Prefazion (Rezzonico)

From Wikisource
Jump to navigation Jump to search
Prefazion (Rezzonico)
by Giovanni Rezzonico


Gioann Rizzonich (1789-1875)

Prefazion


On liber che gha no de prefazion
l'è on'opera mancant de sinfonia,
sicchè, lor sciori, me daran reson
se a sto librett ghe foo anca mì la mia.

El stampi minga per ambizïon,
che infin hiin tutt ciallad de buttà via;
ma el stampi colla bonna intenzïon,
se la va ben, de fa on'opera pia.

Chè se mai salta foeura on quaj guadagn,
el sarav tutt per i scoeul infantil,
reservandem a mì se ghè del dagn.

La se riduss la spesa in d'on fiorin,
e anca ch'el librettin el sia suttil
l'è minga quella de struppià el borsin:
gh'è on poo de meneghin,

e gh'en sarav de pu, ma hii de savè
che on bon amis hoo interessaa perchè

el me fass el piasè
de dimm el sò parer sincerament
s'el credeva ch'el fuss convenïent

che quij componiment
se stampassen senz'altra eccezïon;
ma lu, fasendem tanto de muson,

l'ha ciappaa el folcetton,
e tajand, senza caritaa
ona bonna trentenna el n'ha scartaa:

vun perchè tropp salaa,
o come lu el diseva, tropp piccant,
l'olter perchè gh'entrava el nom d'on sant,

o de quaj donn galant.
E mì, docil pussee che nè on agnell,
me sont uniformaa alla sort de quell

che girand el tornell
menter ch'el se credeva da fa on'olla
a malastant l'ha trovaa faa on'impolla.

Appenna de bricolla
hoo poduu trii o quatter casciann là;
e l'amis, stracch anch lu de ratellà,

infin j'ha lassaa andà.
Tutt el mond sa che mi sont negoziant
e che se foo quaj vers de tant in tant

l'è come dilettant.
Se mai piasessen no dopo leggiuu
l'è anca poch el danee che avran spenduu;

nè l'è del tutt perduu,
perchè la carta frusta, già se sa,
la fa semper besogn in ona ca.