Sül plain mezdi, in üna val lontana,
üna cull'aint il pet, sainz'am schmuantar,
(la ferida rendand tuot spranza vana)
meis sang sentiva guot a guot cular.
Ot intuorn a la val grippa s'dozaiva;
süls cuolmens gelgs, sün mai stendü giodim,
cun tuotta forza il sulai ardaiva -
eu durmiva da mort il sön ultim.
Ed eu sömgiaiva: festa splendurainta
dalöntsch in patria, tanter glüms e fluors,
da giunas üna rotscha surriainta,
leidas am manzunand in lur discuors.
Üna, sainza tour part a l'allegria,
sezza sco pers'in seis impassamaints;
ün sömmi sul implescha l'orma sia
(Dieu sa quant trista!) da presentimaints.
In sömmi vezz'la üna val lontana,
cuntschaint in quell'ün muribund stendü,
la ferid'aint il pet füm'amo plana,
e s'inquagliand il sang staliva sü.