Säk veütik (2)

From Wikisource
Jump to navigation Jump to search

Säk veütik, keli ebitopobs liladanes obsik in nüm 5 gaseda obsik e keli enemobs tiemo timoik, jinom evedön bevüno dlanik. Ibo vpagaseds tel udepuboms vemo luvelato denu finü yel at e nog aniks nemödikas nog sibinöl osukoms in yel suköl. Pluo epidobs, mutön liladön laltügi taelöl ta ployeg in »Volapükan belgänik«. Penet laltüga et kanom estudön te nedibäliko omi (äs jinom valiko no eliladön jünu gasedi obsik, sevöl nena kuladiko tiädi bleda obsik) bi nunod omik dö ployeg ninom sägo notedis nevelätik, a.s. dö delids gaseda, kels no sötoms suämön frans 12.50 segun lenun penela, sod te fr. 10. Sukü atos tikad liladelas de »Vpan« dö ployeg mutom vedön pölubik. Nedunobs bepükön is kuladikumo laltügi et, kela tonabalieni alik kanobsöv tablofön, bi penunobs bevüno, das sepükom cedi te plivadik, no uti vpafeda belgänik. Spelobs, das nüm suköl de »Vpan belg.« oninom kuladikumosi dö ployeg, so das liladels gaseda okanoms it getön tikadi velätik dö din.


Cif vpakluba Hannover e redakel bleda at pebegom, fomön komitefi, äs imobobs, al mekön plepadamis zesüdik plo volekam ployega. Elovesumom plo klub komiti at, do dunöf komitefa pofikulom boso dub mobin cifa, kel kanom klu melakön te penädo ko kopanals votik komitefa. Ebeginobs ya tivis ko redakels vpagasedas nuik, al getön läsevi e kevobami omsik plo beginot pübma gaseda gletik. Jünu pübles spet. redakels de Vpagased valemik, Timapenäd plo D. e N., Vpan belgänik e Volapük (Hannover) binoms vilöfik, yufön omi. Emekobs i ya lensäkis al bükens anik gletik, al panunön dö delids gaseda somik e klu kanön nolön, va e in glet kiom gased okanom foviko pubön segun num pegetöl bonedelas, bisäöl dido, das popübom in fomät obsika, keli cedobs kovenikün e pötikün.


Obinos vemo pöfüdik plo vobs koitefa (Kopladam statudas gaseda...) if vpans e redakels vpabledas osepükoms ome al ladet cifa cedis okas spet. omekoms votamobis. (Kopanals spodöl vpakluba Hannover cedomsöd begi at as lensäki kluba, keli sötoms gepükön. Mobs pato veütik pokonsidöl popüboms i in bled obsik al bepükam maniföfik. Junü egetobs penodis te nemödik tefü yeg at, so veütik plo füd vpadola. Pübobs in penedi söla F. L. Hutchins in Worcester, Nolümelop: »Läsevob ladliko mobi in nüm 5 ola, labön gasedi bal e desidob dunön valikosi, kelosi kanob, al yufön omi. - Opelob doabis tel u ba kil e openob bosi, if atos podesidos. - Gased bal leveütik obinom gudikum ka mödiks. - Cedob, das no binos vemo zesüdik, begön votikanis, zedön pübami, ab mekön gasedi bevünetik so gudik, das ozedoms, bi def bonedanas omütom finön.« Spelobs, das bit söla at tefü yufam gaseda otuvom posduni valemik, täno no nedon dledön plo sibinafäg gaseda. Disein e ninöf gaseda, dö kels tikads nog teldik nevelätik jinoms sibinön, pajonom kleiliko dub sezük suköl se pened, kel polovegivom i komitefe: Disein gaseda binom, nunön liladelis okik dö valikos, teföl döli püka bal bevünetik e mebön vavigo liladeles sibini vpa e gletön me atos nitedi plo döl e lanimön omis al vob gönü pakam vpa, kel jünu etuvom paki gletikün. Jäfomöd valikosi, (sesumü rel e bolit) kelos kanos nitedön liladelis, no fögetöl, das ats lönoms netes difikün, e läpolomöd al seivam balvotik omas. - Sikodo i redak sötom bonedön vpa e vapükagasedis valik puböl, al kanön nunön liladeles okik valikosi, epuböl tefü döl pükav bevünetik . . . Gased, no binöl beginot spegik, steifomöd pubön 8 flaniko vavigo e gletomöd, a ma num gloföl bonedelas, spadi jü flans 16. Täno steifomöd pülön bonedasuämi, al givön menes aimödikum mögi, bonedön omi . . .«


Tatopü ced rigela moba, kel vipom pubami vavigik gaseda foviko, pübam vamulik gletü flans 16-32 jinom obes sätik begino o. b. luüno du yel(s) balid; latumo dido, if nited plo vapükadöl pebelifom denu umo, pubam ofenumik obinom viplik e zesüdik. Atoso potamon mödik e delids sedama (Expedition) pospäloms. Zu redakef gaseda ukonletom du yels balid plakis sätik, al mekön mögik pübami ofenumik, ab deno nomamafik gaseda, kelos ibedotobs voto plo begin.




Se Volapük: Gased al pakam Volapüka 1894, Nüm: 6, Pads: 1-3.