Pug de „Ping-Yang“

De kopanal spodöl kluba obsik, söl E. dos Remedios in Amoy, China, egetobs penedi at:

»Sedob ole laltügi dö klig Cinäna ta Yapän ko kaed de pug (fa lekanel yapänik), keli egetob de flen obik in Yapän. Spodels mödik oba esepükoms desidi, das penob-la omes laltügis dö klig. Penön alime dabalo binom tu vobik, so spelob, das opübol laltügi e kaedi plo nunams valik.^[1] Emekob lovepoli se Nelijapük . . .«

Befulobs atoso vipi penela, cedöl, das bepenam at onitedom liladelis valik gaseda obsik:

Pug de „Ping-Yang“
(1894, zülul 15^id).

Pug ebeginom godelo düp 3, dü Major-general Oshima ebidlanom se sulüd ko mans 3000 e elegleipom poni A. Cinänans tasteifoms vemo lanimäliko e pos epugöl pluliko legleipis neseklik, genal Oshima pevunom e edegivom tlupis omik düp 3 pozendelo. Bizug soelik, keli irivom, ebinom labed fota pona sulüdik. Oshima jinom ebeginön lägleipi tu göliko, o. b. nes givön genales votik timi, al lükömön ko solats omsik, spelöl, dalöpön solatöpi neflenik, büfo löpal omik, liötan-genal Nodu ekömom. Za in tim at, militatlups votik, pebüdöl fa liötan-genal Nodu, major-genal Satsumi e löpükünan Sato ikömoms e idasumoms solatöpis, äs pejonöl in kaed^[1]. Täno major-genal Satsumi, labedöl känemis yapänik valik in smabels ebeginom känön zifi. Milital cinänik esuzugom vafatakedalestäni e esedom depadi al Nodu, loföl, lovegivön zifi ogödelo. Genal Nodu elensumom stipi at, ye enunom genale cinänik, das in mal balid, das sembal blufomöv, lüvön zifi, neflenöfs pabeginomsöv denu. Za düp 2 gödela de 16^id kum gletik cinänik eblufom säfugön se leyan vesüdik, al pegemofoms fa Nodu. Bevüno monitels (cinänik) 1200 se »Manchuria« elovestepoms flumili (lüodü jevalef yapänik), al jelön fugi milita, ab ekokömoms ko jevalans yapänik 470, kels emonitoms bevü oms, ven ebinoms in neleod su jol; 600 pefunoms fa yapänans e lemäniks, pla genindlanön in zif, eblüfoms säfugön, fegolöl (deülöl)? militi löpiküna Sato«. - Yapänans enindlanoms in Ping-Yang gödelo de 1894, setul 16^id.

NOETS.

1. debük kaeda no ebinom liedo mödik; ye givobs is bepenami säto kuladik topöfa: Fimod Ping-Yang seitom bevü flumalams tel, koflumöl lesuno sulüvesüdü zif al flum Tatung. Sulüdü zif pon A petimodöl vemo dugom ovi flumalam gletikum. Sulüdü pon fot; po om genal Oshima ko mans 3000. Nolüdo stanöp löpiküna Sato po lulak (?); nebü om nolülefüdü zif smabels anik, po kels genal Satsuni stanom ko mans 3000. Ze vesüdü zif genal Nodu ko mans 4000; bevü om e löpikünan Sato jevalef yapänik (mans 470).

Se Volapük: Gased al pakam Volapüka 1895, Nüm: 7, Pads: 5-6.