Roca zıwananê Dınyay sera

9.02.2017 de Enqara de Koma Zazaderi’ê Çoligi (Bingol) jü şênatiya de gırse kerde. Her caê welati ra xeylê şarê ma uca rest pê. Na şênatiye de Zazaki qesey bi, Zazaki tiyatro u lawıki vaciyay. Taê Zazaê ke partiyanê Tırku de siyaset kenê, i ki amay bi. İne ki serba Zazaki xeylê çiyo wes vat. Hama hetê dewlete ra çiyo ke vat, raşt nêbi. Dewleta Tırki ne Zazaki rê, ne ki şarê Zazau rê çiyê ardo ca. Dewleta Tırki hona şarê ma vılêsnena ro (asimile kena), na wastena xo ra peyser nêvınıta. Sarê Zazau ebe na siyaset kêwaanê Şarê Zazau (Zaza milletvekilleri) inam mekero. İ rivatanê tersê na karê siyaseti ra nêşkinê raşti vacerê. Cevdet Yılmaz vano, “Şarênia Etniki mekerê!” Cevdet Yılmaz nae tersanê dugela Tırku ver vano. Tewr şarênia faşizmi Dewleta Tırki be xo kena. “Jü mılet, jü Zon, jü bayrağe, jü dewlete, jü din.” Zuqane na çekuyu her ca de vanê.

Roca Zonanê Dina sero jü şênatiye ki Estamol de hetê Zazaderi ra vırajiye, uca ki Zazaki sero xeylê şarê ma reşt be pê.

Yê hirêyine ki Almanya de suka Frankfurti de Cematê Zazayanê Almanya, zerrê suka Frankfurti de jü honıke (stand) kerdi bi ra, broşur u kıtabi nay bi ro, Zazaki muzik bi. Jü ki nejdiyê çewres (40) şinatkar u nuskaru ebe videowo kılmek mesaj da. Na video nıka ra zerrê dı roci de 4000 (çar hazar keşi) tey nia do (sêr kerdo). Zaf ki bare biyo. Emser karo ke Zazaki ser biyo, serba na kari sarê ma tenêna biyo hayıg, biyo haydar. Sarê ma ra xona zaf nuskari estê, xona zaf siyastkari estê, xona zaf komê sukanê welatê ma estê. İne xona dest ra na kari nêesto. Zor bıkerime, her kes zonê xo rê, sarê xo rê wayir veciyo.

Emser roca zonanê dina 21yê Gucige de Zazaki ser xeylê karê de rındi bi, rocnamu (qezetu) de Zazaki sero, karê Zazaderu ser zaf nuşti u xeveri veciyay. Na ki ma xeylê kerdime sa, ma zaf bime sa, hama xona rae ma ver de zaf derga. Xo dest ra, ra meverdê, asanêni u gıraniye ro sıma ser megıno. Ma salê bıgurime ke, dewa xo raveri berime, sarê ma zonê xo re wayir veciyo. Na sabiyaene, ma xınc u xav, sıst u pıst, ma gangaz mekero. Berzime xo ver ke na dina de ma ki bımanime.