Rin po che spung ba

@1
74
bod skad du
rin chen spungs pa yon tan chen po ston pa rgyud kyi rgyal po zhes bya ba
bcom ldan 'das dpal kun tu bzang po mnyam pa nyid du shes pa kun gyi rje la phyag 'tshal lo
'di skad bdag gis bstan pa'i dus gcig na
snang ba rnam par dag pa sna tshogs pa dang yon tan thams cad kyi 'byung khungs
gnyis su med pa rin po che'i gzhi gsal ba tshad med cing
gzhal du med
dpag tu med
dmigs su med
75
bltar med pa'i dkyil 'khor chen po rang shar
mi 'gyur ba'i ye shes lnga'i rol par rang shar nas
theg pa spyi dang rang gi lta ba gcig ma yin
tha dad ma yin
mnyam pa ma yin
mi mnyam pa ma yin
so so ma yin gcig tu mi gnas pa'i gzhi tshad med pa 'di ni
chos thams cad kyi byung khungs su ye nas gnas pa'o
de skad du rang gis rang doms pa'i tshig tu rang shar ro
'di skad bdag gis thos pa'i dus gcig na
bcom ldan 'das kun tu bzang po rin po che 'bar ba rgyan spungs pa zhes bya ba nyid
76
bkod pa rnam par brgyan pa rin po che 'od 'bar ba zhes bya ba'i nam mkha' la
sangs rgyas thams cad kyi sku rdo rje dang
gsung rdo rje dang
thugs rdo rje dang
gnas pa chos kyi sku dang
snang ba longs spyod rdzogs pa'i sku dang
shar ba sprul pa'i sku dang
de dag gi khyad par gyis snang ba rnams dang
'jig rten pa dang
'jig rten las 'das pa'i gzugs 'dzin pa bsam gyis mi khyab pa thams cad dang
chos kun ro gcig pa ye shes chen po'i rol pa la thabs gcig tu bzhugs so
de nas sangs rgyas thams cad kyi che ba rang byung gi tshig 'di dag rnams sus kyang bshad pa med par rang byung ngo
e ma ho
ngo mtshar chen po rmad kyi chos
byas pa med pa'i ngang bzang nas
skye ma myong ba'i gzugs kyi sku
thob pa med pa'i rang lus kyi
ma bsgrubs chen po'i sku thob nas
thos ma myong ba'i chos kyi gtam
ma bsgrags grags pa'i tshul gyis ni
ye nas gleng ba'i don rnams kun
'di yi tshul du rang shar te
spros med spros pa'i rgyu med pas
77
chos kun mnyam pa chen po ni
nga yis bshad kyis nga la nyon
'dus pa med pa'i ngang nyid nas
'bral ba med pa'i sems sangs pas
ma phyin rang sar 'dug pa'i gnas
mi snang ye shes med ston pa
mi 'byed shes rab chen po'i 'khor
gcig pas tha mi dad pa la
gleng bral brjod pa med pa yi
tshig gi rgyal po 'di dag kun
mig gi mthong byed med pa yis
ma bltas med pa'i yul gzigs nas
lus med bsam bral thugs las ni
ma grub pa yi mgur nas drangs
sma med mi snang ljags la yang
spros med mi 'dzad tshul du bkram
ye med stong zhal nas ni
'gro dang 'ong med dbugs las byung
ma bsgribs dngos med tshims la yang
brjod cing bshad pa'i rten med par
ma gsungs thos pa'i tshul du shar
78
dus gsum dus med khyad par las
bar dang mtshams med rtag rgyun gyis
thog ma bar dang mtha' med par
dus tshod grangs rnams ye zad par
mnyam pa chen po'i sgra las ni
yengs pa med pa'i snang ba yang
rnam rtog rang la cha med par
rang bzhin rdzogs pa chen po yi
don kun blo yi dkyil du tshud
mi snang yul kun rtog pa yang
ma bcad rang sa nyid du chod
'khrul ma myong bas ma rig rtsad
ma brtags ye nas chod nas 'dug
gang du 'di kun sus ma tshor
rags pa'i 'byung ba bzhi kun yang
thog ma nyid nas rang dengs par
'gro ba'i gnas med rang sangs pas
rang lus ye nas med par ni
snga phyi med par 'dir yang rig
'di kun dus med ye dus pas
gcig dang gnyis dang drug gsum gyis
snang med snang dang snang phyed snang
mi snang mdzad pa'i sgra rang sangs
sa 'dzin sa la gnas par ni
79
ye nas 'dug pa sus ma tshor
bgrod du ye nas med pa yi
lam 'di ye nas rang nye bar
'di ni rang la ye 'dug pas
sngar ma mthong ste rang rig rtul
mi gnas bsam 'das dgongs pa ni
bsgom pa med par ye 'dug pas
'di yang ang gis sngar ma rig
chags dang 'dzin pa'i zhen yul ni
dang po nyid nas chos nyid las
'di kun rang gi rang snang bar
ye nas snang ba sngar ma rig
bdag rtog bcings pa nyon mongs lnga
ye nas rig pa rang shar bas
lhan cig gnas pa zhal ma 'tsho
sa chu me rlung 'byung ba bzhi
ye nas rang gi lus yin par
sus ma mthong ba'i mig de brtul
yang gsang bsdus pa'i man ngag bcud
bar mtshams med par rang rags pa
gang gis 'di nyid ma thos par
rna ba'i dbang po med dam ci
rang gnas dbyings dang rig pa'i dri
bral ba'i skabs med rang 'khor ba
tshor ma myong ba sna 'gags sam
bcud gsum man ngag gig dril lo
ye nas lus sems bcud yin pas
'di nyid ma myong lce chad dam
80
snang ba rang 'od kha dog rgyan
rang gi lus dang 'bral med par
lus dang grib ma bzhin du ni
nyin dang mtshan mo med 'dug pa
sus kyang ma rig lus bem ma ma
sdug bsngal phyag 'ded bde ba'i chos
brjod pa med par rang gnas pa
sus ma shes pa blo ri brtul
'khor ba'i bag chags yang brtsegs pa
ye nas chos kyi skur 'dug pas
gang gis ma mthong snying rje'i gnas
dbang po bdag rtog yul shar nas
dran bsam 'gyu ba sna tshogs rnams
ye nas longs skur rang shar bas
'di kun ma dran brjed ri ngas
bya byed tha dad rtsol bsgrub dang
skye bo 'dus pa'i ca co kun
ye nas sprul pa'i sku yin pas
sus ma shes pa ngo re brtul
ci ltar bsam dang dran 'gyus pa
chu yi rgyun bzhin bar med par
rtag tu rang gi yid 'phrog par
rtsol med rang bzhag bsgom par ni
nyams su ma tshud sems re yengs
snod bcud yod thos snang ba 'di
brtags pas rang bzhin med pa yang
grong khyer rgyun gcod lta ba ni
ye nas 'dug pa ma mthong bar
81
dbang po rnams kyi sgo 'gags sam
'di kun ma phyed 'byed med par
mi snang med pa'i yul nyid du
ma lus yod pa'i 'khor rnams la
ma bshad gsungs pa med pa yi
tshig gi rgyal po rnams su ni
mi snang gcig pa'i 'khor rnams kyis
su la zhus pa med par ni
rna ba'i dbang pos ma nyan par
ma glengs bsgrags pa'i tshul du snang
ma gtad rang sor bzhag pa yi
sems kyis 'di yi tshig kun kyang
sus kyang bslab pa med par ni
so so'i blo la go bar snang
'di nyid rang gi blor go bas
mi snang rtog pa med pa yis
snang ba thams cad rang dag nas
thams cad zang ma thal byung du
stong gsal chen po'i rigs su 'gyur
sa chu me rlung 'byung ba bzhi
so so'i nus pa mi snang bar
na bun bzhin du mkha' la dengs
'khrul pa'i zhen pa sna tshogs ni
ci ltar bsam kyang skye med par
gzung 'dzin cha rnams rang 'gags nas
gang mi snang ste rang zad nas
gsal byed rang gi nyams myongs pas
lus can kun kyang de bzhin song
82
lus med rnams ni smos ci dgos
sus kyang gleng ba med pa yi
ngo mtshar tshig ni 'di kun gyis
ston pa 'khor dang sdud pa kun
rang bzhin gyis ni dal ba thob
de skad sus kyang ma gsungs pa'i rang shar ba'i tshig tu rang byung bas
ston pa kun tu bzang po dang sangs rgyas thams cad kyi sku gsung thugs kyi 'khor lo la sogs te
'jig rten pa dang 'jig rten las 'das pa'i 'khor dang bcas pa rang byung gi ye shes dang ldan par gyur nas
rang rtog gi zhen pa rnams las grol lo
zhes rin chen spungs pa chen po'i rgyud kyi rgyal po las
rang byung gi ye shes rang gis rang rnyed pa zhes bya ba ste
gleng gzhi rang grags kyi le'u ste dang po'o
@2
de nas ston pa kun tu bzang po rin po che spungs pa'i rgyan zhes bya ba des
'khor de dag la bos nas 'di skad du tshig gi don rnams rnam par bskul lo
kye ma phyogs bcu'i 'jig rten steng dang 'og gi yang
khams gsum nas ni sus kyang ma gsungs pa'i
gsang ba ngo mtshar chen po rmad kyi chos
'di ltar bdag sogs rnams kyi blo gting yid ches bya
83
'di don sangs rgyas stong gis byin brlabs pas
'khor ba'i bag chags rnams ni gtan nas sbyangs
gsang chen nges pa'i tshig 'di sus thob pa
bla med mchog rnams 'di yis ngang du longs
de phyir nges pa'i snying po 'dir 'jug bya
zhes gsungs pas
'khor de dag gi nang nas
sangs rgyas thams cad kyi gsung rdo rje zhes bya bas 'di skad ces gsol to
kye kye rin chen spungs pa yi
ston pa kun tu bzang po nyid
sngar yang ston pas ma gsungs pa'i
tshig gi rgyal po de dag kun
ston pa gang gis gsungs pa lags
de yi 'khor ni su zhig yin
gnas ni gang na tshig de gsung
'di kun bdag gis ma rig na
ston pa nyid kyi thugs rje yis
thugs kyi dkyil nas bcud phyung la
bdag la 'di kun gsung bar zhu
de nas ston pa'i gsung gis yang
rdo rje 'chang chen khyod nyon cig
ngas bstan pa la nor ba med
ma 'khrul nor med sems kyis kyang
khyod kyis 'di kun blo la zhog
84
gsang mchog nges pa'i tshig 'di kun
ston pa sus kyang gsungs pa med
rang byung chen po'i nam mkha' la
rang rtsal rig pa ma 'gags pas
spros med chos nyid rang sgra ni
ma bstan rang byung chen po yang
thog ma nyid las rang grags par
rgyun ma chad pa'i chos kun gyis
rang gi sgrar ni ye nas grags
de phyir rang byung chen po zhes
tshig gis mtshon pa kun tu 'byung
de phyir rang byung ye shes zhes bya ba
rang gi rang byung rang shar ba
chos nyid stong pa'i rang sgrar ni
ye nas chos kyi 'khor lo bskor
rang byung chen po'i tshig tu'o
de la 'khor du snang ba med
snang byed 'dzin pa'i cha dag las
phyi yi yul rnams 'khor ltar snang
las dang sems gnyis 'dus pa yi
'byung ba 'dus pa'i gzugs med pas
'khor du snang ba tsam du med
rig dang ye shes khyad par las
dag pa rang ngo mtshon pa yis
85
snang ba rags pa'i phung po ni
snang byed 'dzin pa'i 'khor gyi tshul
'di ni rnal 'byor gsang ba'i mchog
'di yi gnas ni 'di zhes bya
ming du grags pa'i mtshan bcas yul
rnam pa gang du mi snang bas
med pa'i stong pa chos 'byung las
gsang ba chen po'i ngang dbyings su
ye nyid nas ni gnas pas na
ma bzung gnas kyi tshul can du
rol pa chen por thog mar byung
'di la sus kyang gnas pa med
gang gis gnas su byas pa med
'di la phun sum tshogs pa med
'dug cing 'ong ba nyid dang bral
de bzhin ye stong chen por gnas
med pa las ni dbyings kyi tshul
'di la phyi dang nang yang med
steng dang 'og tu blta ba med
phyogs dang mtshams su sus kyang yang
'di la bzung ba cung zad med
len med don 'di sus rig pa
kun bzang nga bas sngar sangs rgyas
ye thog dang po'i sangs rgyas kyi
mi gnas ye shes chen po'i gnas
sngon thog nyid kyi gzhi ru yang
ma bzhag ye nas gnas pa'i tshul
'di la gnas su 'dzin pa'i mi
86
sangs rgyas kun gyi gsang ba'i gnas
'di yis snying po byang chub par
'dzin pa nyid du 'gyur ba yin
zhes gsungs pas
ngo mtshar chen po'i sprul pa rnams rang sprul te thams cad du snang bar byas so
de nas gsung gi rdo rjes
bcom ldan rin chen spungs pa'i rgyan kun tu bzang po la 'di skad ces zhus so
kye ston pa chen po lags
ngo mtshar ba zhes bya ba'i tshig de ci lta bu lags
'di bdag la bstan du gsol
zhes zhus so
de nas ston pa kun tu bzang po rin chen spungs pa'i rgyan gyis chos thams cad yon tan gyi 'char tshul cir yang ma 'gags par gzigs pas
rang la rang ngo mtshar te
rang gis gad mo chen po'i rnam pa nyid kyis nyid la rang dgod pa'i 'od dag ljags kyi dbang po las rang shar ro
kye sangs rgyas thams cad kyi gsung gi rdo rje snying po
lta ba rang byung gi ye shes la ltos dang
dge sdig dang lta sgom las 'das pa ngo mtshar
gzhi ma bskyod pas lus ngag gi bya ba ci byas kyang phan gnod dang bral ba ha ha
kye gsung gi rdo rje dngos po gshis kyi gnas tshul la ltos dang
87
snang ba 'di spu ma rjes mdog ma bsgyur ba ngo mtshar
bde sdug ci ltar bsams kyang don la 'gyur ba med pa ha ha
kye gsung gi rdo rje stong pa chen po kun 'byung gi ye shes nyid la phar ltos dang
dran bsam gyi spyod pa sna tshogs ci byas kyang rol par rang shar te ngo mtshar
ci ltar byas kyang skye med kyi klong du 'gag med grol ba ha ha
kye gsung gi rdo rje nyid kyang nyon dang
chos nyid stong pa kun khyab kyi ye shes la ltos dang
skye ba med pa dang ye nas lhan cig tu gnas pa ngo mtshar
skyes bus mtshon rnon po thogs nas 'gro ba rnams dus gcig la bsgral kyang
gang zag de'i rgyud la phan gnod dang bral ba ha ha
gsung gi rdo rje rang gi shes pa stong pa kun snang gi ye shes la ltos dang
gang ltar snang ba thams cad rang gi grogs su shar ba ngo mtshar
ci ltar snang yang rang bzhin las ma g.yos pa ha ha
kye gsung gi rdo rje rig pa stong pa kun grol gyi snang ba la ltos dang
rang gi gnyen por rang che ba ngo mtshar
nyon mongs pa rnams rang gis rang grol ba ha ha
kye gsung gi rdo rje rig pa stong pa kun dag gi ngo bo la ltos dang
88
'bad rtsol med par 'bras bu rang la rnyed pa ngo mtshar
gcig zin pas 'khor 'das thams cad gnyis med du dag pa ha ha
kye gsung gi rdo rje ngo bo stong pa chen po kun bzhag gi tshad la ltos dang
'gro drug sku gsum du snang ba ngo mtshar
'gro ba rnams kyis bsgom pa rdul tsam gyi cha yang ma byas par dus gcig la sangs rgyas pa ha ha
kye gsung gi rdo rje sku gsum stong pa chen po yi rdzogs kyi 'bras bu la ltos dang
dus gsum 'du 'bral med pa'i chos nyid ngo mtshar
pha rol tu phyin pa drug ma spyad par tshogs rnams dus gcig la rdzogs pa ha ha
kye gsung gi rdo rje rig pa cer bzhag stong pa chen po kun mnyam gyi ye shes la ltos dang
bya byed thams cad rgyan du shar ba ngo mtshar
spang len thams cad lta bar grol ba ha ha
kye gsung gi rdo rje stong pa'i stong pa ye stong chen po la ltos dang
sangs rgyas thams cad g.yang sar 'dug pa ngo mtshar
bya byed bsgoms pas ltung bar 'gyur ba ha ha
kye gsung gi rdo rje mi stong pa'i stong pa dngos can la ltos dang
89
med pa la bdag tu 'dzin pa'i theg pa ngo mtshar
skyes pas skye med thob pa ha ha
zhes gsungs pas
gsung gi rdo rje la sogs pa'i 'khor de dag rnams ngo mtshar chen po'i tshig gis rab tu tshims nas
snang ba thams cad ngo mtshar chen por shar nas
rang snang rang grol rang thob nas
sku rdo rje dang gnyis su med par gyur to
ston pa nyid kyis ma gsungs pa'i gad mo chen po rang la brgad pas
rang la rang ngo mtshar skyes so
zhes rin po che spungs pa'i rgyan zhes bya ba rgyud kyi rgyal po las ngo mtshar mchog gi le'u ste gnyis pa'o
@3
de nas sangs rgyas thams cad kyi gsung gi rdo rjes 'di skad ces gsol to
kye ma ston pa kun tu bzang
gzhi zhes 'char tshul ji lta bu
yon tan 'char tshul ji lta bu
yon tan 'char sgo gang tsam lags
stong pa nyid la ji lta bu'i
yon tan rdzogs tshul bdag la gsungs
de nas nyid kyis bka' stsal pa
skye ba med pa'i cho 'phrul las
sangs rgyas rnams kyi mdzad pa ru
90
ye nas 'byed pa med par ni
ma 'gags 'gag pa med par yang
snang ba nyid ni ye dag par
rang gi ngo bo gnas pa ste
mi mjed thugs rje chen po las
lhun grub dag la ma nges par
'char byed brgyad kyi tshul du byung
de ni snang tshul ma 'gags pas
thugs rje lta bu'i 'char tshul las
sems can kun gyi skyob pa'i gnas
snang ba rang gsal 'gag med pas
'od lnga'i gsal byed tshul du snang
mkhyen pa'i snang cha ma 'gags pas
ye shes dag pa'i sgo nyid du
snang ba 'gag med lam ltar shar
rang snang lus kun mtha' rdzogs phyir
chos rnams kun gyi sku ltar snang
shes pa'i ngo bo gcig yin pas
gnyis su med pa ltar yang shar
de nyid rang sar gnas pa med
mtha' grol chen po'i snang ba ni
nges med lhun grub gzhi la snang
rig pa zang thal gcig rdzogs phyir
dag pa ye shes nyid kyi sgor
ngo bo nyid dang 'brel ba'o
'byung tshul 'gag pa med pa'i phyir
sems can rnams kyi 'byung khungs su
ma dag 'khor ba'i sgo ltar yang
91
khyab byed snang ba'i cha la shar
'di kun 'char byed brgyad du snang
'byung ba'i tshul du rang shar bas
lhun gyis grub pa'i snang ba zhes
rin po che yi tshul du snang
de ltar stong gsal chen po las
ci med cir yang snang ba'i tshul
byung tshul yon tan ma 'gags te
lhun grub 'char byed ma 'gags pas
sna tshogs snang ba'i rang bzhin du
yon tan chen po rnams su snang
'char byed sgo rnams brgyad la yang
yon tan brgyad kyi tshul du shar
rig drug 'bros khung rang bcad nas
'khor ba'i dpyad thag chad pa rnams
snying rje'i zhags pas bzung ba'i phyir
skye shi'i gzugs kyi smes can la
thugs rje chen po nyid du snang
'khor 'das rang 'brel yon tan du
gnyis cha 'dres pa'i tshul du snang
'di med 'khor 'das lte chad pa'i
rtog pa med pa'i skyon 'gyur bas
yon tan byung tshul 'di tsam mo
sangs rgyas kun gyi rang yul la
lus dang grib ma ci bzhin du
snang ba'i 'od lngas khyab pa'i phyir
92
nang gi snang cha rang gsal bas
'od lnga'i tshul gyi 'char sgo las
yon tan gsal byed phyir ma shor
'di med sems can rang 'ong la
rgya chad kun tu chad par 'gyur
zung 'jug 'char byed 'brel pa'i phyir
rang snang yon tan chen po 'byung
lus kun gcig tu 'dril ba'i phyir
sku gsum gcig tu gnas pas na
ngo bo sku yi rang bzhin du
rang snang nang du mi 'byed pas
ngo bo gsal byed sku lngar shar
'di med ngo bo mi rnyed par
lus kun rdzogs pa'i sku ltar snang
de kun tha dad ma yin par
gnyis med mnyam par gnas pas na
'byed med gnyis su med pa yi
snang bas phyi dang nang kun du
khyab byed chen po'i tshul du shar
'di med rang ngo tha dad pas
'khor 'das 'dres pa'i mtshams mi sbyor
rang sa nyid las mi grol bas
bsgyur bzlog med pa'i skyod 'gyur bas
snang byed yon tan tshul du shar
shes bya kun la rab khyab pas
bzhi sbyor chen po'i snang ba ni
'khor 'das 'brel pa'i lam du snang
93
'di med gzhi lam mi 'byor bas
ye shes bzhi yi lam nyid du
sems can rnams kyi gsang lam du
snang ba bzhi yi tshul du yang
cig char pa dang rim gyis su
dbang po'i sgo rnams yid bzhin snang
mtha' bzhi'i dri ma las 'das pa'i
'char byed yon tan ma 'gags pas
mtha' grol chen po'i snang tshul du
lhun grub rang rdzogs chen po las
nges pa'i ka dag la sbyor phyir
mtha' dang bral ba'i ye shes su
'di nyid rang byung rang shar bas
mtha' las grol ba'i snang bas na
ngo bo nyid dang 'brel bar snang
'di med nges pa mi thob pas
rgyu 'bras ldog pa'i skyon 'gyur bas
mtha' grol nyid du yang dag snang
yon tan 'char tshul ma 'gags pas
'khor ba skyed pa'i byung khungs ni
ma dag pa yi 'char sgo ltar
byung tshul 'gag pa med par shar
'di med 'khrul pa'i ming med pas
de phyir ma dag 'khor ba'i sgo
srid pa rnams kyi rgyu srid du
snang ba 'gag med tshul du shar
ma dag 'khor ba'i sgo zhes bstan
thod rgal ye shes yod pas na
dag pa nyid kyis dag pa mtshon
94
'char byed snang ba so so las
dag pa'i ye shes chen po'i sgo
zang thal rnam pa gsum du 'char
'di med rang rtsal mi rdzogs pas
dag pa'i ye shes chen po'i sgor
ngo bo ka dag rtogs phyir shar
kye ma gsung gi rdo rje nyon
de kun skyon yon 'char tshul te
rig pa nyid kyi yon tan nam
rol pa'i rtsal du thim lugs brgyad
lhun grub nges pa med pa'i gzhi
yon tan tshul du 'di lta bu
thugs rje nyid du thugs rje las
rang gis ngo bor rang thim pas
ma bzhag thob pa'i tshul gyis ni
mdzad pa med pa'i klong du 'das
mi mdzad cir yang ma yin pas
byed spyod thams cad mya ngan 'das
ma byas byed par sang med pas
'dus byas rnams ni dag pa'i klong
de nyid rang la rang thim pas
gzhan du song ba ma yin no
dper na nyi ma'i snying po la
rang gi zer rnams rang thim ltar
rang gi gdangs dang bcas pa yis
gzigs snang thams cad mya ngan 'das
'di kun yon tan rin po che
skyon la mi gnas rang sa'o
rang 'od rang la thim pa ni
95
'di yang yon tan chen por bshad
rang gi ngo bo rnam dag par
mtshan mar 'dzin pa'i zhen yul 'gags
'byung ba bzhi yi rags pa yang
'dir mi snang ste zhen pa log
rang dag stong pa chen po las
kha dog bdag 'dzin mya ngan 'das
'di yang gzhan du song ba med
rang gi ngo bor rang thim pas
snang ba thams cad mya ngan 'das
'od kyi dkyil 'khor rang thim pas
dper na nam mkha' 'ja' tshon nyid
nam mkha' nyid las rang yal ltar
mi 'byed chen po'i klong yangs su
'dzin chags thams cad mya ngan 'das
'di yang yon tan rin po che'i
yon tan 'char tshul 'di lta bu
ye shes nyid la ye shes nyid
rang gi ngo bor rang thim pas
shes pa 'dzin rtog dran bsam ni
rang gnas mnyam pa nyid klong du
thams cad gnyis med mya ngan 'das
so so'i ye shes snang cha yang
byas pa med pa'i klong dkyil du
nub pa med par mya ngan 'das
de nyid rang la rang thim pas
ye shes rol pa sna tshogs kun
96
rang ngo rang la thim pa ni
dper na ma pang bu 'jug bzhin
rang gi ye shes rang yid ches
rang gi rang bzhin mya ngan 'das
'di yang yon tan rin po chen
yang ni yon tan thim pa'i tshul
sku nyid sku la rang thim pas
gzugs sku mi rtog chen por na
snang ba med par mya ngan 'das
rags pas bsdus pa'i 'byung ba dang
phra bas gzung ba'i ma rig sogs
'byed pa med par mya ngan 'das
sku rnams rang ngor thim pas ni
shes pa'i gzung cha phyir ma shor
dper na bum pa'i sku gzugs bzhin
nang gsal phyi yi 'gyu ba rnams
rang bzhin med par gnas su dag
'di yang yon tan rin po che
yang ni yon tan 'di lta bu
gnyis med gnyis med rang thim pas
grangs su 'dzin pa'i zhen pa rnams
nyag gcig spros dang bral bar ni
mi gnyis gcig pa'i tshul du yang
rang thim nyid du mya ngan 'das
gnyis su snang ba rang thim pas
dper na chu bo chu bo la
thim pa bzhin du dbyer mi phyed
dbyar med chen por mya ngan 'das
'di yang yon tan rin po che
97
ma 'gags yon tan 'di lta bu
mtha' grol nyid ni mtha' grol la
rang gi ngo bor rang thim pas
sku gsum 'dzin pa'i rang rgyud kun
yul rnams zad par mya ngan 'das
mtha' gnyis rang dag rang thim pas
dper na nam mkha' nam mkha' la
thim pa bzhin du ngos bzung med
mu bzhi'i rtog zhen rang 'gags nas
mi gnas chen por mya ngan 'das
'di yang yon tan rin po che
snang ba'i yon tan 'di lta bu
ma dag 'khor bar rang 'jug sgo
ngo bo nyid kyis dag sgo la
song ba med pa'i tshul du thim
dper na sbra yi chon thag rnams
bsdus pas dbus su rang 'dus ltar
dbang po'i spyod yul mya ngan 'das
'di yang yon tan rin po chen
'di ltar yon tan cha rdzogs par
dag pa'i ye shes nyid kyi sgo
ngo bo nyid la rang thim pas
sku dang ye shes mya ngan 'das
dper na seng ges gangs zin bzhin
mi ldog 'jigs med gding rnams rnyed
'di yang yon tan rin po che
'di ltar yon tan 'byung tshul gyis
gcig par gnas pa'i ye shes so
98
ma btsal rang gis rang rnyed pas
sngon nas de yi rang bzhin no
zhes rin po che spungs pa'i rgyan zhes bya ba'i rgyud kyi rgyal pol las
lhun gyis grub pa nges pa med pa'i gzhi'i byung tshul bstan pa'i le'u ste gsum pa'o
@4
de nas sngon pa kun tu bzang po rin po che spungs pa'i rgyan zhes bya ba
de nyid chos nyid rnam par dag pa mnyam pa nyid gnyis su med pa'i rdo rje zhes bya ba'i ting nge 'dzin la bzhugs bzhin du
sangs rgyas thams cad kyi gsung gi rdo rje snying po la 'di skad ces bka' stsal to
kye ma gsung gi rdo rje nyon
ngas bstan tshig la 'khrul pa med
ma 'khrul ye shes chen po'i lung
nga yis bstan gyis khyod kyis zung
gnas pa med pa'i sems nyid 'di
'gro sa med pa ya re cha
kun tu 'jug pa'i yid drug la
bstan pa'i sa med ya re cha
thams cad bsdus pa'i kun gzhi la
bzhag pa'i sa med ya re cha
'khor zhing 'khrul pa'i ma rig la
'gyur ba'i dbang med ya re cha
thams cad yul zhen nyon mongs la
gzhi rtsa med pa ya re cha
phra dang rags pa'i dri ma la
99
chags pa med pa ya re cha
'byung ba rags pa'i gzugs rnams la
gtad pa'i sa med ya re cha
skyes bu brten pa'i tshe srog la
dus btab med pa ya re cha
tshogs drug yul gyi snang ba la
rtag pa med pa ya re cha
skyes bu'i dran bsam byung tshor la
zad pa med par ya re cha
lus las 'byung ba'i sdug bsngal la
dwang ba med pa ya re cha
kye ma gsung gi bdag nyid nyon
gzhi rtsa med pa'i sems nyid 'di
ma btsal bzhag pa ngo mtshar che
'gro dang 'ong ba'i rig pa la
thug pa med pa ngo mtshar che
ye gnas chen po'i ye shes la
gnyen po med pa ngo mtshar che
rang snang dag pa'i 'od lnga la
shar nub med pa ngo mtshar che
shar ba med pa'i sgron ma la
nub pa med pa ngo mtshar che
ma bkod gsal ba'i dag dbyings la
phyi dang nang med ngo mtshar che
cha phra spros med thig le la
lnga lngas brgyan po ngo mtshar che
mi 'gyur rig pa'i rang sku la
'gro 'ong med pa ngo mtshar che
snang ba rang dag chen po la
mtha' med rgya che ngo mtshar che
100
dbyings dang rig pa rang 'brel la
'gro ba med pa ngo mtshar che
stong pa chen po'i 'byung gnas la
mtha' dbus med pa ngo mtshar che
thog ma'i mgon po dri med la
'gran pa'i zla med ngo mtshar che
nyag gcig rang gnas dgongs pa la
bar mtshams med pa ngo mtshar che
e ma gsung gi rdo rje nyon
yang ni ya mtshan 'di lta bu
'di kun su yis 'dzin pa'i mi
sangs rgyas stong gi yon tan 'chang
de phyir 'di kun bslab bya'i yul
rtsol bsgrub rang dag spyod pa la
dgag bsgrub med pa ya mtshan che
rang bzhin bsam gtan par med la
bying rgod med pa ya mtshan che
gtad pa mngon gsum blta ba la
rang snang rdzogs pa ya mtshan che
ye yod 'bras bu rang thob la
dmigs gtad med pa ya mtshan che
ma bcos chos nyid cog bzhag la
thams cad gsal ba ya mtshan che
rang 'dzin log pa'i sku gsum la
cig char rdzogs pa ya mtshan che
brdal ba chen po'i nang dbyings la
mtha' la thug med ya mtshan che
stong pa chen po'i shes rab la
rdugs pa med pa ya mtshan che
101
'bras bu chos sku stong nyid la
dngos po zad pa ya mtshan che
dngos med ye shes zang thal la
gzung ba med pa ya mtshan che
rang bzhin babs kyis snang ba la
mthong ba med pa ya mtshan che
kye ma gsung gi rdo rje nyon
'dzin pa rang dag chos sku yis
spros med rang dag gzhal yas su
nyid dang dbyer med snang 'khor la
mtshan ma med pa'i gsung gis ni
spros pa med pa'i chos rnams ni
mi gnas rang zad thugs las phyung
ma gsungs gsungs pa med par ni
mnyam pa chen po'i ngang du bstan
rang gsal dag pa'i longs sku yis
'od lnga rnam dag gzhal yas nas
spros med bde chen gsung gis ni
sku lnga'i rigs kyi 'khor rnams la
dngos med dag pa'i chos rnams ni
ye shes lnga 'dus thugs las phyung
rnam dag 'od zer ljags la bkram
rang byung yi ge drug tu yang
ma gsungs rang byung chen por bstan
sprul sku dngos zhen med pa yis
chos 'byung gdul bya'i rnag gnas nas
102
rigs drug las sad skal ldan la
spros bcas tshig gi gsung gis ni
dbang por gad mos chos rnams kyang
dran pa rang gsal thugs las ni
dbang po don med ljags la bkram
theg pa grangs kyi chos su bstan
e ma ho gsung gi rdo rje snying
de ltar sku gsum rang shar bas
sems can byang chub sems dpa' dang
sangs rgyas kun gyi thugs kyang tshims
de bzhin 'gro rnams re ba bskangs
de nas gsung gi rdo rje yis
ston pa kun tu bzang po la
tshig 'dis zhu ba nyid ni zhus
kye kye ston pa kun tu bzang
de ltar sku gsum bdag med tshig
chos kun ro gcig nyid gsungs pa
de ltar gsungs pa'i don de kun
ma 'ongs sems can nyid kyis kyang
nyams su ji ltar blang bar bgyi
'di kun rim pas ma 'tshal na
'di rnams ston pas gsung bar zhu
de nas ston pas 'di skad gsungs
kye ma sangs rgyas kun gyi yang
gsung gi rdo rje khyod nyon cig
ngas bstan spros pa'i tshig rnams la
don ni che la grangs mang ste
'di kun bsdus nas khyod la bstan
103
'gyur ba med pa'i sems kyis zung
yid la rab tu 'jug pa yis
dang po dbang mchog nyid thob nas
bskur rgyu 'bad bcas nyid dang ni
rdzas med brda' yi dbang gis ni
mi 'gyur gzhi nyid gzung bar bya
de nyid brtan pa'i yan lag tu
dam tshig rnam gnyis bsrung bar bya
'di kun sngon du byas pa yis
theg mchog rgyal po'i nang du gzhug
de kun dngos gzhi 'di lta bu
'di dag blo rim rnam gnyis kyis
don gyi ngo bo nyams su blang
dmigs pa yul can blo rnams la
sgom dang bsgom bya'i thabs kun bstan
rig pa rang snang blo can la
lta ba'i thabs rnams gcig tu bstan
de kun sdom tshig rnam gnyis kyis
rim pa bye brag rnam phyes nas
skyes bu rnams kyi blo la 'jug
'di kun snang ba rang dengs so
de rim bye brag 'di lta bu
khrigs chags nyid du nyams su blang
bdag po bzhi yi tshul gyis ni
don gyi ngo bo bzhi yang zung
104
de yi yul rig rnam bzhi yis
'di ltar snang ba'i skye rgyun gcod
bzhag thabs man ngag rnam bzhi yis
rig pa gtan med gnas su bzhag
de don dgongs pa rnam bzhi yis
snang srid chos rnams bdar sha bcad
dus tshod gdams ngag rnam bzhi yi
chos rnams kun la rang phya na byas
dag lugs grol ba'i gnad bzhi yi
nyon mongs rnams la dbang bsgyur ro
de yi rang gi tshad 'bebs pas
dpe bzhis yid ches rang ngo bstan
mi 'gyur lta ba'i gding chen bzhi'i
mi ldog ye shes tshad kyang bzung
'di la goms par sus byas pa
rang bzhin rdzogs pa chen po la
'di yis reg go sa ma ya
105
'di ltar gang la snang gyur pa
ye shes kun kyang phugs su zin
gsang chen phyag rgya chen po 'thob
sangs rgyas kun gyis nges par bzung
'khor ba'i dong rnams dus gcig sprug
'khrul pa'i snang ba bdar sha chod
des na 'di la brtson par bya'o
gsung gi rdo rjes yang gsol pa
kye ma ston pa kun tu bzang
ston pa nyid kyis sngar gsungs pa'i
dbang dang dam tshig gnyis gsungs pa
'di la bdag ni the tshom skyes
bdag gi the tshom bsal ba'i phyir
ston pa thugs rje chen po yis
rim pas phye la bdag la gsungs
de nas nyid kyis yang gsungs pa
kye ma gsung gi rdo rje nyon
ngas bstan pa la the tshom med
khyod kyis yid gnyis spongs la zung
gang gis dbang bskur 'dzin pa yi
sangs rgyas kun la 'di yis rig
'di la skyes bus dbang thob nas
rig pa'i sku la rang dbang thob
de bzhin phyag rgya chen po thob
'di la sngags dang phyag rgya med
dkyil 'khor lha bcas mchod pa dang
'di la dgos don gang yang med
rdzas dang tshog bsham mi dgos
106
'jug dang ye shes dbab tu med
'on kyang bla ma'i gsung dag gis
gdams pa'i 'di la goms bya'i phyir
'di don 'jug pa'i brda don gyis
rang gi ngo bo'i tshig 'di nyon
a ho gsung gi rdo rje nyon
shar phyogs nam mkha'i khams su yang
khyod kyis gom pa kam kam bor
lho yi phyogs su kha ltos la
song la gom pa kam kam bor
bor la de nyid nyams myong spyod
de bzhin nub dang byang du yang
kha ltos gom pa kam kam bor
des ni rang sems gnyug ma yis
dkyil 'khor nang du zhugs pa yin
yang ni gsung gi rdo rje nyon
nam mkha'i dbyings su yar ltos dang
steng gi nyi ma rnam pa lnga
khyod kyi mig gis 'di la ltos
lheng lheng 'od zer rnam lnga ltos
des ni rang gi rig lha'i ngo
thog ma nas ni rang gnas bstan
yang ni gsung gi rdo rje nyon
yang ni bar snang stong pa la
je mtho je mtho yar song dang
song zhig song zhig slar ma ldog
des ni rdo rje lu gu rgyud
107
rang gi dbang du rang dbang gyur
nyon cig gsung gi rdo rje nyon
de dag kun gyi dus nyid du
phyin pas 'gro ba'i sa 'dug gam
'on te 'ong ba'i sa 'dug gam
med par shes pa de bzhin du
ma btsal don kyang de bzhin no
de dus bsrung ba'i mtshams 'das pas
med dang gcig pu phyal ba'i sa
sems nyid ma rtogs zhen med pas
rang sems rtog pas bsrung bya bral
de yi grogs su de 'gyur ro
zhes rin po che spungs pa'i rgyud kyi rgyal po las ngo mtshar chen po mchog gi brda'
rdzogs pa chen po'i rnal 'byor pa rnams la
brda' dbang du bskur bar bstan pa'i le'u ste bzhi pa'o
@5
de nas yang ston pa kun bzang gis
rang gi dam tshig 'di skad gsungs
kye ma gsung gi rdo rje yang
nyon cig nga yis 'di skad du
dag pa chen po'i tshig nyid du
'di skad bshad kyis khyod kyis zung
nga ni sgra tshad rang rig la
yon tan rin chen gter chen 'chang
'di ni bcangs pa tsam gyis kyang
zad pa med pa'i longs spyod thob
108
zad med 'di la gang gnas pa
nub pa med pa'i gter chen rnyed
gter 'di gang gis rnyed pa'i mi
nga yi yon tan 'di la rdzogs
chos can mtshan ma snang dus su
nga yi yon tan rang snang bas
'di la blang dang dong mi bya
'gro ba'i sdug bsngal myong ba'i tshe
nga yi bde ba rang shar yin
de dus bde sdug dbyer med na
nga yi yon tan 'di la rdzogs
dmyal ba byol song yi dwags kyi
gzugs su yul du snag ba'i tshe
nga yi sku la rol pa yin
'di la yang med pa'i mi
nga yi sku la 'di yis reg
gti mug zhe sdang 'do chags ni
zhe sdang dag po nam skyes na
nga yi rig pa rtog med yin
'di nyid rang gis rang grol bas
nga yi dmigs pa 'di yis mthong
yid kyi dran pa phyir snang tshe
nga yi shes rab rang dag yin
'di la rjes su bcos med na
nga yi sgra rnams 'di yis thos
bsam pa'i rtog tshogs 'dus pa'i tshe
nga yi ting 'dzin mi rtog bzang
'di la zhen pa'i blo med na
nga yi dri rnams 'di yis tshor
rags pa'i tshig la blo zhugs tshe
109
nga yi nyams myong shar ba yin
'di la gcig dang gnyis zad na
'dis ni nga yi ro la myong
'di ltar sna 'tshad thos tshad kun
kun bzang nga yi rol par shar
rol pa'i 'char byed ma 'gags pas
nga yi yon tan nyid du 'byung
yon tan snang byed ngas brtsams pas
zad par mi 'gyur zad pa med
de phyir sku gsum phyag rgya'i zhing
de nas ston pa nyid rang la rang ngo mtshar ba'i tshig gi rgyal po 'di rang byung du gsungs so
e ma ho gsung gi rdo rje snying po khyod nyon cig
rang gi rig pa nyid skye shi dang bral ba'i gnad kyis
sems can bye ba'i srog bcad pa dang
pha rol du phyin pa bcu rtag tu spyod pa'i gang zag la khyad par rdul tsam yang med par kun tu bzang po ngas bstan pa'o
kye sangs rgyas kun gyi gsung gi rdo rje
chos nyid la spros pa med pa'i gnad kyis
rtag tu stong pa nyid la goms par bsgoms pa'i skyes bu dang
stong pa nyid skad cig tsam yang yid la ma byas pa'i gang zag gnyis
'tshang rgya ba la khyad par rdul tsam yang med par kun tu bzang po nga nyid kyis bstan pa'o
110
kye gsung gi rdo rje rig pa nyid 'dus ma byas pa'i gnad kyis
'dus byas kyi dge rtsa dpag tu med pa byas pa'i dad pa can dang
srog gcod pa la rtag tu brtson pa'i mi gnyis la
tshogs rdzogs pa'i sgo la khyad par rdul tsam yang med par kun tu bzang po ngas bstan pa'o
kye gsung gi rdo rje rig pa'i ye shes la 'gro 'ong med pa'i gnad kyis
chos nyid kyi rtags sna tshogs lus ngag la byung ba'i skyes bu dang
thos bsam la blo skad cig kyang ma spyangs pa'i gang zag gnyis ngo bo mthong ba la khyad par rdul tsam yang med par kun tu bzang po ngas bstan pa'o
kye gsung gi rdo rje chos nyid la skye 'gag med pa'i gnad kyis
dmyal ba tsha grang nyams su myong ba'i skyes bu dang
sangs rgyas rnams kyi bde ba nyams su myong ba'i skyes bu gnyis la
rtogs pa'i skye sgo thob pa la khyad par rdul tsam yang med par kun tu bzang po ngas bstan pa'o
kye gsung gi rdo rje rig pa la 'gyur ba med pa'i gnad kyis
yid ches kyi spros pa chod pa'i skyes bu dang
bdag rtag par lta ba gnyis la kyad par rdul tsam yang med par kun tu bzang po ngas bstan pa'o
111
kye gsung gi rdo rje chos sku rang la yod pa'i gnad kyis
phyi rol du mchod pa dang
bstod pa dang
gsol ba sna tshogs btab pa'i skyes bu dang
las bya byed dang bral bar 'dug pa'i skyes bu gnyis la 'bras bu thob pa la khyad par rdul tsam yang med par kun tu bzang po ngas bstan pa'o
kye gsung gi rdo rje
de'i phyir na rang byung chen po'i tshig 'di dag la spyod pa'i skyes bu ni 'bad pa med par nyams su longs pa'i gding rnyed nas
snang ba dang sku gsum dbyer med du sangs rgya ba yin no
tshig 'di dag nyan thos dang
rang sangs rgyas la sogs pa'i nang du rdul tsam yang brjod par ma byed cig
de ci'i phyir zhe na
de dag rnams kyis tshig 'di kun thos pas skrag pa dang
sdangs pa dang brgyal bar 'gyur te gsang sngags rnams la mi mos te
yid byung das de'i rnam par smin pas sems can dmyal ba chen po nyams su myong bar 'gyur bas na
bstan cing thos pa dag lta ci smos te
rlung phyogs tsam du yang brjod par mi bya'o
112
gsung gi rdo rjes gsol pa
kye bcom ldan 'das nyan thos la sogs de dag kun
de ltar 'byung ba ci'i rgyu lags
zhes zhus so
bka' stsal pa
nyan thos dang rang rgyal rnams ni
skal ba med pas
gsang sngags rnams kyi snod du ma gyur bas na
blo chung ba'i phyir te
dper na khab kyi mig tu ras yug brdzangs pas 'gro sa med cing
shong ba'i skabs med pa dang 'dra'o
de nas ston pa nyid kyis kyang
rang gi che ba'i tshig rnams 'di skad ces ni rnam par bsgrags
chos sku ro gcig ma shes pas
tha snyad tshig la bden 'dzin par
lus kyis mi theg khur khur 'dra
dbyings rig gnyis med ma shes par
mi rtog lteng po sus bsgom pa
ri bo sked pa bsnyeg dang 'dra
shugs 'byung rang shar mi shes pas
bya byed rtsol ba sus 'dzin pa
ri mo mkhan gyi tshogs 'dzin 'dra
rang byung 'gag med ma shes par
snang ba bden gcig nges 'jog pa
lhon shing srog dang bral ba 'dra
sku gsum ye rdzogs ma shes par
des lung gzhan nas 'tshol ba ni
113
glang po'i rjes bcad ma rnyed 'dra
snying po bcud thigs ma shes par
rig pa'i rang gdangs ston pa ni
mkha' 'gro snying la zin pa 'dra
cog bzhag rang grol ma shes par
lta ba rtogs par khas 'che ba
dbul po rgyal por brdzus ba 'dra
lus ngag drod rtags ma rgyas par
skye med rtogs par khas 'che ba
lung pa stong pa'i rlung dang 'dra
lu gu rgyud la ma goms par
'khrul snang 'gags par khas len pa
mun khang nad gi mdzub bcug 'dra
bla med rgyud 'di ma shes par
nyams su len par 'dod pa ni
kha brag lam du zhugs pa 'dra
gsung gi rdo rje snying po khyod
de yi phyir na gsang ba'i rgyud
'di nyid 'dzin pa'i skyes bu ni
rang rig rnams kyi dbang thob ste
rgyud 'di bcang ba tsam gyis ni
rdo rje 'chang gi sprul par 'gyur
rgyud 'di su yis bklag pa'i mi
lta ba'i don kun sems la 'char
'di nyid su yis bris ba de
sangs rgyas kun gyi gsung la rol
de yi phyir na dam par bya'o
zhes rin chen spungs pa'i rgyud kyi rgyal po chen po las
114
khyad med mnyam pa chen po'i le'u ste lnga pa'o
de skad ces gsungs pas
sku gsung thugs rdo rje la sogs pa'i 'khor rnams rjes su yi rangs nas
bcom ldan 'das kyis gsungs pa la mngon par bstod do
rin po che spungs pa'i rgyud kyi rgyal po zhes bya ba
'bum phrag drug cu rtsa bzhi'i bcud phyung ba rdzogs so
rgya gar gyi mkhan po bi ma la mi tra dang
bod kyi lo tsa ba ska ba dpal brtsegs kyis bsgyur cing gtan la phab pa'o
dpal sngags kyi srung mas bka' 'di srungs shig
dam tshig nyams pa'i snying khrag 'jibs shig
sa ma ya
rgya rgya rgya
u ya a ga tha ma
rin chen spungs pa'i ? ma bu drug
dge'o dge'o dge'o