Rano (2)

nadpis	Rano
awtor	Jakub Bart-Ćišinski
lěto
žórło	http://texty.citanka.cz/
licenca	public domain
nota	Serbske zynki, stary prawopis

    Z nócnej' pastwy spěcha sorna,
    Sowa khwata do skhowa,
    Do hole nóc lěhnje čorna
    So a woko zańdźeli.

    Młody dźeń ke křćeńcy wjezu
    Rańše zerja w mróčelach,
    Hono, holu, łuku, mjezu
    Ke kmótřenju wuproša.

    Radosć klinči přez njebjesa
    A na zemi wotcuća;
    Kabaćik swój škowrončk česa,
    Leći słóncej napřećo.

    W ćichim keřčku słódke hłosy
    Z horła wabi sołobik,
    Škórcy, drózny, knadźe, kosy
    Křćeński kěrluš zanjesu.

    Z cyrkwjow klinča rańše zwony,
    Dźeń so młody rozsměje,
    Wjesołe dźe přez zahony
    Hibanje a błyšćenje.

    Słódke žohnowanje ranja!
    Srěbaj z njeho, čłowjeko,
    Prjed' wšědnoh' wojowanja
    Brěmjo bjerješ na ramjo!