Programma della Gita Milan-Saronn-Turaa
Programma della Gita Milan-Saronn-Turaa
Programma della Gita Milan-Saronn-Turaa
dove ve menna a spass el voster Deputaa
(1900-1910 ca.)
Elettôr del terz colleg - gh'è chì on comunicaa
che manda per espress - el voster Comitaa.
Se tratta del progett de festeggià el Candian,
e sperom che ghe staga trii quart del nost Milan.
Sott tutti sott, pront per el desdott,
per i vôtt regordess - tutti dessedess
giovin e vecc - tutti ben d'accord
sôra el piazzal della Stazion del Nord!
Se tratta de trovass in bona compagnia
a fà on poo de bon sangh, in pâs e in allegria,
l'è nò per fà on dispett a quii ch'è restaa giò
che forsi on bon colleg el trovaran anch mò!
Sott tutti, sott, donn e giovinott
regordes per i vôtt, su 'sta redengott
giò tutti svelti a petenà i bagai
e molla alla stazion cont el tramvai.
Quand poeu sii alla stazion, ghe pensa el Comitaa
a mettev in vagon - in pigna e spetasciaa
e guai a barbottà - e guai a lamentass
se voeur sperimentà la soppression di class.
Pu de impiegaa che vosa a chi g'ha i guanti,
el bis l'è pront, secondi e primi avanti,
pu de dannaa che vosa adree ai trii pee
vûi mamalucch! i terz inn là dedree!
Istess del 7 de Marz che sem strengiuu su tucc
diventa anca i panscioni compagn de tanti gucc,
el sortorin a campana - el giacchettin a duu pett
per podè stagh in treno, staran sotta a brazzett.
Tucc, tach a tach, cont i tosanett
se balla el treno el me fa nò on dispett
pè contra pè - man che strusa i man
tutt soportaremm per festegià el Candian.
De fianch ai camisett de cotonina scura
gh'è post per i toilettes dell'Hardt e del Ventura,
e quii che voeur sfoggià on quai abasgioron
emm combinaa de metti on para per vagon.
Sott sott, sott-cap, giò 'sta scampanada
comincia adess la nostra sparsengiada
sciori partenza!, che se inviom bell bell
foeura o tosann i scotti e i caramell!
Passand della Bovisa, giò tutti i man a sbatt
perchè nun elettor semm tutt'on poo bovisatt!
Cont vun de la Bovisa emm faa la gran spaccada
ma se pò minga dì che emm faa ona bovisada.
Sott tosanett - refignee su el nasin
del nost Candian sentii che profumin.
Sott elettor, cont el nas in man,
a festeggià el noster Candian!
Quand poeu a metaa strada, saremm rivaa a Saronn
permess la ciciarada a dò di noster donn;
silenzio tutti i omen, che basterà on coo d'aj
e 'l gran mercaa a Saronn te chì l'è bell e fai.
Sli sli slap, quatter ciciarett
sott o tosann cont 'sti foresett
slip slip slap, el sarà tal qual
d'on quai comizi elettoral.
Dò o tre sbanfâd de treno, te chì che semm rivaa:
a desranghì i gambett se inviom a Turaa,
perchè senza risparmi, savii ch'emm ottegnuu
per tutti i elettor de veggh el tir a duu.
Mei del toeuff toeuff che spuzza e fa fracass
di biciclett, di char à bancs coi ass,
sotta a l'antiga, andemm là a penscian;
ghe offrom la fadiga al Deputaa Candian!
Quand poeu saremm rivaa in mezz ai Veterani
e veggh mandaa on evviva de coeur ai duu Candiani
sarà rivaa el moment, ma propri el pussee bell
de ciapà post a tavola tra tutti in castell.
Pronti all'assâlt, cont i bajonett
che gh'i hann sott anca i tosanett,
sotta popol a maneggià el bocchin
sott con ident, quiett cont el lenguin!
Infin se saremm stracch de fà ballà i ganass
de bev e de mangià, se podarà fermass
e fà on poo de legria al deputaa Candian
e faggh dì su dò ciaccer inscì propi a la man.
Minga on discors - ma dò paroll domà
ditt a la bonna, cont el sò bell fà
che i simpatii de tutt el g'ha portaa
e anca la medaja de Deputaa.
Amici il mio programma, voi lo sapete già
Lavoro, pace, amore! (te chi coss'el dirà)
Italia amata in patria e rispettata fuori
le masse a trar dal suolo - compenso ai lor sudori.
Tucc vosarann: Viva el nost Candian,
e darann dent a sbattegh adree i man.
No gh'è pericol che se faga on smacch
senza apparato e senza claque.
Fenii che sia i discors, se gira el giardinon
col noster Deputaa che fa de ciciaron
inscì Secol e Tempo, de gûst a scadenass
a dì che el mena anch lù i Elettor a spass.
Tutti dree a lu a god la bella vista
istess che dree a Turaa, vân i riformista.
El fa vedè la fiocca, el sol, i stell
se in la geretta gh'è dent on quai quadrell.
Ma nun del terz colleg, Turaa per el Turaa
nun preferissom quest che parla del passaa
sarann i sò bei nomm, che imparom a memoria
che tutti 'sti veggitt, hann consegnaa a la storia.
Comm, San Martin, Palestro e Montebell
dove 'sti veggitt hann ris'ciaa la pell.
Monterotondo, Solferin, Bezzezza
mej 'sti nomm chì, de Chiesa e de Podrecca.
Denanz ai Veterani - raccolt dal sò Papà
el noster Deputaa el me farà sfilà
e vosaremm evvia a tutti 'sti veggitt
avanz de bersaglier e de garibalditt.
Su bei sposin, feggh vedè al bagai
'sti car veggitt con tutti i sò medaj,
perchè col temp el se regorda on dì
che quii che hann faa l'Italian inn questi chì!
Vosand viva l'Italia, el voster Comitaa
el scioglie l'adunanza - Sii tutti in libertaa!
Ghe basta ai maneggioni - se tutto l'è andaa ben
podè invidavv anch mò tutti quanti l'ann che ven!
S'è rott i fil - gh'è pù nagott de fà:
mangia, bev, viaggia, se n'è poduu vanzà;
disaremm content che insemma ai noster oss
ai noster Veteran ghe lassom on quai coss!
De quel che va a succed el noster Comitaa
declina danni e spes e tutti i indennità;
l'impegn l'è già scaduu - ognun per i fatt sò,
se va a succed quai coss - nun ghe ne impodom nò!
Se per cattà on poo de vioeul sopinn
on quaighedun se perd per i boschinn
el Comitaa, cont l'ultim sacrifizzi
el pronta i Assessôr di Sposalizzi!