Ravdâ, inimă...
Ravdâ, inimâ mâratâ,
Pânʼ si-şi yinâ primâveara,
S-batâ cuclu pri tu plaiuri,
Pitrunicl’ea-n munţâ iara;
Ravdâ mailu pânʼ si-şi yinâ,
Faglu dulţi s-muşuţascâ
Şi livandu di lilici
Pri tu câmpuri si-ańiurzeascâ.
Şi atumţea, giuru pri ocl’i-ńi,
Giuru pri vruta mea Armânâ
Câ va-ńi ţing di mesi-apala
Şi va-ńi l’eau martina-n mânâ,
Tra s-mi ducu tu munti singuru,
Nsusu tu muntili furescu,
Di pri creaştitu hoara tutâ
Dimineaţa si-ńi mutrescu.
Va sâ-ńi cântâ-aclo birbil’il’i
Şi pâdurili va-ńi vâzeascâ
Cându-n ḑarea hrisusitâ
Harasma va sâ-ńi luţeascâ.
Aclo,-nsusu, io cârâuli,
Va si-avegl’iu dipriunâ,
Totu cântândalui di jali
Şi pi soari şi pi lunâ.
Va si-avegl’iu cârâuli
S-vedu cârvăńili di diparti,
Si-acaţu, lailu-ńi, cârvânaril’i
Tra s-lâ dau trâ vruta carti:
S-easâ seara şi dimneaţa
Trâşi tu muntili furescu,
Totu cu lirâ ş-cu flurie
Frâmtea-l’i albâ tra s-l’i-u-nvescu.
...................................................................
Ravdâ, inimâ mâratâ,
Ravdâ şi nu-ńi ti-nvirinâ;
Ninga patru meşi aravdâ,
Pânʼ trandaflili si-şi yinâ!...