Pri la Milito di Gaul

From Wikisource
Jump to navigation Jump to search

Unesma libro[edit]

I. La tota Galia esas dividita en tri parti: l’unesman habitas la Belgi, la duesman l’Aquitani, la triesma ti qui nomesas Kelti en sua linguo e Gali en nia. Ci omna interdiferas per linguo, kustumi e legi. La Galin separas del Aquitani la fluvio Garumna, del Belgin la fluvii Matrona e Sequana. Le maxim forta de ci omna esas la Belgi, nam li maxime distas del kulturo e civilizuro di nia Provinco; e maxim rare venas a li komercisti e vari qui povus febligar lia kurajo; li esas vicini dil Germani, qui habitas trans Rheno, e konstante militas kontre ici. Pro to la Helveti per sua kurajo superesas la cetera Gali, nam li preske omnadie kombatas kontre la Germani, sive dum ekpulsar ici de sua teritorio, sive dum invadar lia teritorio. La mencionita parto habitata dal Gali komencas an Rheno, limitizesas da Garumna, dal Oceano e dal teritorio dil Belgi; ol extensesas anke an la teritorio dil Sequani e dil Helveti til Rheno, inklinante su al nordo. La teritorio dil Belgi komencas an la lasta limiti di Galia, extensesas til l'infra parto di Rheno, an nordesto. Aquitania extensesas de la fluvio Garumna til Pirenei e ta parto dil Oceano qua balnas Hispania, an nordwesto.