu picca!... Ch'è graziusu! Ca cuntava 'u fattu d' 'u turcu!... Viditi si putiti vuscari quarche fraccatuna di lignati!
MASTRU AUSTINU
(scendendo del tutto e afferrando la scala, la fa girare in aria, minacciando di colpire con essa) Auh!... Fimmini d' 'u diavulu!... Non v'avvicinati, ca malamenti finisci, stasira!...
(Le quattro donne, vociando e imprecando - a soggetto - rientrano nelle proprie case, mentre vengono fuori Lana e Serafina e Don Ciccinu si riaffaccia al balcone).
SCENA V
Lona, Serafina, Mastru Austinu e Don Ciccinu.
LONA
Chi è, 'sta vucciria?... Chi sempri quistioni ccu tutti, fai? Ca lassili jri, 'e genti!...
MASTRU AUSTINU
Oh, trasitinni, 'nnunca ccu tia, sfogu!... (la minaccia con una forma).
SERAFINA
(frapponendosi) Ah!... Patri, chi faciti?!...
MASTRU AUSTINU
Passa intra tu macari, pettecola nica!
DON CICCINU
Mastru Austinu, bonu, ora!... Calmativi!... Fimmini, su'!...
MASTRU AUSTINU
Sí, ma hannu 'a lingua longa, signuri... e ju ci 'a serru a tutti dui!...
(Le quattro donne del cortile richiudono violentemente le porte loro catodii, lasciando ciascuna dietro di esse, appoggiata allo stipite, una scopa vecchia).
DON CICCINU
(vedendo ciò, ride apertamente) Ah, ah, ah!...
MASTRU AUSTINU
(livido dalla bile, notando l'insulto di quella collettività - a Don Ciccinu) Ah, lei, ccu 'na cosa di chisti, cci ridi?... Mi fannu un simeli ortraggiu e lei 'a pigghia a ridiri, ah?... 'U sapi sèntiri, ca è cosa d'omicidii e si facissi menz'ura di focu, ccu reorbiri, pistola e scupetta a du' canni, niscissi a libertà pruvisoria? (facendosi in mezzo al cortile con una forma in mano nascosta di dietro, guarda minaccioso, ora l'una ora l'altra porta con la scopa a sentinella). Con questi utinsili ca sponèti fòra, puliziatevi le vostri sporchezzi individuali! Genti vili e miseraboli!...
LONA
Non ti nn'adduni di quantu si' riddiculu, ah?... Ca divintasti la favula e lu spassu d'un quarteri sanu!... (corre dentro, perché minacciata).
MASTRU AUSTINU
(lanciandole la forma, che non la colpisce) Eh, fimmina trista e scuncicalora tosta!... A manu mei, vò finiri, è veru?...
SERAFINA
(c. s.) Patri!... Ma pirchí siti accussí?...
MASTRU AUSTINU
(minaccioso) Intra passa, tornu e rebricu!... (alza una mano per semplice minaccia di busse).
DON CICCINU
No, Mastru Austinu, no!... Chi c'entra?...
MASTRU AUSTINU
È mia figlia, caro signori, e ci divu 'nsignari il rispetto e l'educazioni!
DON CICCINU
Sí, ma no a corpa!... Vui siti un omu civili!...
LONA
(affacciandosi e rientrando tosto) Civili comu e' muli!...
MASTRU AUSTINU
(raccogliendo la forma vorrebbe rilanciarla, ma Lona è già lontana. Ripone la forma e torcendosi le mani) Si persuadi, caru Don Ciccinu?... Si sta capacitannu, lei?... E poi dici che un lavoratori, un professionista, non divi pèrdiri 'a libirtà!... Ah, San Giuvanni Decollatu! (guarda all'icòna).
DON CICCINU
(dopo aver fatto segno a Serafina che si ritira e averla salutata con una strizzatina d'occhio) E bonu, Mastru Austinu, cu' àvi chiú sali conza 'a minestra... Calmativi! Mi nni trasu ju, bona sira (rientra).
MASTRU AUSTINU
(con tono irritato sempre piú) Sugnu calmu!... Sugnu calmu!... Sugnu calmissimo, egregio signori!... Bona sira (alla figlia) Va' pigghiami 'a stagnata ccu l'ogghiu, prestu!
SERAFINA
(rientra).
SCENA VI
Mastru Austinu solo, poi Oraziu, indi Serafina.
MASTRU AUSTINU
(rimonta la scaletta e, parlando all'immagine) Si siti santu ppi daveru, e non siti cca ppi cumparsa, San Giuvannuzzu, 'ddu miraculu m'aviti a fari!...
ORAZIU
(venendo dal vicolo, con l'asta col moccolo acceso) Bona sira, Mastru Austinu. Comu siti?
MASTRU AUSTINU
Oh... caru Mastru Araziu!... Non c'è mali. Vui?...
ORAZIU
Comu e' picciotti!... Chi dici, 'u Santu? Nni ha fattu chiú, miraculi?
MASTRU AUSTINU
Chi faciti, ci schirzati?... Ppi sapillu, 'stu tanticchia di cosa ca pari ca non servi, fa miraculi ca mancu 'i santi boni ca ci su' dintra San Petru di Roma!... Figuratevi ca venunu genti, ppi raccumannarisi a chistu, di 'dda banna mari!...
ORAZIU
(accendendo il fanale) Ci cridu, si... ca nn'haju 'ntisu parrari...
MASTRU AUSTINU
Ah!... è cosa di non ci cridiri nuddu!... Allu 'ddocu, 'u viriti?... Un miraculu sulu, non m'ha vulutu fari, ed è chiddu di faricci cascari 'a lingua a me' mugghieri!... Ma ju cci haju fidi, però, e tempu passa ca nni vidu 'spirienza.
ORAZIU
(indugiandosi e guardando alla porta e nell'interno della casa di Mastru Austinu) Pirchí, chi ci ha statu, scerra?... Bonu, ora, faciti paci!... 'A chiamu ju, a cummari Lona?...
MASTRU AUSTINU
Eh, eh, eh!... Amicu caru!... 'U sapiti comu dici 'u pruverbiu? "Tra mogli e marito non ci mettiri manco il dito mignolo". Facitivi l'affari vostri.
ORAZIU
(tutto giulivo, vedendo uscire Serafina) Ragiuni aviti, scusati! Bona sira, donna Sarafinedda, comu siti?
SERAFINA
(indifferente, porgendo una latta con olio al padre) Bona, grazii. Tiniti cca, patri.
MASTRU AUSTINU
(versa l'olio nella lampada e l'accende, segnandosi. A Serafina e Oraziu) Diciticci 'na virmaria e un paternostru, ca vi pruteggi.
SERAFINA e ORAZIU
(si segnano anch'essi e recitano, a fior di labbra, le preci suddette).
MASTRU AUSTINU
(scende, riconsegna alla figlia la latta e le dà pure la scaletta) Te', pòrtali dintra.
SERAFINA
(andando, ad Oraziu) Bona sira.
ORAZIU
Bona notti.
MASTRU AUSTINU
(prima che la figlia scompaja, mettendosi a sedere) Ah!... E ora ca l'illuminazioni vinni, nni mittemu a travagghiari!...
SERAFINA
(fermandosi sulla soglia) E quannu mangiati?
MASTRU AUSTINU
(secco secco) Non mangiu!
SERAFINA
E pirchí?
MASTRU AUSTINU
Pipita!... (la guarda bieco) E senza rebrica!
ORAZIU
Pirchí 'a trattati d'accussí, a vostra figghia, 'nuzzintedda?... Idda è tantu primurusa!...
MASTRU AUSTINU
Amicu miu, allura viziu è, ca aviti!... Vi dicu 'n autru pruverbiu e ricurdatavillu:
"Tra patri e figlia, non ci mettiri maniglia"!...
ORAZIU
Scusati!... Mi nni vaju... Bona sira.
MASTRU AUSTINU
Bona sira a vui (a Serafina, che è tornata con un piccolo lume a petrolio con paralume di carta verde e lo mette sul deschetto) Cala 'ssu micciu, ca fa fumu, e poi marciamu dintra!
ORAZIU
Di novu, bona sira, donna Sarafinedda.
SERAFINA
(abbassa la fiamma del lume e non risponde).
ORAZIU
Di novu, staviti beni.
MASTRU AUSTINU
Bona sira, bona sira, mastru Araziu... L'aviti dittu se' vòti.
ORAZIU
(va via).
SCENA VII
Mastru Austinu, poi Zenna, indi Don Ciccinu.
MASTRU AUSTINU
(rimasto solo, si alza, va presso la gabbia, desta, col fischio il merlo - che era appollaiato e che si mette a fischiare anch'esso - poi torna a sedere e lavorando canta, prima a mezza voce, poi, mano mano, a voce alta)
La donna è mobeli - di piumi al veento
Muta d'argento - E di pensier...
È sempri misero - cui si nni fida,
Cu' ci cunfida - Il cardo cor!...
(ecc. ecc.).
DON CICCINU
(affacciandosi alla loggetta) Mastru Austinu!...
MASTRU AUSTINU
(volgendosi verso di lui) Comanda, signori!...
DON CICCINU
M' 'u faciti un favuri?
MASTRU AUSTINU
Si è cosa in mia facortà...
DON CICCINU
In vostra facoltà, è...
MASTRU AUSTINU
Lei parlasse!...
DON CICCINU
'U piaciri fussi chiddu di non cantari.
MASTRU AUSTINU
Pirchí, signuri, stonu?
DON CICCINU
siti 'ntunatu comu 'na ciancianedda, ma ju non pozzu fari nenti e 'ntantu divu studiari, assai.
MASTRU AUSTINU
Ah!... Menza parola, signuri!... Lei sarà sirvitu...
DON CICCINU
Favuritu, grazii (rientra).
ZENNA
(dal suo catodio a sinistra, stirando, canta, a piacere dell'artista o l'una o l'altra strofa):
Supra una muntagnella
Ci stanno tre sorelle
Una di li chiú belle
Si posi a navigà
Nel navigà chi feci
L'anello ci cascò...
(ecc.)
Non sapete, che colpita,
D'altro morbo, è la mia vita,
E che presto il fin ne veto,
Se mi separo dal feto!
(ecc.)
DON CICCINU
(riaffacciandosi) Di beni a megghiu! N'autra artista di cantu, c'è!... (forte) Donna Zenna! Donna Zenna!
ZENNA
(affacciandosi alla porta) Cu' è ca mi chiama?
DON CICCINU
Scusati, m' 'u faciti 'u favuri di non cantari, ca divu studiari e mi disturbati?... Vi nni sarò gratu!
ZENNA
Ca... vossia vidi chi è: siccomu fa caudu, e staju stirannu, cantu pri cunfortu!...
DON CICCINU
E bonu, macari vi mannu 'na balàta di ghiacciu, basta ca non vi cunfurtati accussí...
ZENNA
Chi c'entra, signuri! Ccu mia non c'è bisognu di diri 'ssi cosí! 'U ghiacciu ci l'ha' a dari a chiddi caudulini (accenna a Mastru Austinu) a chiddi c'hannu 'u caudu dintra... Non cantu chiú. È cuntentu?
DON CICCINU
Vi ringraziu assai... (mentre sta per ritirarsi, il merlo fischia un 'arietta) Bonu, Piddu! 'U merru sulu cci mancava, ppi cumpíri l'òpira!... Chi è, macari di notti, canta, Mastru Austinu?
MASTRU AUSTINU
(ridendo) Ca... 'u sapi chi è?... Vidi lustru e ci pari jornu. Ora 'u fazzu zittiri (si avvia verso la gabbia) Auh, Lisciantrino!... Zittiti, ca notti è! 'U senti, o' papà?... Vo' curcati! Cumprenti?... Ah!?... (il merlo fischia la ritirata. Mastru Austinu rifacendolo) Ecco (a Don Ciccinu) Sunau 'a ritirata, signu ca si persuasi. Lei sta tranquillu ca non frisca chiú, è andato a letto!
DON CICCINU
Spiramu! Tanti grazii! (rientra).
MASTRU AUSTINU
Non c'è di chi, signori.
SCENA VIII
Mastru Austinu e la ZÀ PETRA.
ZÀ PETRA
(venendo dal vicolo) Salutamu a Mastru Austinu, comu siti?
MASTRU AUSTINU
Oh, bon ventu, ZA PETRA!... Bonu... vui non si dumanna. Assittàtivi.
ZÀ PETRA
(sedendo accanto al deschetto) Chi beddu friscu, ca c'è cca!... Nni mia si mori d' 'u caudu!...
MASTRU AUSTINU
Ca 'u viriti chi è?... Ju ci tegnu 'u vintilaturi, 'a sira!... Di 'ssu viculu, 'u viditi, trasi un vinticciolu accussí finu e gintili, ca si prima di finiri 'sta 'stati non pigghiu 'na purmunia, haju a diri Signori vi ringraziu!... Dunca, chi nova? M'aviti a diri cosa?
ZÀ PETRA
Senza fari tanti chiacchiri Mastru Austinu... V'haju purtatu un bellu partitu.
MASTRU AUSTINU
Sugialista o reprubbicanu?...
ZÀ PETRA
Ca ora!... Partitu di matrimoniu.
MASTRU AUSTINU
E n' 'o sapiti ca sugnu maritatu? Lassati moriri a me' mugghieri e nni parramu!
ZÀ PETRA
Vih, 'stu vecchiu smurfiusu!... Pri vui, vi purtava 'u matrimoniu?
MASTRU AUSTINU
E 'nnunca pri cui?
ZÀ PETRA
Ca pri vostra figghia Serafina!
MASTRU AUSTINU
Ah, pri me' figghia?... E cu' è, 'ssu pazzu?
ZÀ PETRA
Pazzu?... È un giuvini d'oru, e vui 'u conusciti... Oraziu 'u lampiunaru.
MASTRU AUSTINU
Ah!... Ora ora fu cca...
ZÀ PETRA
Sissignuri, mi l'ha dittu.
MASTRU AUSTINU
E pirchí non si spiegava iddu stissu?
ZÀ PETRA
Ca pirchí si virgogna! Chi sapiti ch'è dilicatu!... 'Na palumma!... Mi pari ca non putissivu truvari di megghiu. Du' liri e menza o' jornu comu lampiunaru, e poi, di jornu lavura comu ntagghiaturi di petra bianca e si vusca 'n'autri du' liri e menza... Onestu, affezionatu, rispittusu, bellu giuvini...
MASTRU AUSTINU
Sissignori!... È fatta...
ZÀ PETRA
Accunsintiti?
MASTRU AUSTINU
Accunsentu... Ma... tantu per intendersi, però: il giovani lo sa, che mia figlia non àvi doti?...
ZÀ PETRA
'U sapi e non ci nni 'mporta.
MASTRU AUSTINU
Ma sapèmuni sèntiri: non nni pussedi, recisamenti, va, non pri modu di diri!
ZÀ PETRA
Non ci nni 'mporta, vi dicu!
MASTRU AUSTINU
Quannu è chistu, è fatta!
ZÀ PIETRA
Di beni a megghiu. Quantu sentu 'a matri, ora.
MASTRU AUSTINU
Dovi va lei?
ZÀ PETRA
Nni vostra mogghi.
MASTRU AUSTINU
Pirchí?... Per quali cagione?
ZÀ PETRA
Pri sèntiri chi dici idda!
MASTRU AUSTINU
Alto là, firmativi! Cu' è il capo della casa Miciacio? Parrati!
ZÀ PETRA
Siti vui!
MASTRU AUSTINU
Ju, cui?
ZÀ PETRA
Mastru Austinu Miciaciu.
MASTRU AUSTINU
Oh, benissimu! Chi cosa v'ha rispostu, questo signor Mastru Austinu Miciaciu?
ZÀ PETRA
Ca è cuntenti ed è cosa fatta.
MASTRU AUSTINU
Dunqui?... Non c'è chiú bisognu d'autru cunsensu. Il pruverbiu anticu dici: "Dissi lu puddicinu 'nta la nassa, unni maggiuri c'è, minuri cessa".
ZÀ PETRA
Allura m'autorizzati a purtarici la bona nova a lu picciottu?
MASTRU AUSTINU
Si cumprenni!
ZÀ PETRA
Mi nni vaju, ca iddu, criaturi, mi sta aspittannu ccu l'anima appisa!
MASTRU AUSTINU
Ci diciti ca si pò prisintari, pirchi già è fidanzatu. Cc 'u pattu, però, ca si spiccia prestu!...
ZÀ PETRA
Ppi 'ssa cosa, 'a primura è chiú so' ca vostra. Tempu ca jettanu 'i banni e su' maritu e mogghi. Vi salutu, Mastru Austinu (si avvia).
MASTRU AUSTINU
Sintiti, ZÀ PETRA... Dal mumentu che il giovine è tantu entusiasmatu, viditi si si pò purtari macari a me' mugghieri, quantu mi levu 'sta mala tintazioni d'allatu!... Si mi rinisciti chista, vi rialu un paru di burdacchè di peddi di cani ca v'hannu a durari.
ZÀ PETRA
'U viditi?... Sbagghiastuu, Mastru Austinu!... Ju chi sugnu fimmina di far cosa ppi ntentu?
MASTRU AUSTINU
Bonu, ma ju non parlai per offenderi la vostra insuscettibilità! Dicitaccillu, ZÀ PETRA, servi c'arrifriscati un'arma di purgatoriu!...
ZÀ PETRA
Sempri scialaturi, Mastru Austinu! (ridendo) Lassati fari a mia, ca facili ca si cummina (via).
MASTRU AUSTINU
'U Signori v' 'a renni.
SCENA IX
Mastro Austinu solo, poi Don Ciccinu.
MASTRU AUSTINU
(si frega le mani per la soddisfazione, poscia, riprendendo il lavoro, dimentico della promessa fatta a Don Ciccinu, canta)
Quannu l'omu crisci 'i baffi,
Ha' bisognu d' 'a mugliere,
Non c'è modu né maniere,
Egli sempri vo' spusà!
Fimmini, flmmini,
Su' tutti 'nfanfiri,
Su' tutti abili
Di 'nfamità!
DON CICCINU
(riapre il balcone e si riaffaccia alla loggetta) Mastru Austinu!
MASTRU AUSTINU
Cumanna?
DON CICCINU
Comu finiu?... V' 'u scurdastuu?...
MASTRU AUSTINU
Ah!... Già!... Sicuru!... Non divu cantari!... Scusa, mi l'aveva sdimenticatu. Lei si 'ntroduci, ca non cantu chiú.
DON CICCINU
'U sapiti chi è? Mi staju priparannu all'esami di laurea, e sintennu cantari perdu 'a testa...
MASTRU AUSTINU
Nenti signori, ci rebrico, lei si 'ntroduci di bernovu ca non cantu.
DON CICCINU
Grazii tanti (rientra).
MASTRU AUSTINU
Non c'è di chi, scusa, anzi, la sdimentichezza.
SCENA X
Lona, Serafina e detto.
LONA
(con lo scialle in testa, andando verso il vicolo) Quannu vuliti mangiari, c'è vostra figghia ca vi servi.
SERAFINA
Matri, assai, stati?
LONA
N' 'o sacciu. Si non mi ritiru non ti pigghiari pena e non stari in pinseri, ca nni me' frati, sugnu!
SERAFINA
Comu? Non v'arritirati? Chi veni a diri, accussí?...
LONA
Veni a diri ca ccu 'stu stravaganti di to' patri non ci pozzu cummàttiri chiú!...
MASTRU AUSTINU
Auh!... Misuramu 'i termini!
SERAFINA
Ccu vui mi nni vegnu, matri!...
MASTRU AUSTINU
Fermiti 'ddocu, tu, lassannilla jri, ca accussí sbaria! (a Lona) Andate pure. Acqua davanti e ventu d'arreri!
LONA
Ragiuni hai!... Non mi puteva rumpiri 'u coddu, 'ddu jornu ca 'ncuntrai a tia?
MASTRU AUSTINU
Non ti pigghiari còlira, ca picca nn'hai! Ccu n'autri quinnici jorna si' ccu to' jenniru, servi ca mi lassi 'n paci!...
LONA
Chi dicisti?... Quali jenniru?...
MASTRU AUSTINU
Sicuru. Nostra figlia è compromessa.
SERAFINA
Chi siti pazzu?
MASTRU AUSTINU
A to' patri, ci dici pazzu? Pettecola!
LONA
Ccu cu' è, comprumisa? Cu' è, ca 'a fici cumprumisa?...
MASTRU AUSTINU
L'haju fattu ju e basta! Un mumentu avanti ci ho dato la mia palora a Orazio Scavunettu, inteso Funcidda, il lampionario, e tempo quindici giorni ogni cosa è fatta...
LONA
Cui? Cu' è, ca 'u dissi?... Prima ha a parrari ccu mia, 'ssu cristianu!...
MASTRU AUSTINU
Ha parlato con me, che sono il babbo, e basta!...
LONA
E ju sugnu la babba e senza cunsensu miu...
SERAFINA
(piangendo) Già! Sciarràtivi ccu cu' ha a parrari! Comu si si trattassi di 'na pupa di stuppa! Mi pigghiava 'u lampionaru, ora!...
MASTRU AUSTINU
Pirchí, zivittola!... Chi vulevi, un presidente di Gran Curti, un sigritariu cumunali, una guardia daziaria?... Mmalidittu di quannu ti mannai 'a scola, ca ti jncheru 'a testa di cianciafrusculi!...
LONA
Si a me' figghia non ci piaci non c'è obbligu ca si l'ha a pigghiari!...
MASTRU AUSTINU
(afferrando una forma e minacciando la moglie) Oh, vidi ca ti fazzu riurdari 'a vigilia di San Giuvanni, sai! Oramai sugnu compromiso e non pozzu mancari di palora.
SERAFINA
(c. s.) No, non m' 'u pigghiu, mancu si m'ammazzanu!.. Pigghiativillu vui, a 'ddu carnalivari!...
MASTRU AUSTINU
Chi dicisti?... Ju m' 'u pigghiu?... A to' patri, ci rispunti accussí? (minacciandola) Intra passa, cajorda nica! Altrimenti ti rumpu l'ossa, ha' capitu?
LONA
Lassala stari, a' picciridda!...
MASTRU AUSTINU
(sarcastico) 'A picciridda! Daticci 'a pupa, quantu joca!... Intra, ti dicu!...
LONA
(a Serafina) Bonu, trasitinni e non chiànciri, ca dumani si nni parra...
SERAFINA
(rientrando) Mi vòli fari mòriri!... Mancu si non fussi sangu so'! ... Beddu patri, ca haju!... Mi dava 'u lampiunaru!... Mancu ppi surci supira 'i canali, 'u vogghiu vidiri, no!
MASTRU AUSTINU
Auh, picciridda!... Accura, sa'?!...
LONA
Quantu si' boja, botta di vilenu (vedendosi minacciata scappa pel vicolo, gridandogli) boja! boja!
MASTRU AUSTINU
(lanciandogli la forma) Eh, mavara streca! Si ti 'ncucciava! ...
SCENA XI
Mastru Austinu solo, poi Don Ciccinu.
MASTRU AUSTINU
Vi l'aggiustu ju, 'i gammi, si l'aviti storti!... Vigliacca mascanzona! (raccoglie la forma, va a sedere, ricominciando il lavoro, dimentico, al solito, della promessa, riprende a cantare)
Si avissi una menza sciabula,
O puru una carabina,
Farebbi una roina,
Farebbi un non sol que
Si avissi una menza sciaaaabula,
(ecc. ecc.)
DON CICCINU
(riaprendo e riaffacciandosi. come prima) 'N'autra vòta?... E comu vi l'haju a diri, allura?...
MASTRU AUSTINU
Ah, signuri, m'arricopiglio! Scusa, non cantu chiú!... Stavolta garintito! ...
DON CICCINU
Spiramu ca non v' 'u scurdati!... (rientra).
SCENA XII
Mastru Austinu e Oraziu.
ORAZIU
(dal vicolo) C'è permissu?...
MASTRU AUSTINU
Cu'è?... Ppi tràsiri 'nt'o curtigghiu dimannati pirmissu? Il cortiglio è pubbrico, avanti! ...
ORAZIU
(timidamente) Mastru Austinu... (si avvicina).
MASTRU AUSTINU
Ah, tu si', caru Oraziu?... Assèttiti, mio carissimo geniro.
ORAZIU
(giulivo) Allura veru è, zoccu mi dissi 'a ZÀ PETRA? M' 'a dati, a Sarafinedda?
MASTRU AUSTINU
Quantu vòti?... Mastru Austinu Miciacio àvi una sula parola. Ho detto ca è to', e basta!... E poi, chi non ti nn'adduni ca ti chiamu di tu?... Questo significa che già ti considiro della famiglia... Caro geniro, assèttiti! (gli porge la destra a baciare e Oraziu la bacia).
ORAZIU
Grazii, patri - pirmittiti ca vi chiamu accussí?
MASTRU AUSTINU
Oh!... Anzi lo pritendo!... Assèttiti, ti dicu!...
ORAZIU
(guardando la porta di casa) No... vulissi vidiri 'a matri, prima...
MASTRU AUSTINU
Ah!... Non c'è. Nisciuta è. Ma fa lo stisso.
ORAZIU
'U sa si è cuntenta macari idda?
MASTRU AUSTINU
Contenti io, contenti tutti.
ORAZIU
E Serafina?
MASTRU AUSTINU
Ti rispondo colla stissa prepesezioni.
ORAZIU
(impaziente di vedere la ragazza) Ma idda, mancu c'è?...
MASTRU AUSTINU
C'è, ma è un pocu indisposta (vedendolo dubbioso) Ti dicu ca è to'!... Senza doti, sí... chistu t' 'u dissi 'a ZÀ PETRA, è veru?
ORAZIU
Sissignuri, e ju doti non vi nni cercu. Abbasta ca m' 'a dati e macari senza cammisa...
MASTRU AUSTINU
No, 'a cammisa l'àvi... Chi c'entra, la legittima non ci 'a pozzu livari!... A propositu, a to' soggira chi t' 'a pigghi ccu tia?
ORAZIU
Ca... si ci vòli vèniri, tantu onuri e piaciri.
MASTRU AUSTINU
E allura, non c'è alcuna dificortà. Serafina è cosa to', parola di galantomu d'onuri.
ORAZIU
Ma n' 'a putissi vidiri, ju?...
MASTRU AUSTINU
No, per questa sira è impossibili! Dumani veni e trasi in casa...
ORAZIU
C'è paura, poi, nasci quarche 'ntòppitu?
MASTRU AUSTINU
Ma chi 'ntòppitu e 'ntòppitu! ...
ORAZIU
No, pirchí sintiti, ju canusciu 'u me' carattiri. Sugnu bonu, ma non sempri. Sapiti: si mi diciti no ora, non c'è offisa, dicu giustu? Ma si mi diciti sí, ju cci fazzu suppa, dormu ccu 'ddu pinseri, mangiu ccu 'ddu pinseri, bivu ccu 'ddu pinseri, e poi nasci quarche difuurtà e mi vidu licinziari (prendendolo per le braccia e scuotendolo) allura addiventu 'n armali, e pò fíniri tinta! Perciò ju, prima, mi vurrissi assicurari di tutti, capiti?...
MASTRU AUSTINU
(sconcertato, lo guarda un po' tra il timoroso e l'irritato, poi, riavendosi) Allura, amicu miu, ti dicu ca si' 'ntontiru e non cumprenni nenti! Quannu Mastru Austinu Miciaciu si comprumetti di 'na cosa la so' parola è parola di re, m'ha' capito, bardascia?...
ORAZIU
Scusati, patri.
MASTRU AUSTINU
Non c'è di chi. Corrispunsabili ju. Ti nni po' jri a dòrmiri ccu ottu cuscina! (gli porge la mano c. s.)
ORAZIU
Tanti grazii!... Mi nni vaju, allura!... Dal momentu ca stasira, 'a zita, non si pò vidiri! ...
MASTRU AUSTINU
Dumani vi viditi. Di matina è megghiu, anzi, ca si c'è fausu 'ngannu 'nt' 'a facci, a chiaru di suli si vidi megghiu.
ORAZIU
Benediciti... e scusatimi...
MASTRU AUSTINU
Nenti. Si 'ncontri a to' soggira, non ci diri nenti, ha' capitu?... Pirchí t'annuvuli 'n'autra vòta? Rispunsabili, rebricu, sugnu ju. Di ogni cosa ca po' succediri pigghiatilla ccu mia, mancu?... Va, ti salutu, santu e riccu! (gli porge la mano c. s.).
ORAZIU
(andando) Supra 'a vostra parola staju (via).
MASTRU AUSTINU
Parola di re!
SCENA XIII
Mastru Austinu, Serafina (di dentro), poi Don Ciccinu.
MASTRU AUSTINU
(davanti alla porta di casa) L'ha' 'ntisu, 'ssu discursu, figlia?
SERAFINA
(di dentro, singhiozzando) L'haju 'ntisu! ...
MASTRU AUSTINU
Dunqui, tu mi sa' sentiri!... E non chiànciri, triulu di casa! (torna al deschetto e, ripigliando il lavoro, accenna)
Quell'uom dal fiero...
(riprendendosi da sé) Ah, ah!... Mi l'aveva scurdatu!... Non si canta!... (rinforzando la voce a ogni frase) 'Nta 'stu curtigghiu, non si canta!... C'è questa nova spiculazione!... Pipa di radica e tabaccu cli Lifuddia!... Una persona, per ipotesi, àvi l'agghi 'n testa ppi 'stu picciu ca senti (si ode, difatti, ancora, il singhiozzo di Serafina) e vulissi sfugari cantannu?... Non signori, non c'è pirmisso! ... Riclosioni muta!... (incalzando) A un deviduo ci pigghia 'na botta nirvusa e non c'è autru sullevu ca 'na cantata a vuci di testa?... Non signori, è priibito!... Cca non si canta!... Non si ca...a...nta! durante questo soliloquio, tra una frase e l'altra, batte violentemente il martello sulla suola di una scarpa informata, ricavandone un rumore irritante e continuo).
DON CICCINU
(riaprendo e riaffacciandosi) Mastru Austinu, facitimi un favori: cantati! ...
MASTRU AUSTINU
Allura, lei, chi m'ha pigghiatu, per un burattinu?...
DON CICCINU
No, v'haju pigghiatu per un maleducatu!
MASTRU AUSTINU
Maladucatu, dissi?
DON CICCINU
Sicuro, maleducatu!
MASTRU AUSTINU
Ppi daveru, o 'nnunca ppi scherzu?
DON CICCINU
Ppi daveru, ppi daveru!... Doppu ca vi pregu ccu boni maneri, la prima, la secunna, la terza vòta, di lassàrimi studiari in paci, e vui non nni sintiti nenti, vi divu diri ca siti maleducatu! ...
MASTRU AUSTINU
(si alza e, mettendosi la mano sul fianco sinistro) Scusa, allura ci dicu... (additando il fanale) Questo è lampiuni?...
DON CICCINU
Eh? ... È lampiuni ...
MASTRU AUSTINU
(additando il numero civico sulla porta) E questo è númmiro?
DON CICCINU
È númmiro...e ccu chistu? ...
MASTRU AUSTINU
Dunqui, c'è fanali e c'è númmiro, il cortiglio è pubbrico, e ju cantu (siede e martellando, c. s., canta)
Quell'uom dal fiero aspetto
Guardati in sul camiiino.
DON CICCINU
(rientrando) Facchino! (gli sbatacchia violentemente le vetrate in faccia).
MASTRU AUSTINU
(sullo stesso tono, cantando)
Ci sarà lei facchino,
Ci sarà lei facchin!...
Trimaaate...
(ecc. ecc.)
SCENA XIV
Serafina e Mastru Austinu.
SERAFINA
(affacciandosi alla finestra con gli occhi rossi) Chi faciti, mangiati, patri?
MASTRU AUSTINU
Ora ca non c'è chiú 'dda mavara di to' matri, sí. Chi c'è di mangiari?
SERAFINA
Triaca mascalisa...
MASTRU AUSTINU
(saltando in aria) Chi dicisti?... A la facci di me' mugghieri! Ccu sapiri ca sugnu di stomacu cagiunevuli, mi fa truvari fasoli di Mascali, quantu mi pigghia un culera furminanti! Non nni vogghiu!
SERAFINA
(sempre afflitta) E allura chi ristati, dijunu?...
MASTRU AUSTINU
Djunu?... E pri quali santu? Mangiasti, tu?...
SERAFINA
Mangiai!
MASTRU AUSTINU
E accussí si dici?... Nun jttari 'ssu triulu, ti dicu!... Guarda chi fai, porta dintra 'sti 'mmarazzi, ca ju mi fazzu fari un pocu di lattuchi cotti e du' ova fritti, alla tortoria... ossia ddà allatu, nni donna Tina 'a putiara.
SERAFINA
(comincia a trasportare dentro il lume, il deschetto ecc.).
MASTRU AUSTINU
(si ferma sotto l'icòna e vi accende quattro candele o sei che vi sono) San Giuvannuzzu, vui ca siti santu miraculusu, mi l'àviti a fari 'ssu miraculu, 'u sintiti?... Senza falla mòriri!... Quantu ci sicca 'a lingua!... Ca poi vi fazzu 'na nuvena ca vi nn'aviti a riurdari 'nsinu ca campati.
SCENA XV
Serafina sola, poi Don Ciccinu.
SERAFINA
(dopo aver riposto anche la gabbia col merlo, riesce fuori con un bastoncino, va, a scrutare fino in fondo al vicolo e poi, pian pianino, mettendosi sotto il balcone di Don Ciccinu, batte ripetuti colpetti sui vetri di esso).
DON CICCINU
(aprendo) Cu' è, santissimu!... (vedendo Serafina) Ah, tu si', Serafinedda? E to' patri unn'è?
SERAFINA
'Nt' 'a putia, a mangiari! Sula sula sugnu! ...
DON CICCINU
Chi hai, ca chianci?
SERAFINA
Mi vòli maritari ppi forza! ...
DON CICCINU
Chi dicisti?... Aspetta, ca vegnu 'nt' 'o purticatu (rientra e si riaffaccia tosto dal portoncino, che lascia socchiuso) Dunca, quantu sentu?...
SERAFINA
Me' patri mi vòli maritari pri forza, ccu Orazio Scavunettu, 'ntisu Funcidda, 'u lampiunaru, tempu quinnici jorna!
DON CICCINU
E pirchissu chianci? C'è 'u to' cunsensu? No. Dunca?...
SERAFINA
Già!... Ti pari cosa di nenti! 'U sai com'è me' patri!... Si cumprumisi e divi essiri pri forza comu dici iddu!... (buttandogli le braccia al collo) E ju, senza di tia, moru!
DON CICCINU
(baciandola) Bonu; babba, non ci sugnu ju, cca?! ...
SERAFINA
E chi fai, tu?... Si ci putissi diri: vogghiu a vostra figghia, allura, forsi, ti prifirissi a tia!...
DON CICCINU
Mi nni maravigghiu! Ma 'u sai ca non pò essiri, anima mia! I me' nanni s'appunissuru recisamenti...
SERAFINA
(singhiozzando) Perciò, è finita ppi mia!... (disperata) M'avvilenu!... Mi pigghiu deci pastigli di sublimatu...
DON CICCINU
Non fari d'accussí, Finuzza! (commosso) Chi ti pari, ca ju non soffru chiú di tia, 'ntra 'stu mumentu?...
SERAFINA
E cc'haju a fari, si non c'è riparu?...
DON CICCINU
(dopo un po' di riflessione) Si tu vulissi, ci fussi, 'u riparu! ...
SERAFINA
(raggiante) E quali?
DON CICCINU
Ca ti nni veni ccu mia...
SERAFINA
(disillusa) E comu?... Senza matrimoniu?...
DON CICCINU
Amuri miu, di prima senza matrimoniu, poi pensa Diu.
SERAFINA
Già... e si poi tu ti stanchi di mia e mi lassi?...
DON CICCINU
(stringendola al petto) Cui, ju?... Chistu no, vidi? Non l'ha' a diri e mancu l'ha' a pinsari!...
SERAFINA
E 'i genti chi ponnu diri?
DON CICCINU
C'hannu a diri, 'i genti? Ch'è chista, 'a prima, ca due amanti si nni fujunu e poi si maritanu?... Dimmi di sí e mi fai l'omu chiú felici d' 'u munnu! (la tempesta di baci).
SERAFINA
(quasi vinta) Chi sacciu!... Non mi 'ngannari, Ciccinu, ppi l'armuzza di to' patri e di to' matri!!...
DON CICCINU
Non mi parrari accussí, Serafina!... Non vidi quantu ti vogghiu beni? (la divora con gli occhi).
SERAFINA
E... quannu duvissi essiri, 'ssa cosa?...
DON CICCINU
Quannu vòi tu, curina!... Macari ora stissu... Anzi... chi c'è megghiu occasioni d'ora, ca si' sula e non ti vidi nuddu?...
SERAFINA
(tremante) Ora stissu?... E si me' patri nni vidi passari?
DON CICCINU
(sorridendole) Di unni? Quantu trasi ccu mia, ed è fatta!
SERAFINA
Cca? ...
DON CICCINU
Si cumprenni, cca stissu! In modu ca tuttu ponnu suspittari all'infora ca si' accostu 'a to' casa. Veni, tesoru, trasi! (la trae a sé verso il portoncino).
SERAFINA
(ha un'ultima riluttanza e un ultimo dubbio) E si poi...'i to' nanni, non accunsentunu?...
DON CICCINU
No, ca su' genti di cori, timurati di Diu... E poi, tutto al piú nni spusamu quannu mòrunu... Sunnu vicchiareddi! (le fa dolce violenza per deciderla).
SERAFINA
(lasciandosi trascinare) No, mi scantu, Ciccinu! ...
DON CICCINU
È megghiu, allura, ca ti maritunu cc' 'u lampiunaru e nni spartemu ppi sempri?
SERAFINA
(avviticchiandoglisi) No, Ciccinu miu, no! ...
DON CICCINU
E allura?... Veni?...
SERAFINA
Vegnu!... Aspetta... E me' matri?...
DON CICCINU
Sí, hai ragiuni! A to' matri ci lassi du' paroli scritti. Aspetta (prende di tasca un taccuino e una matita e glieli porge) Te' cca. Scrivicci accussí: Cara madre.
SERAFINA
(eseguendo) Mi trema 'a manu! ...
DON CICCINU
Non fa nenti... jamu...
SERAFINA
Si veni me' patri e nni trova cca?...
DON CICCINU
Si tu perdi tempu apposta!... Dunca: Cara madre, me ne vado lontano con colui che amo...
SERAFINA
Assai, assai!
DON CICCINU
(ridendo)... assai, assai... tanto che non potrei mai sposare un altro. Perdonatemi e fatemi perdonare dal padre. Vi scriverò dalla prima stazione di fermata. - Capisci, chistu è truccu per sviare ogni traccia. - Vi abbraccio e mi dico sempre vostra figlia devota Serafina ... - 'A finisti?...
SERAFINA
Sí ... Chi mi sta' facennu fari, Ciccinu?...
DON CICCINU
Dammi cca, amuri miu! (strappa dal taccuino il foglio scritto e glielo porge) Te', lassalu dintra, in un postu visibili e facili, hai capitu?... E torna subitu.
SERAFINA
(esegue, vacillante, e torna con un involto sotto il braccio).
DON CICCINU
Chi c'è 'ddocu?
SERAFINA
Un pocu di biancheria netta.
DON CICCINU
(prendendole l'involto e lanciandolo dentro la casa di Mastru Austinu) Scusa, Serafinedda... Non è per disprezzu sai; ma d' 'a roba di Mastru Austinu, d'ora in poi, non nn'hai chiú chi nni fari, pirchí pri tuttu chiddu ca ti servi, ci pesa to' maritu (allacciandola alla vita la ribacia follemente) Trasi!
SERAFINA
Aspetta. Prima di trasiri dintra 'a to' casa, giurami, davanti a San Giuvannuzzu Decullatu, ca nni sta guardannu, di cca supira unni è misu, ca tu mi spusi!...
DON CICCINU
Ti lu giuru ppi l'armuzza di me' patri, ca è un giuramentu chiú sacru. Veni, Serafinedda!
SERAFINA
(si lascia trascinare e scompare, con lui, per il portoncino, che si richiude dietro di loro. Da lí a poco si chiudono pure le imposte del balconcino).
SCENA XVI
Peppi l'orvu, poi Mastru Austlnu.
PEPPI
(a tentoni, ajutandosi col bastone, viene dal vicolo, si ferma sotto l'icòna e, dopo breve introduzione di violino, canta, accompagnandosi col medesimo)
Lu Battista quannu apprisi
La terribili sintenza,
Li so' vrazza 'n celu stisi
E prigò l'Onniputenza.
(mentre Peppi canta, sopraggiunge Mastru Austinu, mezzo brillo, e va difilato in casa).
MASTRU AUSTINU
(dall'interno) Serafina!... Serafina!... Serafina! Unni si'? (esce, da lí a poco, tenendo in una mano l'involto con la biancheria e ne l'altra il pezzetto di carta scritta) E chi veni a diri?... Chi c'è scrittu, cca?... Di tutti 'sti 'gnuranti e cretini di 'stu' curtigghiu non sapi leggiri nuddu!... Bestii, somari!... (battendosi la fronte) Si nni fuju!... Certu!... E unni si ni fuju? E ccu cu' si nni scappau?... E comu, 'ntra un vidiri e svidiri?... E cu' l'ha' a sèntiri, ora, a 'dda curtigghiara di so' matri? (in preda alla piú grande costernazione) E 'u zitu?... Sugnu persu, 'u zitu?... Ci desi la palora di re!... Cu' cci l'ha a diri, a Oraziu, ora?... (all'indirizzo dell'icòna) E vui, San Giuvanni pp'abbuffunísumu, chi santu siti, d'accussí, ca v' 'a faciti fari sutta l'occhi?... Prima vi faciti rubari l'ogghiu, po' 'i cristiani! ... Chi schifiu siti, ah? (rientra frettolosamente in casa).
PEPPI
(dopo il solito ritornello col violino, canta c. s.)
Lu Signuri, unn'era misu,
Ci mannò pri lu so' fini,
Di lu santu Paradisu,
Du' angileddi sarafini.
MASTRU AUSTINU
(tornando con la scaletta, che appoggia al muro accanto all'icòna, afferra Peppi per una spalla e, scuotendolo) A cu' è ca stati cantannu ah?
PEPPI
(smettendo meravigliato) A San Giuvanni Decullatu! Oggi nn'avemu vintitrí, è vigilia...
MASTRU AUSTINU
Quali vigilia, quali festa, quali santu e quali madonni? Vo' jtavinni! ...
PEPPI
Pirchí?... Sbagghiai, forsi?... Non è cca, 'a 'cona di San Giuvanni Decullatu, di Mastru Austinu 'u scarparu?... Non siti vui, Mastru Austinu?
MASTRU AUSTINU
(montando sulla scaletta) Nenti, non c'è chiú litania, non c'è chiú 'cona e non c'è chiú santu! Chistu è un imbecilli qualunqui, ca inveci di fari miraculi a' ritta 'i fa a' riversa! (strappa i fiori e i ramoscelli, e li butta via, poi, saltando, soffia violentemente sui ceri e sulla lampada, spegnendoli).
Tela