Riemels un Döntjes/De Jungemagd ehr Noth

From Wikisource
Jump to navigation Jump to search
<-- Wat is Unrecht? Riemels un Döntjes Dat Buurmäken un de Katt -->

Wie good et so 'ne Amme hett
Is gar nich to beschriewen,
Ick mutt Klock fiewe[1] uut'n Bett,
Doch se kann liggen blieben.

För de is gar nicks good genoog
An Drinken un an Aeten,
De Grootknecht sülvsten achter'n Ploog
Kann sick mit ehr nich mäten[2].

Kaffee mit Zucker oder Thee
Dat deiht man ehr gewähren,
[074]Un up den Stuten[3] dar kann se
Sick ook noch Botter smären.

Wat awer kummt in uhse Pütt[4],
För Magd, Knecht un de Jungen?
Dünnbeer, Stippmelk[5] un Hawergrütt
Is't Leed, wat us ward sungen.

Wenn ick mutt an'n Waschtrog stahn,
Ook gar- woll Meß[6] uutbringen,
Kann se mit't Göör[7] spazeeren gahn,
Kann danzen, spälen, singen.

Dat se so'n vörnehm Panz[8] upsöögt,
Sünd doch man all ehr Dahden,
Un daför fritt se sick vergnöögt
Ganz dick an Fisch un Braden.

Oh Gott! wenn'k doch ook Amme wöör!
Dat is all mien Verlangen;
Un jümmer denk ick hin un her —
Wie's dat woll antofangen?!

Original-Footnoten

  1. fiewe = fünf.
  2. mäten = messen.
  3. Stuten = Semmel.
  4. Pütt = Töpfe.
  5. Stippmelk = saure Milch.
  6. Meß = Mist.
  7. Göör = kleine Kind.
  8. Panz = kleine Krabbe.

Wikiborn-Footnoten